89
1 Womu ge Etɑni Esirɑhigii u kuɑ. Ge wee.
2 Yinni Gusunɔ, kon wunɛn tɔn geerun womu ko sere kɑ bɑɑdommɑɔ.
Kon wunɛn bɔrɔkiniru kpɑrɑ sere kɑ bɑɑdommɑɔ.
3 Nɑ yɛ̃ mɑ wunɛn kĩru tɑ ko n wɑ̃ɑwɑ sere kɑ bɑɑdommɑɔ.
Wunɛn bɔrɔkiniru tɑ girewɑ wɔllɔ.
4 Yinni Gusunɔ, ɑ nɛɛ,
ɑ kɑ Dɑfidi wi ɑ gɔsɑ ɑrukɑwɑni bɔkuɑ.
A wi, wunɛn sɔm kowo nɔɔ mwɛɛru kuɑ kɑ bɔ̃ri
5 ɑ nɛɛ, kɑɑ goo wunɑ win bweseru sɔɔ
u ko sunɔ sere kɑ bɑɑdommɑɔ,
kpɑ ɑ win bɑndu tɑ̃sisiɑ sere kɑ bɑɑdommɑɔ.
6 Yinni Gusunɔ, wɔllu tɑ nun bɛɛrɛ wɛ̃ɛmɔ
mɑɑmɑɑki ye ɑ mɔ̀n sɔ̃.
Wunɛn gɔrɑdobɑn wuuru tɑ nun siɑrɑmɔ
wunɛn bɔrɔkinirun sɔ̃.
7 Yinni Gusunɔ, ɑ ǹ sɑɑrɑ mɔ wɔllɔ.
Wunɛn gɔrɑdobɑ sɔɔ, goo sɑri wi u kɑ nun nɛ.
8 A nɑnum mɔ wunɛn gɔrɑdo dɛɛrobun suunu sɔɔ.
Wunɛn yiiko yɑ kpɑ̃ be bɑ nun sikerenɛn suunu sɔɔ.
9 Gusunɔ, wɔllu kɑ tem Yinni, wɑrɑ u dɑm mɔ nge wunɛ.
Wunɛn bɔrɔkinirɑ nun kɑrewɑ tɑ kɑ sikerenɛ.
10 Wunɑ ɑ rɑ nim wɔ̃kun tii suɑbu yɔ̃rɑsie.
Gen nim kurenu nù n seewɑ, ɑ rɑ nu suresie.
11 A Egibitigibu tɑɑkɑ ɑ pɛsukɑ nge goru.
A be, wunɛn yibɛrɛbɑ yɑrinɑsiɑ kɑ wunɛn dɑm.
12 Wunɑ ɑ wɔllu kɑ tem mɔ.
Wunɑ ɑ hɑnduniɑ tɑkɑ kuɑ kɑ ye yɑ wɑ̃ɑ ye sɔɔ.
13 Wunɑ ɑ sɔ̃ɔ yɛ̃sɑn nɔm geu kɑ nɔm dwɑru kuɑ.
Guu ni bɑ mɔ̀ Tɑbori kɑ Hɛɛmɔɔ nu wunɛn yĩsiru bɛɛrɛ wɛ̃ɛmɔ.
14 Wunɛn gɑ̃seru tɑ dɑm mɔ.
Wunɛn nɔmu gɑ dɑm mɔ.
15 Gemɑ mu sɑ̃ɑ wunɛn bɑndun kpɛɛkpɛɛku.
Kĩru kɑ bɔrɔkinirɑ rɑ n wɑ̃ɑ wunɛn wuswɑɑɔ.
16 Yinni Gusunɔ, doo nɔɔrugibɑ be bɑ rɑ nun tɑkɑru ko.
Bɑ rɑ sĩwɑ yɑm bururɑm sɔɔ wunɛn wuswɑɑɔ.
