107
1 I Yinni Gusunɔ siɑro win tɔn geerun sɔ̃.
Win durom mu rɑ n wɑ̃ɑwɑ sere kɑ bɑɑdommɑɔ.
2 Be u yɑkiɑ, bu nùn siɑro.
Be u wɔrɑ yibɛrɛbɑn nɔmɑn di, bu nùn tɔmɔ.
3 Be u mɛnnɑmɑ tem kpuron di, bu nùn siɑro.
Be u sokumɑ sɑɑ sɔ̃ɔ yɑri yeru giɑn di, kɑ sɔ̃ɔ duu yeru giɑn di,
kɑ sɔ̃ɔ yɛ̃sɑn nɔm geu giɑn di, kɑ sɔ̃ɔ yɛ̃sɑn nɔm dwɑru giɑn di,
bu nùn wɔlle suo.
4 Wee bɑ rɑɑ kɔ̃ɔre gbɑburɔ mi gɑ̃ɑnu ku rɑ kpi bɑ sirenɛ,
bɑ ǹ wuu wɑ mi bɑ koo sinɑ.
5 Gɔ̃ɔru kɑ nim nɔru gɑ bu go.
Mɑ bɑ wurure bɑ ǹ dɑm mɔ.
6 Ben nɔni swɑ̃ɑ te sɔɔ, bɑ Yinni Gusunɔ nɔɔgiru sue bɑ somiru kɑnɑ,
mɑ u bu yɑrɑ nɔni swɑ̃ɑ ten di.
7 U bu kpɑrɑ swɑɑ geɑ sɔɔ bɑ kɑ turɑ mi bɑ koo sinɑ.
8 Bu nùn siɑro win tɔn geeru kɑ win sɔm mɑɑmɑɑkiginun sɔ̃ ni u rɑ ko tɔnun sɔ̃.
9 Domi u wi nim nɔru gɑ mɔ̀ nim kɑ̃.
Mɑ u wi gɔ̃ɔrɑ mɔ̀ debusiɑ.
10 Gɑbu bɑ rɑɑ wɑ̃ɑ yɑm wɔ̃kuru sɔɔ sere gɔribun wɑ̃ɑ yerɔ bɑ yoru dimɔ,
mɑ bɑ kɑ bu yɔni bɔkuɑ
11 yèn sɔ̃ bɑ Yinni Gusunɔn gɑri yinɑ,
mɑ bɑ wi, Wɔrukoon bwisi kɛ̃ru gɛmɑ.
12 Mɑ u derɑ bɑ tii kɑwɑ wɑhɑlɑ yen sɔ̃.
Mɑ bɑ wɔrukɑ bɑ gu, goo kun bu somiru de.
13 Adɑmɑ ben nɔni swɑ̃ɑ te sɔɔ,
bɑ Yinni Gusunɔ nɔɔgiru sue bɑ somiru kɑnɑ.
Mɑ u bu yɑrɑ nɔni swɑ̃ɑ ten di.
14 U bu yɑrɑ yɑm wɔ̃ku te, kɑ gɔribun wɑ̃ɑ yee ten min di,
mɑ u ben yorun yɔni yi kusiɑ.
15 Bu Yinni Gusunɔ siɑro win tɔn geerun sɔ̃.
Bu nùn siɑro win sɔm mɑɑmɑɑkiginun sɔ̃ ni u rɑ ko tɔnun sɔ̃.
16 Domi u sii gɑndun gɑmbobɑ kɔsukɑ.
Mɑ u kɔkɔrɔ sisugii bɔɔkɑ.
17 Gɑri bɑkɑsu su tii kuɑ wɔnwɔndobu sin dɑɑ kɑ sin torɑnun sɔ̃.
18 Bɑ ku rɑ mɑɑ dĩɑnu kɑ̃ mɑ bɑ gɔɔ turuku kuɑ.
19 Ben nɔni swɑ̃ɑ te sɔɔ, bɑ Yinni Gusunɔ nɔɔgiru sue bɑ somiru kɑnɑ.
Mɑ u bu yɑrɑ nɔni swɑ̃ɑ ten di.
20 Kɑ win gɑriyɑ u bu fɑɑbɑ kuɑ,
mɑ u bu yɑrɑ wɔru bɔkɔ gen min di.
