109
1 Dɑfidin womu ge u wom kowobun wirugii kuɑ. U nɛɛ,
Yinni Gusunɔ, wunɑ nɑ siɑrɑmɔ, ɑ ku nɔɔ mɑri.
2 Wee tɔn kɔ̃sobu bɑ mɑn gɑri gerusimɔ mɑ bɑ mɑn weesu kuɑmmɛ.
3 Bɑ kɑ mɑn gɑri mɔ̀ kɑ tusiru, mɑ bɑ kɑ mɑn sɑnnɑmɔ kɑm sɔɔ.
4 Nɛ, nɑ bu kĩ, ɑdɑmɑ bɑ mɑn nɔɔ kuurimɔ.
Mɑ nɑ kɑnɑru mɔ̀ be, nɛn yibɛrɛbɑn sɔ̃.
5 Wee bɑ mɑn kɔ̃sɑ kɔsiemɔ gem ɑyerɔ.
Mɑ bɑ mɑn tusɑ bɑɑ mɛ nɑ bu kĩru sɔ̃ɔsimɔ.
6 A de tɔn kɔ̃so u nɛn yibɛrɛ kpɑrɑ,
kpɑ wi u koo nùn tɑɑrɛ wɛ̃ u n wɑ̃ɑ win nɔm geuɔ.
7 Bɑ̀ n nùn siri kpɑ bu deemɑ u tore.
Kpɑ bu win kɑnɑru gɑrisi durum.
8 Win tɔ̃ru tu ku dɛnyɑ kpɑ goo u nùn kɔsire ko win sɔmburu sɔɔ.
9 Kpɑ win bibu bu ko gobekubɑ,
kpɑ win kurɔ u gɔminiru sinɑ.
10 Kpɑ win bibu bu ko yɑɑyɑɑre kowobu, bɑ n bɑrɑ mɔ̀.
Kpɑ bu ben wuu deri gu ko bɑnsu,
bu dɑ bɑ n dĩɑnu kɑsu mi n tomɑ.
11 Bèn dibu u nɛni,
bu nɑ bu win yɑ̃nu kpuro gurɑ.
Kpɑ tɔn tukobu bu win dukiɑ gurɑ.
12 Goo u ku rɑɑ nùn durom kuɑ.
Goo u ku mɑɑ win bii gobekubɑn wɔnwɔndu ko.
13 Bu win bibun bweseru goowo,
kpɑ win yĩsiru tu gbi.
14 Gusunɔ u win bɑɑbɑbɑn torɑnu yɑɑyo,
kpɑ u ku win mɛro nùn win durum suuru kuɑ.
15 Yinni Gusunɔ u de u n win torɑ ni yɑɑye,
kpɑ u win yĩsiru go mɑm mɑm.
16 Domi u ǹ wɔnwɔndu sɔ̃ɔsi.
U sɑ̃ɑrobu kɑ wɔnwɔndobu nɔni sɔ̃ɔwɑwɑ
sere u tɔnu go wi u nuki sɑnkire.
17 Bɔ̃riyɑ u kĩɑ. Ǹ n mɛn nɑ, yi nùn dio.
U ǹ domɑru kĩɛ. Ǹ n mɛn nɑ, tu kɑ nùn tondo.
18 Bɔ̃ri yi nùn wukirio nge yɑberu.
Yi duurio win wɑsin sɔɔwɔ nge nim,
kpɑ yi du win kukunu sɔɔ nge gum.
19 Bɔ̃ri yi, yi nùn wukirio nge yɑ̃ɑ ni bɑ rɑ doke,
kpɑ yi n nùn sɛ̃ke bɑɑdommɑ nge kpɑkɑ.
20 Yeniwɑ Yinni Gusunɔ u koo de yu nɛn yibɛrɛbɑ
kɑ be bɑ mɑn kɔ̃sɑ gerusimɔ deemɑ.
21 Wunɛ Yinni Gusunɔ,
ɑ nɑ ɑ mɑn sɑnnɑ wunɛn yĩsirun sɔ̃.
A mɑn wɔro. Domi wunɛn tɔn geeru tɑ kpɑ̃.
22 Wee nɑ sɑ̃ɑ wɔnwɔndo, nɑ ǹ gɑ̃ɑnu mɔ,
mɑ nɑ nuki sɑnkire.
23 Wee nɑ doonɔ nge sɑɑru.
Mɑ bɑ mɑn gire nge twee.
24 Nɛn dũu winu dɑm dwiiyɑ nɔɔ bɔkurun sɔ̃.
Mɑ nɑ wɑsire woorɑrun sɔ̃.
25 Nɑ kuɑ wi u sekuru sɔɔwɑ ben mi.
Mɑ bɑ mɑn mɛɛrɑ bɑ wii gimɑnu koosimɔ.
26 Gusunɔ nɛn Yinni, ɑ mɑn somiɔ.
A mɑn fɑɑbɑ koowo wunɛn tɔn geerun sɔ̃,
27 kpɑ bu giɑ mɑ wunɑ ɑ nɔmu mɔ be sɔɔ.
Wunɑ ɑ mɑɑ kpuro mɔ̀.
28 Ye bɑ bɔ̃rusimɔ, yerɑ wunɛ kɑɑ domɑru kuɑ.
Bɑ̀ n seewɑ, bɑ koo sekuru wɑ.
Kpɑ nɛ, wunɛn sɔm kowo n nuku dobu ko.
29 Nɛn yibɛrɛbɑ bɑ koo sekuru wɑ,
kpɑ tu bu wukiri nge yɑbe bɑkɑru.
30 Kon nɔɔgiru suɑ n Yinni Gusunɔ siɑrɑ.
Kon nùn siɑrɑ tɔn dɑbinun wuswɑɑɔ.
31 Domi u rɑ n wɑ̃ɑ bwɛ̃ɛbwɛ̃ɛbun bɔkuɔ
u kɑ bu fɑɑbɑ ko be bɑ bu tɑɑrɛ wɛ̃ɛmɔn nɔmɑn di.