84
1 Womu ge Koren bibu bɑ wom kowobun wirugii kuɑ. Bɑ gu kuɑwɑ kɑ mɔrɔku. Ge wee.
2 Gusunɔ, wɔllu kɑ tem Yinni,
wunɛn wɑ̃ɑ yeru tɑ mɑn wɛ̃re.
3 Nɑ sɛnde, nɑ diirimɔ n wɑ n kɑ du wunɛn sɑ̃ɑ yerɔ.
Nɛn gɔ̃ru kɑ nɛn wɑsi kpuro nuku dobun kuuki mɔ̀
wunɛ Yinni Gusunɔn sɔ̃, wunɛ wi ɑ wɑ̃ɑ.
4 Nɛn Yinni, nɛn sinɑ boko!
Bɑɑ kɑ gunɔminɔ nu rɑ n wɑ̃ɑ yeru mɔ.
Wɔllu kɑ tem Yinni, ɑ rɑ mɑm de
nu sokunu ko wunɛn yɑ̃ku yerun bɔkuɔ.
5 Doo nɔɔrugibɑ be bɑ wɑ̃ɑ wunɛn sɑ̃ɑ yerɔ
bɑ nun tɔmɑmɔ bɑɑdommɑ.
6 Doo nɔɔrugibɑ be bɑ tɑ̃sɑ wunɛ sɔɔ.
Bɑ rɑ n sɔɔru sɑ̃ɑ bu kɑ sɑ̃ɑru dɑ.
7 Bɑ̀ n sɑrɔ wɔwɑn di ye bɑ mɔ̀ Yĩresu,
ɑ rɑ de bwii yi koorɑwɑ mi,
kpɑ gurɑ yu kɑ ye domɑru nɑɑwɑ.
8 Nge mɛ bɑ dɔɔ bu kɑ Gusunɔ yinnibun Yinni sɑ̃ Siɔniɔ,
nge mɛyɑ ben dɑm mu rɑ n sosimɔ gbɑbu te sɔɔ.
9 Gusunɔ wɔllu kɑ tem Yinni, ɑ mɑn swɑɑ dɑkio.
Gusunɔ Yɑkɔbun Yinni, ɑ nɛn kɑnɑru nɔɔwɔ.
10 Yinni, wunɛ wi ɑ sɑ̃ɑ bɛsɛn tɛrɛru,
ɑ wi ɑ gɔsɑn wuswɑɑ mɛɛrio.
11 Nɛn sɔ̃ɔ teerun wɑ̃ɑru wunɛn sɑ̃ɑ yerɔ,
tɑ nɛn yɑm tukum wɑ̃ɑrun sɔ̃ɔ dɑbi dɑbinu kere.
N burɑm bo nɑ n wɑ̃ɑ wunɛn sɑ̃ɑ yerun kɔnnɔwɔ,
ye ko nɑ n kɑ wɑ̃ɑ diru mi tɔn kɔ̃sobɑ wɑ̃ɑ.
12 Yinni Gusunɔ, ɑ sɑ̃ɑwɑ nge sɔ̃ɔ.
A mɑɑ sɑ̃ɑwɑ nge tɛrɛru.
Wunɑ ɑ rɑ tɔmbu durom kɑ bɛɛrɛ kue.
Be bɑ sĩimɔ gem sɔɔ, ɑ ku rɑ kɑ bu geɑ yinɑri.
13 Gusunɔ, wɔllu kɑ tem Yinni,
doo nɔɔrugiiwɑ wi u nun nɑɑnɛ sɑ̃ɑ.