17 Bɑ koo nuku dobu ko tɔ̃ɔ bɑɑtere wunɛn yĩsirun sɔ̃.
Kpɑ bu bɛɛrɛ wɑ wunɛn gem sɔ̃.
18 Domi wunɑ ɑ sɑ̃ɑ ben dɑm kɑ ben bɛɛrɛ.
Wunɛn sɑɑbuwɑ sɑ tɑ̃simɔ.
19 Yinni Gusunɔ, wunɑ ɑ sɑ̃ɑ bɛsɛ Isirelibɑn tɛrɛru.
Wunɛ Dɛɛro, wunɑ ɑ sɑ̃ɑ bɛsɛn sinɑ boko.
20 Gɑsɔ, ɑ kɑ wunɛn sɔm kowo be ɑ nɑɑnɛ sɑ̃ɑ gɑri kuɑ kɑ̃siru sɔɔ ɑ nɛɛ,
ɑ wunɛn dɑm tɑbu durɔ dɑmgii goo wɛ̃.
A nùn gɔsɑ wunɛn tɔmbun suunu sɔɔn di ɑ wɔlle suɑ.
21 Wiyɑ Dɑfidi wunɛn sɔm kowo.
Wiyɑ ɑ bɑndun gum tɑ̃re.
22 Wunɛn nɔmu gɑ ko n nùn nɛniwɑ kem kem.
Geyɑ gɑ ko n sɑ̃ɑ win dɑm.
23 Yibɛrɛbɑ bɑ ǹ kpɛ̃ bu nùn sɑmbɑ ko.
Tɔn kɔ̃sobu bɑ ǹ kpɛ̃ bu nùn dɑm dɔre.
24 Kɑɑ win yibɛrɛbɑ kpeerɑsiɑ.
Kɑɑ be bɑ nùn tusɑ sɛ̃suku.
25 Wunɛn bɔrɔkiniru kɑ wunɛn tɔn geerɑ ko n wɑ̃ɑ kɑ wi.
Kpɑ ɑ nùn dɑm wɛ̃ kɑ wunɛn yĩsiru.
26 Kɑɑ de win bɑndun dɑm mu tɛriɑ
sɑɑ nim wɔ̃ku ge bɑ mɔ̀ Mɛditerɑnɛn di
sere kɑ dɑɑ te bɑ mɔ̀ Efɑrɑtiɔ.
27 U koo nun sɔ̃ u nɛɛ, ɑ sɑ̃ɑwɑ win tundo kɑ win Yinni.
A sɑ̃ɑwɑ win fɑɑbɑ kowo nge kpee bɑɑ mì u rɑ kuke.
28 Kɑɑ nùn ko wunɛn bii tɔn durɔ gbiikoo.
Kpɑ u n sɑ̃ɑ hɑnduniɑn sinɑmbu kpuron sinɑ boko.
29 Kɑɑ de wunɛn tɔn geeru tɑ n nùn wɑ̃ɑsi.
Kpɑ ɑ kɑ nùn ɑrukɑwɑni bɔke ye yɑ ǹ nɔru mɔ.
30 Kɑɑ de win bibun bweseru tɑ n bɑndu dimɔ sere kɑ bɑɑdommɑɔ.
Kɑɑ de win bɑndu tu dɑm girɑ nge wɔllu.
31 Adɑmɑ win bibun bwese te, tɑ̀ n yinɑ tu wunɛn woodɑbɑ mɛm nɔɔwɑ,
mɑ tɑ wunɛn yiirebu ɑtɑfiiru kuɑ,
32 mɑ tɑ ǹ wunɛn sɔ̃ɔsiru swĩi,
mɑ tɑ ǹ wunɛn gere mɛm nɔɔwɛ,
33 kɑɑ tu sɛɛyɑsiɑwɑ kɑ bokuru ten mɛm nɔɔbu sɑrirun sɔ̃.