21 Bu Yinni Gusunɔ siɑro win tɔn geeru kɑ win sɔm mɑɑmɑɑkiginun sɔ̃ ni u rɑ ko tɔnun sɔ̃.
22 Bu nùn siɑrɑbun yɑ̃kunu kuo.
Kpɑ bu win sɔm mɑɑmɑɑkigii nin gɑri kpɑrɑ kɑ nuku dobu.
23 Be bɑ goo nimkusu duɑ, mɑ bɑ ben sɔmburu mɔ̀ si sɔɔ,
24 bɑ Yinni Gusunɔn nɔmɑn sɔmɑ wɑ
kɑ mɑɑ mɑɑmɑɑki ye u kuɑ nim wɔ̃ku sɔɔ.
25 U gɑri geruɑ, mɑ u derɑ woo bɔkɔ gɑ seewɑ
gɑ nim kurenu seeyɑ.
26 Nù n dɑ wɔllɔ, kpɑ nu sɑrɑmɑ.
Be bɑ wɑ̃ɑ goo nimkuu si sɔɔ, bɑ nɑnde kɑri yen sɔ̃.
27 Tirerɑbu bu mwɑ, bɑ bɑ̃ɑrimɔ nge tɑm nɔrobu.
Ben bwisi kpuro yi kpɑ.
28 Ben nɔni swɑ̃ɑ te sɔɔ,
bɑ Yinni Gusunɔ nɔɔgiru sue bɑ somiru kɑnɑ.
Mɑ u bu yɑrɑ nɔni swɑ̃ɑ ten di.
29 U woo gunɑ ye yɔ̃rɑsiɑ, mɑ nim kurenu nu mɑri.
30 Mɑ be kpuron nuki dorɑ ye u kɑ ye kpuro mɑrisiɑ.
Mɑ Yinni Gusunɔ u bu kpɑrɑ u kɑ turɑ sere mi bɑ dɔɔ.
31 Bu Yinni Gusunɔ siɑro win tɔn geeru
kɑ win sɔm mɑɑmɑɑkiginun sɔ̃ ni u rɑ ko tɔnun sɔ̃.
32 Bu nùn wɔlle suo mi tɔmbɑ mɛnnɛ.
Bu nùn siɑro guro gurobun suunu sɔɔ.
33 Yinni Gusunɔwɑ u rɑ dɑɑrun nim gberɑsie,
kpɑ u bwiin nim kpeerɑsiɑ mɑm mɑm.
34 Kpɑ u tem gem gɔsiɑ tem bɔrugum mɛn tɔmbun nuku kɔ̃surun sɔ̃.
35 Wi turowɑ u rɑ mi gɑ̃ɑnu ku rɑ kpi gɔsie nim bwee bɑkɑru.
Kpɑ u tem gbebɑ gɔsiɑ nim bwii.
36 Kpɑ u be bɑ gɔ̃ɔru bɑrɔ sinɑsiɑ mi,
kpɑ bu wuu ko mi bɑ koo sinɑ,
37 kpɑ bu resɛm dɑ̃nu duure mi, nu mɑ dɑbi dɑbiru.
38 U rɑ bu domɑru kue bu dɑbiɑ.
Kpɑ u ben yɑɑ sɑbenu kuurɑsiɑ.
39 Adɑmɑ gɑbu bɑ dɑbiru kɑɑre bɑ wɑ̃ɑ sekuru sɔɔ
yèn sɔ̃ bɑ yoru dimɔ bɑ nɔni sɔ̃ɔre.
40 Mɑ Yinni Gusunɔ u derɑ bɑ ben wirugibu gɛmɑ,
mɑ bɑ sirenɛ kɑm sɔɔ bɑ ǹ yɛ̃ mi bɑ dɔɔ.
41 Adɑmɑ u rɑ sɑ̃ɑro yɑre win sɑ̃ɑrun di.
Kpɑ u win bweseru dɑbiɑsiɑ nge sɑbe gɔ̃su.
42 Gemgibu bɑ̀ n nùn wɑ, bɑ rɑ yɛ̃ɛriwɑ.
Kpɑ tɔn kɔ̃sobu bu nɔɔ mɑri.
43 Wi u bwisi mɔ, u de u gɑri yi kpuro nɛnɛ
kpɑ u giɑ mɑ Yinni Gusunɔ u sɑ̃ɑwɑ duromgii.