73
1 Womu ge Asɑfu u kuɑ. Ge wee.
Geemɑ, Gusunɔ u sɑ̃ɑwɑ tɔn geo Isirelibɑn sɔ̃ kɑ mɑɑ bèn gɔ̃rusu dɛɛre.
2 Nɑ rɑɑ wɔrumɑɑ dɔɔ, n tie fiiko n kɑ tem turi.
3 Domi nɑ rɑɑ kɑ gɑri bɑkɑsu nisinu kuɑ
yèn sɔ̃ nɑ wɑɑmɔ tɔn kɔ̃sobu bɑ nuku dobu mɔ̀.
4 Gɑ̃ɑnu gɑnu kun bu nɔni sɔ̃ɔmɔ ben wɑ̃ɑrun tɔ̃ru kpuro sɔɔ.
Mɛyɑ ben wɑsi yi bwɑ̃ɑ do mɑ yi bɑllimɔ.
5 Bɑ ǹ duniɑn wɑ̃ɑrun wɑhɑlɑ gɑɑ yɛ̃.
Mɛyɑ bɑ ǹ mɑɑ yɛ̃ nɔni swɑ̃ɑ te tɔn be bɑ tie bɑ kɑ wɑ̃ɑ.
6 Bɑ tii suɑbu sebuɑ nge sɑbɑ ye bɑ rɑ sebe wĩirɔ.
Mɑ bɑ dɑɑ bɔɔbɔyɑ sebuɑ nge yɑberu.
7 Ben nuku kɔ̃surun kom mu yɑrimɔ sɑɑ ben nukurun di,
mɑ ben gɔ̃run bwisikunu nu sɔ̃ɔsirɑmɔ tɔɔwɔ.
8 Bɑ rɑ n tɔnu yɛ̃ɛmɔwɑ bɑ n mɔ̀,
bɑ koo nùn dɑm dɔre kɑ nuku kɔ̃suru.
Kpɑ bɑ n tii suɑ gɑri gerumɔ,
9 bɑ n Gusunɔ wɔllu wɔmmɔ.
Mɛyɑ mɑɑ ben yɑrɑ ku rɑ goo deri hɑnduniɑ mi.
10 Yen sɔ̃nɑ tɔmbu kpuro bɑ wurɑmɔ ben mi giɑ.
Mɑ bɑ ben gɑri nɔrumɔ nge nim,
11 bɑ mɔ̀, Gusunɔ kun gɑ̃ɑnu yɛ̃.
Wi, Wɔrukoo, u ǹ yɛ̃ru mɔ.
12 Nge mɛyɑ tɔn kɔ̃sobun wɑ̃ɑrɑ sɑ̃ɑ.
Bɑ ku rɑ n wurure. Bɑ rɑ n ben dukiɑ kuurɑsiɑmɔwɑ.
13 Mɑ nɑ tii sɔ̃ɔwɑ nɑ nɛɛ, ǹ n mɛn nɑ,
kɑm sɔɔrɑ nɑ nɛn gɔ̃ru dɛɛrɑsiɑ,
mɑ nɑ niɑ n kɑ sɔ̃ɔsi mɑ nɑ dɛɛre.
14 Yinni, tɔ̃ru bɑɑtere ɑ rɑ mɑn sɛɛyɑsiewɑ,
kpɑ ɑ mɑn nɔni sɔ̃ bururu bɑɑtere.
15 Nɑ̀ n nɛɛ, kon ko nge tɔn kɔ̃so be,
ko nɑ n kĩ n nɛn bweseru siki te ɑ gɔsɑ.
16 Ye nɑ gɑri yin ɑsɑnsi kɑsu n kɑ yi tubu,
mɑ nɑ wɑ yi mɑn sɛ̃sie too.
17 Adɑmɑ dɔmɑ te nɑ duɑ wunɛ Gusunɔn sɑ̃ɑ yerɔ,
sɑɑ yerɑ nɑ giɑ ye yɑ tɔn kɔ̃sobu mɑrɑ.
18 Geemɑ, Yinni Gusunɔ, ɑ bu surewɑ
swɑɑ yè sɔɔ bɑ koo sɛllɑ,
kpɑ bu wɔrumɑ bu gbi.
19 Kɑɑ de bu kɑm ko mii mii,
kpɑ ben wɑ̃ɑru tu nɔru ko subɑru sɔɔ.
20 Yinni, ɑ rɑ bu kpeerɑsiewɑ,
kpɑ bu ben gɑri duɑri
nge mɛ tɔnu u rɑ dosu duɑri.
21 Ye nɛn gɔ̃ru gɑ sɑnkirɑ,
n sɑ̃ɑwɑ nge gɑ̃ɑnu sɔkɑ nɛn nukurɔ.
22 Mɑ nɑ kuɑ nge gɑri bɔkɔ,
nɑ ǹ gɑ̃ɑnu tubɑ nge gbeeku yɑɑ.
23 Adɑmɑ kɑ mɛ, nɑ wɑ̃ɑ kɑ wunɛ.
Mɑ ɑ mɑn mwɑ kɑ wunɛn nɔm geu.
24 Kɑɑ mɑn kpɑrɑ kɑ wunɛn bwisi.
Yen biru, kɑɑ mɑn mwɑ wunɛn yiiko sɔɔ.
25 Wɑrɑ nɑ mɔ wɔllɔ, wunɛ bɑɑsi.
Mɛyɑ nɑ ǹ mɑɑ goo yĩiyɔ hɑnduniɑ yeni sɔɔ.
26 Nɛn wɑsi kɑ nɛn bwisikunu kpuro koo doonɑ.
Adɑmɑ wunɛ Yinni Gusunɔ, wunɑ ɑ rɑ mɑn dɑm kɛ̃.
A sɑ̃ɑwɑ nɛn dukiɑ sere kɑ bɑɑdommɑɔ.
27 Wee be bɑ kɑ nun tondɑ bɑ gbimɔ.
Mɛyɑ ɑ be bɑ nun deri go.
28 Adɑmɑ nɛ, n mɑn wɛ̃re nɑ n wɑ̃ɑ wunɛn bɔkuɔ Yinni Gusunɔ.
Domi nɑ kuku yee nɑɑnɛgiru wɑ wunɛ sɔɔ.
Kon kpɑrɑ ye ɑ mɑn kuɑ kpuro.