34 Adɑmɑ ɑ ǹ yinɑmɔ ɑ tu wunɛn tɔn geeru sɔ̃ɔsi win sɔ̃.
A ǹ nùn tɔnu kɑndu kuɑmmɛ.
35 A ǹ wunɛn ɑrukɑwɑni kusiɑmɔ.
A ǹ mɑɑ wunɛn gere kɔbiɑmɔ.
36 A bɔ̃ruɑ kɑ wunɛn yĩsi dɛɛrɑru mɑ ɑ ǹ Dɑfidi weesu kuɑmmɛ.
37 Kɑɑ de win bibun bweseru tɑ n bɑndu dimɔ sere kɑ bɑɑdommɑɔ.
Kpɑ win bɑndu tɑ n wɑ̃ɑ bɑɑdommɑ nge sɔ̃ɔ.
38 Kpɑ tu tɛ nge suru.
Win seedɑgii wi u wɑ̃ɑ wɔllɔ u sɑ̃ɑ bɔrɔkini.
39 Adɑmɑ wee ɑ sunɔ wi ɑ rɑɑ gɔsɑ deri,
mɑ ɑ kɑ nùn mɔru kuɑ too.
40 A wunɛn ɑrukɑwɑni kusiɑ ye ɑ rɑɑ kɑ wunɛn sɔm kowo bɔkuɑ.
Mɑ ɑ win sinɑ furɔ kɑsɑ kuɑ.
41 A win gbɑ̃rɑnu kpuro kɔsukɑ,
mɑ ɑ win kuku yenu sururɑ.
42 A derɑ be bɑ sɑrɔ mi, bɑ win ɑrumɑni gurɑ.
Mɑ bɑ nùn sekuru doke.
43 A win yibɛrɛbɑ dɑm kɑ̃.
A derɑ bɑ nuku dobu kuɑ.
44 A derɑ win tɑbu yɑ̃nu nu dɑm dwiiyɑ.
A ǹ kɑ nùn yɔ̃re tɑbu sɔɔ.
45 A win bɛɛrɛ kpeesiɑ.
Mɑ ɑ win bɑndu surɑ sere kɑ temɔ.
46 A derɑ u tɔkɔ kuɑ fuuku, mɑ ɑ nùn sekuru doke.
47 Yinni Gusunɔ, sere sɑɑ yerɑ̀ kɑɑ n kukuɑ.
Sere sɑɑ yerɑ̀ wunɛn mɔru yɑ ko n seewɑ nge dɔ̃ɔ yɑrɑ.
48 A yɑɑyo nge mɛ nɛn wɑ̃ɑrun tɔ̃ru tɑ dɛ̃ɛbu nɛ.
A yɑɑyo mɑ tɔnu wi ɑ tɑkɑ kuɑ kpuro u koo rɑ gbi.
49 Wɑrɑ u koo kpĩ u n wɑ̃ɑ u kun gu.
Wɑrɑ u koo kpĩ u tii yɑrɑ gɔribun wɑ̃ɑ yerun di.
50 Yinni, mɑnɑ wunɛn gɑsɔn durom mɛ, mu dɑ.
Mɑnɑ nɔɔ mwɛɛ te ɑ Dɑfidi kuɑ kɑ bɔrɔkiniru tɑ wɑ̃ɑ.
51 Yinni, ɑ mɛɛrio seku te wunɛn tɔmbɑ dimɔ.
A yɑɑyo mɑ nɛnɑ nɑ wunɛn tɔn dɑbi te kpɑre.
52 Yinni Gusunɔ, yibɛrɛbɑ bɑ wunɛn tɔmbu sekuru dokemɔ,
mɑ bɑ wi ɑ gɔsɑ wɔmmɔ mi u dɔɔ kpuro.
53 Yinni Gusunɔ, wunɑ sɑ ko n siɑrɑmɔ sere kɑ bɑɑdommɑɔ.
Ami! Ami!WOMUSUN BƆNU NNƐSE