2
Yesu Kirisin tɑbu kowo geo
1 Wunɛ mɑɑ nɛn bii, ɑ n tɑ̃sɑ durom mɛ sɔɔ, mɛ sɑ mɔ Yesu Kirisin min di. 2 Gɑ̃ɑ ni ɑ nuɑ nɛn min di seedɑgii dɑbinun wuswɑɑɔ, ɑ nu gɑbu nɔmu bɛrio be ɑ nɑɑnɛ sɑ̃ɑ be bɑ koo mɑɑ kpĩ bu nu gɑbu sɔ̃ɔsi.
3 A wuro ɑ ko nge Yesu Kirisin tɑbu kowo geo nɔni swɑ̃ɑru sɔɔ. 4 Tɑbu kowo wi u wɑ̃ɑ tɑbu gberɔ, u ku rɑ mɑɑ win wɑ̃ɑrun wunɑnɔ ko yèn sɔ̃ u kĩ u win tɑbu sunɔn kĩru ko. 5 Wɑsi kɑsɑnugii ù n dukɑn gɑrɑsɑ mɔ̀, u ǹ kpɛ̃ u yen ɑre wɑ mɑ n kun mɔ u yen woodɑ swĩi. 6 Mɛyɑ mɑɑ gbee wuko wi u sɔmburu kuɑ kɑ wɑhɑlɑ, wiyɑ u ginɑ weenɛ u gberun mɑrum sɔri. 7 A nɛn gɑri yi kpuro bwisikuo yi nɑ nun sɔ̃ɔmɔ mi, domi Yinni u koo nun somi ɑ kɑ kpuro tubu.
8 A Yesu Kirisi yɑɑyo wi u yɑri Dɑfidin bweserun di, mɑ u sikurɑ gɔrin di. Win gɑri yi wɑ̃ɑ Lɑbɑɑri geɑ sɔɔ ye nɑ wɑɑsu mɔ̀. 9 Lɑbɑɑri geɑ yen sɔ̃nɑ nɑ nɔni swɑ̃ɑru wɑɑmɔ sere bɑ kɑ mɑn yɔni sɔri nge tɔn kɔ̃so. Adɑmɑ bɑ ǹ Gusunɔn gɑri sɔri. 10 Yenin sɔ̃nɑ nɑ kpuro kpĩɑ be bɑ gɔsɑn ɑrufɑɑnin sɔ̃, kpɑ ben tii bu mɑɑ fɑɑbɑ wɑ Yesu Kirisin mi kɑ yiiko ye yɑ ku rɑ kpe. 11 Gɑri nɑɑnɛgii wee.
Sɑ̀ n gu kɑ wi sɑnnu, sɑ ko n mɑɑ wɑ̃ɑ kɑ wi.
12 Sɑ̀ n tɛmɑnɑ kɑ suuru, sɑ ko bɑndu di kɑ wi sɑnnu.
Sɑ̀ n mɑɑ nùn yinɑ, win tii u koo sun yinɑ.
13 Sɑ̀ n sɑ̃ɑ nɑɑnɛ sɑrirugibu, kɑ mɛ, u sɑ̃ɑ nɑɑnɛgii.
Domi u ǹ kpɛ̃ u win tii yinɑ.
