83
1 Womu ge Asɑfu u kuɑ. U nɛɛ,
2 Gusunɔ, ɑ ku mɑri, ɑ ku mɑɑ wɛ̃rɑ.
3 Domi wee wunɛn yibɛrɛbɑ bɑ seewɑ,
be, be bɑ nun tusɑ bɑ wiru yɔ̃rɑsie.
4 Wee bɑ kɔ̃sɑ wesiɑnɑmɔ wunɛn tɔmbun sɔ̃.
Bɑ nɔɔ tiɑ mɔ̀ be ɑ kɔ̃sun sɔ̃.
5 Bɑ gerumɔ bɑ mɔ̀,
bu nɑ bu sun kpeerɑsiɑ bwesenu kpuron suunu sɔɔn di,
kpɑ bu ku mɑɑ bɛsɛ Isirelibɑn yĩsiru yɑɑyɑ.
6 Wee bɑ wesiɑnɑ,
mɑ be kpuro bɑ nɔɔ tiɑ kuɑ bu kɑ nun wɔri.
7 Beyɑ, Edɔmubɑ kɑ Isimɛɛlibɑ kɑ Mɔɑbubɑ kɑ Agɑribɑ
8 kɑ Gebɑlibɑ kɑ Amɔnibɑ kɑ Amɑlɛkibɑ
kɑ Filisitibɑ kɑ sere Tirigibu.
9 Asirigibun tii bɑ nɑ bɑ kɑ bu nɔɔ tiɑ kuɑ,
bɑ Lɔtun bibun bweseru, Amɔnibɑ kɑ Mɔɑbubɑ nɔmɑ kɑ̃.
10 Yinni Gusunɔ, ɑ bu kuo nge mɛ bɑ Siserɑ kɑ Yɑbini kɑ Mɑdiɑnibɑ kuɑ Kisionin dɑɑrɔ.
11 Bɑ bu kpeerɑsiɑwɑ Eni Doriɔ,
mɑ bɑ ben gonu deri mi, nu tem kɔ̃sisiɑ nge nɑɑ bisu.
12 A de ben sinɑmbu bu gbi nge sinɑm beni,
Orɛbu kɑ Seebu kɑ Sebɑ kɑ Sɑlumunɑ,
13 be, be bɑ rɑɑ gerunɑ bɑ nɛɛ,
bu dɑ bu Gusunɔn ɑrumɑni gurɑ.
14 Yinni Gusunɔ, ɑ bu suo ɑ kɑ doonɑ
nge mɛ woo gunɑ yɑ rɑ kɑ yɑkɑsu doonɛ.
15 A de bu dɔ̃ɔ mwɑɑrɑ nge mɛ dɔ̃ɔ u rɑ dɑ̃ɑ sɔ̃ɔ mwɛ,
ǹ kun mɛ nge mɛ dɔ̃ɔ yɑrɑ yɑ rɑ guunu dɑbiri.
16 A bu nɑɑ giro kɑ guru woo bɔkɔ.
A bu nɑndɑsio kɑ woo gunɑ.
17 Yinni Gusunɔ, ɑ bu sekuru dokeo,
kpɑ bu wɑ bu gɔsirɑmɑ wunɛn mi.
18 A de bu sekuru wɑ,
kpɑ bɑ n nɑnde sere kɑ bɑɑdommɑɔ.
A ben yĩiyɔbu wunɔ, kpɑ bu kɑm ko.
19 Kpɑ bu giɑ mɑ wunɛ turowɑ ɑ sɑ̃ɑ Yinni Wɔrukoo hɑnduniɑ ye sɔɔ.