88
1 Womu ge Koren bibu bɑ wom kowobun wirugii kuɑ. Bɑ gu kuɑwɑ kɑ guuru. Hemɑni Esirɑhigiiwɑ u gu kuɑ. Ge wee.
2 Yinni Gusunɔ nɛn fɑɑbɑ koowo,
nɑ rɑ n nɔɔgiru suewɑ wunɛn wuswɑɑɔ wɔ̃kuru kɑ sɔ̃ɔ sɔɔ.
3 A de ɑ nɛn kɑnɑru nɔ.
A swɑɑ tem kpĩiyɔ ɑ nɔ ye nɑ nun kɑnɑmɔ.
4 Wee wɑhɑlɑ yɑ mɑn deemɑ n kpɑ̃
sere nɑ gɔribun wɑ̃ɑ yeru turuku kuɑ.
5 Nɑ wɑ̃ɑ be bɑ gɔɔ dɔɔn wuurɔ.
Nɑ ǹ mɑɑ dɑm mɔ.
6 Wee nɑ kpĩ kɑ gɔribu sɑnnu.
A derɑ nɑ wɑ̃ɑ kɑ be sɑnnu sikirɔ,
be, be ɑ ǹ mɑɑ yɑɑyɑmɔ, ɑ ǹ mɑɑ bu nɔɔrimɔ.
7 A mɑn kpɛ̃ɛ wɔru bɔkɔ sɔɔ mi yɑm wɔ̃kurɑ wɑ̃ɑ.
8 A mɑn mɔru seesi,
mɑ n sɑ̃ɑre nɑ nim mwɛɛre.
9 A derɑ nɛn kpɑɑsibu bɑ mɑn deri.
A derɑ bɑ mɑn tusɑ,
mɑ nɑ tɑɑrere nɑ ǹ kpɛ̃ n nundɑ nɛn wɑhɑlɑn di.
10 Nɛn nɔni dɑm dwiiyɑ nɔni swɑ̃ɑrun sɔ̃.
Yinni Gusunɔ, tɔ̃ru bɑɑtere nɑ rɑ nɔmɑ yiiyewɑ wunɛn mi giɑ nɑ n nun somiru kɑnɑmɔ.
11 Gɔribɑ ɑ rɑ mɑɑmɑɑki kue?
Gɔribɑ bɑ koo kpĩ bu se bu nun sɑ̃?
12 Gɔribɑ bɑ koo kpĩ bu wunɛn bɔrɔkinirun gɑri gere siki wɔruɔ?
Bɑ koo kpĩ bu wunɛn tɔn geerun gɑri gere gɔribun wɑ̃ɑ yerɔ?
13 Bɑ koo kpĩ bu wunɛn mɑɑmɑɑki wɑ yɑm wɔ̃kurɔ?
Bɑ koo kpĩ bu wunɛn gem tubu gɔriɔ mi bɑ rɑ tɔmbu duɑri?
14 Yinni Gusunɔ, wunɑ nɑ rɑ fɑɑbɑ kɑnɛ.
Bururu bɑɑtere, wunɑ nɑ rɑ nɔɔgiru sue.
15 Yinni Gusunɔ, mbɑn sɔ̃nɑ ɑ mɑn wunɛn wuswɑɑ berue.
Mbɑn sɔ̃nɑ ɑ ǹ kĩ n nun wɑ.
16 Sɑɑ nɛn birun di, nɑ wɔnwɔndu soorewɑ nɑ gɔɔ dɔɔ.
Nɑ burisinɛ nɔni swɑ̃ɑ te ɑ mɑn kpɛ̃ɛn sɔ̃.
17 Nɛ sɔɔrɑ wunɛn mɔru yɑ wɔri, mɑ yɑ mɑn goomɔ.
18 Yɑ kɑ mɑn sikerenɛ tɔ̃ɔ bɑɑtere nge nim bweru.
Ye kpurowɑ yɑ mɑn wukiri.
19 A derɑ nɛn kpɑɑsibu kɑ nɛn bɔrɔbɑ bɑ mɑn biru kisi.
Be kpuro bɑ mɑn deri.