Sɔm kowo wi u tii sɔ̃ɔsi gemgii
14 Yeni kpurowɑ kɑɑ wunɛn tɔmbu yɑɑyɑsiɑ kpɑ ɑ mɑɑ bu kirɔ ko Gusunɔn wuswɑɑɔ bu ku sikirinɑ gɑri wɛ̃ɛrinun sɔ̃. Domi yenin bweserɑ kun ɑrufɑɑni gɑɑ mɔ mɑ n kun mɔ yu tɔmbu kɑm koosiɑ be bɑ swɑɑ dɑki. 15 A hɑniɑ koowo ɑ n mɔ̀ ye kɑɑ kɑ siɑrɑbu wɑ Gusunɔn wuswɑɑɔ, nge sɔm kowo wi sekurɑ kun mɔ̀ win sɔmburu sɔɔ, wi u rɑ n gem gɑri sɔ̃ɔsimɔ dee dee. 16 Adɑmɑ ɑ hɑnduniɑn gɑri kɑnkɑmgii suurio, domi yi rɑ tɔmbu dɛsirɑsiewɑ n tomɑ Gusunɔn bɛɛrɛ yɛ̃run di. 17 Ye tɔn ben bweserɑ sɔ̃ɔsimɔ, yɑ sɑ̃ɑwɑ nge boo kɔ̃so wi u wɑsi kɔ̃sisiɑmɔ. Be sɔɔrɑ Himɛnɛ kɑ Filɛtu bɑ wɑ̃ɑ. 18 Bɑ gem swɑɑ deri mɑ bɑ gɑbun nɑɑnɛ dokebu surɑmɔ, domi bɑ nɛɛ, gɔribun seebu sɑrɑ kɔ. 19 Adɑmɑ kpɛɛkpɛɛku dɑmguu ge Gusunɔ u surɑ gɑ ǹ yĩirurɔ. Gɑri wee yi bɑ yoruɑ gen wɔllɔ. Yinni u wigibu yɛ̃. Yen biru mɑɑ, bɑɑwure wi u Yinnin yĩsiru soku, u kom kɔ̃sum kpuro derio.
20 Dii burɑru sɔɔ gbɛ̃ɛ bwese bwesekɑwɑ rɑ n wɑ̃ɑ. Bɑ nin gɑnu kuɑ kɑ sii geesu kɑ wurɑ ni bɑ rɑ dendi bu kɑ gɑ̃ɑ bɛɛrɛginu ko. Bɑ mɑɑ nin gɑnu kuɑ kɑ dɑ̃ɑ kɑɑru kɑ sɔndu ni bɑ rɑ dendi bu kɑ ko ye bɑ turɑ. 21 Bɑɑwure wi u tii sɑ̃rɑsiɑmɔ kom kɔ̃sum di, bɑ koo nùn dendi bu kɑ gɑ̃ɑ bɛɛrɛginu ko. Domi u sɑ̃ɑ wi bɑ wunɑ nɛnɛm wi Yinni u koo kɑ dendi, u mɑɑ sɔɔru sɑ̃ɑ u kɑ sɔm geeru bɑɑtere ko. 22 A ɑluwɑɑsirun kĩru kɑnkɑm suurio kpɑ ɑ gem kɑ nɑɑnɛ dokebu kɑ kĩru kɑ ɑlɑfiɑ nɑɑ girɑ, wunɛ kɑ be sɑnnu be bɑ Yinnin yĩsiru sokumɔ kɑ gɔ̃ru dɛɛrɔ. 23 Adɑmɑ ɑ tii gɑwo sɑɑ wiirɑ gɑri kɑ sikirinɔ yɛ̃ru sɑrirugisun di. A yɛ̃ kɑm kɑm mɑ siyɑ su rɑ sɑnnɔ mɑ. 24 Wee n ǹ weenɛ Yinnin sɔm kowo u n sɑ̃ɑ nɔɔ gɔmunugii, ɑdɑmɑ u tɔmbu kpuro dɑɑ geɑ kuo, u n sɑ̃ɑ wi u koo keu sɔ̃ɔsibu kpĩ kpɑ u n dɑ tɛmɑnɛ. 25 N weenɛ u be bɑ kun kɑ nùn nɔɔ tiɑ sɑ̃ɑ gerusi tɛɛru. Sɔrɔkudo Gusunɔ u koo de bu ben gɔ̃ru gɔsiɑ kpɑ bu gem giɑ. 26 Sɑnɑm mɛyɑ ben lɑɑkɑri koo wurɑmɑ kpɑ bu kisirɑ Setɑm yinɑn di wi u rɑɑ bu nɛni u toorimɔ win gɔ̃ru kĩru sɔɔ.