52
1 Dɑfidin womu ge u wom kowobun wirugii kuɑ. 2 U gu kuɑwɑ sɑnɑm mɛ Dɔɛgu Edɔmu u nɑ Sɔɔlun mi u kɑ nùn sɔ̃ mɑ Dɑfidi u dɑ Akimɛlɛkin mi. Womu ge wee.
3 Tɑbu durɔ, mbɑn sɔ̃nɑ ɑ tii siɑrɑmɔ kɔ̃sɑ ye ɑ mɔ̀n sɔ̃.
A n yɛ̃ mɑ Gusunɔn durom mu ko n wɑ̃ɑ sere kɑ bɑɑdommɑɔ.
4 Kɔ̃sɑ tɔnɑwɑ wunɛn yɑrɑ yɑ rɑ n gerumɔ.
Yɑ sɑ̃ɑwɑ nge wobu te tɑ nɔɔ do, murɑfiti wunɛ,
5 ɑ rɑ kɔ̃sɑ kɑ̃ n kere geɑ,
kpɑ ɑ n weesu kĩ n kere gem.
6 Gɑri kɔ̃siyɑ yi rɑ n yibɑ wunɛn nɔɔwɔ
kpɑ ɑ n wɑ̃ɑ keetɑn swɛɛ sɔɔ.
7 Yen sɔ̃, ɑ n yɛ̃ mɑ Gusunɔ u koo nun surɑ sere kɑ bɑɑdommɑɔ.
U koo nun gɑwɑ u yɑrɑ sɑɑ wunɛn kuu bekurugirun di,
kpɑ u nun wunɑ wɑsobun suunu sɔɔn di.
8 Be bɑ Gusunɔ nɑɑnɛ sɑ̃ɑ, bɑ koo nun wɑ,
kpɑ biti bu mwɑ bu nun yɛ̃ɛ bu nɛɛ,
9 durɔ winiwɑ u yinɑ Gusunɔ u nùn kɔ̃su,
mɑ u win nɑɑnɛ doke win dukiɑ sɔɔ,
u tii kɔ̃su win bwisi sɔɔ.
10 Nɛ, nɑ wɑ̃ɑwɑ Yinni Gusunɔn sɑ̃ɑ yerɔ
nge olifin dɑ̃ɑ beku te tɑ kpɑre, tɑ wɛ̃su sɑ̃ɑ.
Nɑ win durom nɑɑnɛ sɑ̃ɑ sere kɑ bɑɑdommɑɔ.
11 Nɑ kon nùn siɑrɑwɑ sere kɑ bɑɑdommɑɔ, domi u kuɑ.
Wi sɔɔrɑ kon nɛn yĩiyɔbu doke be bɑ nùn nɑɑnɛ sɑ̃ɑn suunu sɔɔ
yèn sɔ̃ u sɑ̃ɑ tɔn geo.