72
1 Womu ge Sɑlomɔɔ u kuɑ. Ge wee.
Gusunɔ, ɑ nɛ sinɑ boko bwisi kɛ̃ɛyɔ
n kɑ siri nge mɛ ɑ rɑ siri,
2 kpɑ n wunɛn tɔmbu siri gem sɔɔ
bɑɑ be bɑ sɑ̃ɑ sɑ̃ɑrobu.
3 Wunɛn gem sɔ̃, ben gungunu kɑ ben guunu nu koo bu ɑrumɑni wɛ̃.
4 Kon sɑ̃ɑrobu siriɑ kpɑ n bu ben gem wɛ̃,
kpɑ n bwɛ̃ɛbwɛ̃ɛbun bibu fɑɑbɑ ko,
n be bɑ bu dɑm dɔremɔ kɔsuku.
5 Mɛ̀n nɔɔ sɔ̃ɔ kɑ suru yɑrimɔ,
mɛyɑ bɑ ko n mɑɑ nun nɑsie sere kɑ bɑɑdommɑɔ.
6 Yinni Gusunɔ, ɑ de nɛ, sinɑ boko nɑ n ɑrufɑɑni mɔ
nge gurɑ ye yɑ nɛmɔ gbee te bɑ kɔrɔ kuɑ sɔɔ,
ǹ kun mɛ nge nim ɑrufɑɑnigum mɛ mu kokumɔ gberɔ,
7 kpɑ nɛn bɑndu sɔɔ gem mu n wɑ̃ɑ,
kpɑ dukiɑ yu kuurɑ mɛ̀n nɔɔ suru yɑrimɔ.
8 A de nɑ n bɑndu dii
sɑɑ nim wɔ̃ku ge bɑ mɔ̀ Mɛditerɑnɛn di
sere n kɑ girɑri nim wɔ̃ku bɔruguuɔ,
sɑɑ mɑɑ dɑɑ te bɑ mɔ̀ Efɑrɑtin di
sere hɑnduniɑn nɔrɔ.
9 Kpɑ ɑ mɑɑ de be bɑ wɑ̃ɑ gbɑburɔ kpuro
bu nɑ nɛn wuswɑɑɔ bu mɑn yiirɑ,
kpɑ nɛn yibɛrɛbɑ bu tuɑ nɔ.
10 Tɑɑsisi kɑ tem mɛ mu tomɑn sinɑmbu
bɑ koo kɑ mɑn gbere gobi nɑɑwɑ.
Sebɑ kɑ Sɑbɑn sinɑmbu bɑ koo kɑ mɑn kɛ̃nu nɑɑwɑ.
11 Kpɑ sinɑmbu kpuro bu mɑn yiirɑ,
kpɑ bwesenu kpuro nu mɑn sɑ̃.
12 Domi kon sɑ̃ɑro wi u weeweenu mɔ̀ wɔrɑ,
kpɑ n bwɛ̃ɛbwɛ̃ɛ wi u kun goo mɔ somi.
13 Mɛyɑ nɑ kon mɑɑ sɑ̃ɑron wɔnwɔndu wɑ,
kpɑ n bwɛ̃ɛbwɛ̃ɛn wɑ̃ɑru wɔrɑ.
14 Kon bu wɔrɑ be bɑ bu dɑm dɔremɔn min di.
Kon bu yɑkiɑ be bɑ bu nɔni sɔ̃ɔmɔn nɔmɑn di.
Domi ben wɑ̃ɑru tɑ sɑ̃ɑwɑ gɑ̃ɑ girinu nɛn nɔni sɔɔ.
15 Kpɑ nɛ sinɑ bokon wɑ̃ɑru tu dɑkɑɑ dɑ,
kpɑ bu kɑ mɑn Sɑbɑn wurɑ nɑɑwɑ.
Bɑ ko n dɑ mɑn kɑnɑru kue tɔ̃ɔ bɑɑtere
bɑ n mɑn domɑru kuɑmmɛ.
16 Kpɑ ɑlikɑmɑ yu mɑrurɑ tem sɔɔ kɑ guunɔ.
Kpɑ yen winu nu n wom soorɑmɔ nge Libɑnin dɑ̃nu.
Mɛyɑ mɑɑ tɔmbɑ koo mɑrurɑ wusu sɔɔ nge yɑkɑ bii.
17 Kpɑ nɛ sinɑ bokon yĩsiru tɑ n yɑrɑ sere kɑ bɑɑdommɑɔ,
bɑ n tu soku mɛ̀n nɔɔ sɔ̃ɔ yɑrimɔ.
Tɔmbu bɑ̀ n ben winsim domɑru kuɑmmɛ,
bɑ n dɑ nɛn yĩsiru soku,
kpɑ bwesenu kpuro nu nɛɛ,
doo nɔɔrugiiwɑ nɛ sinɑ boko.
18 Su Gusunɔ Isirelibɑn Yinni siɑrɑ.
Domi wi turowɑ u rɑ sɔm mɑɑmɑɑkiginu ko.
19 Su nùn siɑrɑ win yĩsi bɛɛrɛgii ten sɔ̃.
Win yiiko yu sɔ̃ɔsirɑ hɑnduniɑ kpuro sɔɔ.
Ami! Ami!
20 Womu geniwɑ Dɑfidi Isɑin bii u kɑ win kɑnɑnu wiru go.WOMUSUN BƆNU ITASE