108
1 Womu ge Dɑfidi u kuɑ. U nɛɛ,
2 Gusunɔ, nɑ sɔɔru sɑ̃ɑ.
Kon womu ko kɑ nɛn dwee yɑ̃nu, kɑ nɛn gɔ̃ru kpuro.
3 Nɛn mɔrɔku kɑ nɛn guuru, i dom yɑndo,
kpɑ n womu ko yɑm sɑ̃reru.
4 Yinni Gusunɔ, kon nun siɑrɑ tɔmbun suunu sɔɔ sere kɑ bɑɑdommɑɔ.
Kon nun womu kuɑ bwesenu sɔɔ.
5 Domi wunɛn tɔn geerɑ kpɑ̃ tɑ wɔllu girɑri.
Mɛyɑ mɑɑ wunɛn bɔrɔkinirɑ sɔ̃ɔsire sere guru wirɔ.
6 Gusunɔ, ɑ seewo ɑ tii wɔlle suɑ.
Kpɑ wunɛn yiiko yu sɔ̃ɔsirɑ hɑnduniɑ kpuro sɔɔ.
7 Kpɑ ɑ wɑ ɑ kɑ bɛsɛ wunɛn kĩnɑsibu fɑɑbɑ ko.
A bɛsɛn kɑnɑru nɔɔwɔ kpɑ ɑ sun fɑɑbɑ ko kɑ wunɛn nɔm geu.
8 Gusunɔ u geruɑ win sɑ̃ɑ yee dɛɛrɑrɔ u nɛɛ, u koo nɑsɑrɑ wɑ.
U koo Sikɛmu bɔnu ko kpɑ u tɔmbu Sukɔtun wɔwɑ yɑbuɑ.
9 Wiyɑ u Gɑlɑdi mɔ. Wiyɑ u mɑɑ Mɑnɑse mɔ.
Efɑrɑimu yɑ sɑ̃ɑwɑ nge win sii furɔ kɔkɔru.
Mɑ Yudɑ yɑ sɑ̃ɑ nge win sinɑ dɛkɑ.
10 Adɑmɑ Mɔɑbu yɑ sɑ̃ɑwɑ win woburutiɑ.
U koo Edɔmu bɑrɑ nɔɔ teu kɔ̃ɔwɑ u kɑ sɔ̃ɔsi mɑ yɑ kuɑ wigiɑ.
Kpɑ u nuku dobun kuuki ko Filisitibɑn tem sɔɔ.
11 Wɑrɑ u koo kɑ mɑn dɑ wuu gbɑ̃rɑruguu gen mi.
Wɑrɑ u koo mɑn kpɑrɑ u kɑ dɑ Edɔmuɔ.
12 Yinni Gusunɔ, wunɑ kɑɑ kɑ mɑn dɑ, wunɛ wi ɑ rɑɑ sun yinɑ,
mɑ ɑ ku rɑ mɑɑ kɑ bɛsɛn tɑbu kowobu yɑri.
13 A sun somiɔ su kɑ yɑri nɔni swɑ̃ɑrun di.
Tɔnun somiru tɑ sɑ̃ɑwɑ wom dirum.
14 À n wɑ̃ɑ kɑ bɛsɛ, sɑ ko kpĩ su tɑbu ko kɑ wɔrugɔru.
Kpɑ ɑ bɛsɛn yibɛrɛbɑ kɔsuku.