71
1 Yinni Gusunɔ, wunɛn miyɑ nɑ kuku yeru kɑsu.
A ku de n sekuru wɑ bɑɑ fiiko.
2 Wunɛ wi ɑ rɑ siri dee dee,
ɑ mɑn wɔro kpɑ ɑ mɑn fɑɑbɑ ko.
A mɑn swɑɑ dɑkio, kpɑ ɑ mɑn somi.
3 A de ɑ n sɑ̃ɑ nɛn kpee bɑɑ mi kon kuke.
Kpɑ nɑ n wɑ̃ɑ mi bɑɑdommɑ.
Wunɑ ɑ gɔ̃ru doke ɑ mɑn fɑɑbɑ ko.
Domi ɑ sɑ̃ɑwɑ nɛn kuku yeru nge kpee bɑɑ dɑmgiɑ.
4 Gusunɔ nɛn Yinni, ɑ mɑn wɔro tɔn kɔ̃sobun nɔmɑn di
kɑ nuku kɔ̃surugibun nɔmɑn di.
5 Domi wunɛ sɔɔrɑ nɑ yĩiyɔbu mɔ.
Sɑɑ nɛn piiburun di, wunɑ nɑ nɑɑnɛ sɑ̃ɑ.
6 Sɑɑ dɔmɑ tèn di bɑ mɑn mɑrɑ, wunɛ sɔɔrɑ nɛn nɑɑnɛ yɑ wɑ̃ɑ.
Wunɑ ɑ mɑɑ mɑn yɑrɑ nɛn mɛron nukurun di.
Wunɑ ko nɑ n siɑrɑmɔ bɑɑdommɑ.
7 Tɔn dɑbiru tɑ̀ n mɑn wɑ, biti rɑ bu mwɛwɑ.
Adɑmɑ wunɛ, ɑ kuɑ nɛn kuku yee dɑmgiru.
8 Yinni Gusunɔ, ɑ de nɑ n nun siɑrɑmɔ bɑɑdommɑ.
A de nɑ n nun bɛɛrɛ wɛ̃ɛmɔ tɔ̃ɔ bɑɑtere.
9 A ku mɑn deri nɛn tɔkɔru sɔɔ.
A de ɑ n kɑ mɑn wɑ̃ɑ bɑɑ nɑ̀ n dɑm dwiiyɑ.
10 Domi nɛn yibɛrɛbɑ bɑ nɛn gɑri mɔ̀.
Be bɑ kɑsu bu mɑn go, bɑ nɔɔ tiɑ mɔ̀.
11 Bɑ gerumɔ bɑ mɔ̀, wee ɑ mɑn deri.
Bɑ koo mɑn nɑɑ swĩiwɑ bu mwɑ.
Domi nɑ ǹ goo mɔ u mɑn wɔrɑ.
12 Ǹ n mɛn nɑ, Gusunɔ nɛn Yinni, ɑ ku mɑn deri.
A nɑ fuuku ɑ mɑn somi.
13 A de be bɑ kɑsu bu mɑn go mi, bu burisinɑ bu kɑm ko.
A de be bɑ nɛn kɑm kobu kĩ bu sekuru wɑ.
14 Adɑmɑ nɛ, wunɑ nɑ yĩiyɔ.
Nɑ kon nun siɑrɑmɔwɑ nɑ n dɔɔ.
15 Kpɑ n wunɛn gem kɑ wunɛn fɑɑbɑn gɑri kpɑrɑ tɔ̃ɔ bɑɑtere.
Domi yɑ ǹ nɔru mɔ.
16 Yinni Gusunɔ, kon wunɛn sɔm dɑmginun gɑri gere.
Wunɛ turon gem gɑriyɑ kon kpɑrɑ.
17 Gusunɔ, wunɑ ɑ mɑn keu koosiɑ sɑɑ nɛn birun di.
Yen sɔ̃nɑ sere kɑ tɛ̃ nɑ wunɛn sɔm geenun gɑri kpɑrɑmɔ.
18 Gusunɔ, ɑ ku mɑn deri bɑɑ nɑ̀ n tɔkɔ kuɑ,
kpɑ n kpĩ n kɑ tɛ̃n ɑluwɑɑsibɑ
kɑ be bɑ koo rɑ mɑrurɑ wunɛn dɑm gɑri sɔ̃.
19 Wunɛn gem mu wɑ̃ɑwɑ sere kɑ wɔllɔ.
Gusunɔ, gɑ̃ɑ bɑkɑnɑ ɑ kuɑ.
Wɑrɑ u kɑ nun weenɛ.
20 Wunɑ ɑ derɑ sɑ wɑhɑlɑ kɑ nuku sɑnkirɑnu wɑ.
Adɑmɑ kɑɑ nɑ ɑ sun wɑ̃ɑru wɛ̃,
kpɑ ɑ sun yɑrɑ sɑɑ siki wɔrun di.
21 A mɑn nukuru yɛmiɑsio kpɑ ɑ de n nun bɛɛrɛ wɛ̃.
22 Yinni, kon nun tɔmɑ kɑ mɔrɔku,
kpɑ n nun siɑrɑ kɑ womusu wunɛn bɔrɔkinirun sɔ̃.
Kon wunɛn yĩsiru wɔlle suɑ kɑ mɔrɔku,
wunɛ wi ɑ sɑ̃ɑ Isirelibɑn Yinni Dɛɛro.
23 Nɑ̀ n nun siɑrɑmɔ, bɑ koo nɛn nuku dobu wɑ nɛn wuswɑɑn di.
Mɛyɑ mɑɑ nɛn hunde ye ɑ wɔrɑ yɑ koo nun tɑkɑru ko.
24 Mɛyɑ mɑɑ nɛn yɑrɑ yɑ ko n wunɛn gɑri kpɑrɑmɔ sɑɑ bɑɑyere.
Be bɑ kɑsu bu mɑn go, bɑ burisinɑ bɑ sekuru wɑ.