51
1-2 Ye Dɑfidi u kɑ Bɑti Sebɑ kpunɑ u kpɑ, Gusunɔn sɔmɔ Nɑtɑni u dɑ win mi. Yen biruwɑ Dɑfidi u wom kowobun wirugii womu geni kuɑ. Ge wee.
3 Gusunɔ, ɑ mɑn durom kuo wunɛn kĩi geerun sɔ̃.
A nɛn torɑru wunɔ wunɛn wɔnwɔndun sɔ̃.
4 A mɑn woburuo sɑ̃ɑ sɑ̃ɑ kpɑ ɑ nɛn kom kɔ̃sum wɔkɑ.
A nɛn durum wunɔ kpɑ n sɑ̃rɑ.
5 Domi nɑ nɛn torɑru wurɑ,
nɛn durum yɑ mɑɑ mɑn bitɑni mɔ̀ bɑɑdommɑ.
6 Wunɛ turowɑ nɑ torɑri,
nɑ mɑɑ kuɑ ye yɑ ǹ nun dore.
Yen sɔ̃, ɑ gem mɔ ye ɑ kɑ mɑn tɑɑrɛ wɛ̃.
Wunɛn siribu bu dɛnde.
7 N wee, kom kɔ̃sum sɔɔrɑ bɑ mɑn mɑrɑ.
Nɛn mɛro wi u mɑɑ nɛn gurɑ suɑ, win tii u sɑ̃ɑwɑ durumgii.
8 Adɑmɑ gemɑ ɑ bikiɑmɔ gɔ̃ruɔ.
Ǹ n mɛn nɑ, ɑ de wunɛn bwisi yi n mɑn wɑ̃ɑsi.
9 A mɑn dɛɛrɑsiɑbun wororu\f |b51:9 wororu|d - Yuubɑ bɑ̀ n dɛɛrɑsiɑbun wororu mɔ̀, bɑ rɑ dɑ̃ɑ kiku ge bɑ mɔ̀ isɔpu wɑsiwɑ dɛɛrɑsiɑbun nim sɔɔ kpɑ bu kɑ gu durumgii yɛ̃kɑ.\F koosio kpɑ n dɛɛrɑ.
A mɑn woburuo kpɑ n bururɑ n wɛ̃su kerɑ.
10 A mɑn nuku dobu wɛ̃ɛyɔ kpɑ nɑ n dɛsinu kɑrɑmɔ.
Bɑɑ mɛ ɑ nɛn gɔmɑ dwiiyɑsiɑ, kon kpɑm yɛ̃ɛri.
11 A ku nɛn durum mɛɛri,
ɑ nɛn kom kɔ̃sum kpuro wɔko.
12 Gusunɔ, ɑ mɑn gɔ̃ru wɛ̃ɛyɔ ge gɑ dɛɛre,
kpɑ ɑ mɑn hunde kpɑɑ wɛ̃ ye yɑ koo yɔ̃rɑ sim sim.
13 A ku mɑn girɑ wunɛn bɔkun di,
ɑ ku mɑɑ mɑn wunɛn Hunde Dɛɛro mwɑɑri.
14 A kpɑm mɑn wunɛn fɑɑbɑn nuku dobu wɛ̃ɛyɔ,
kpɑ kĩi geeru tu nɛn hunde dɑm kɛ̃.
15 Sɑnɑm mɛyɑ kon durumgibu wunɛn swɑɑ sɔ̃ɔsi,
be, be bɑ nun torɑri,
kpɑ bu wurɑmɑ wunɛn mi.
16 Gusunɔ, wunɛ wi ɑ mɑn fɑɑbɑ kuɑ,
ɑ ku mɑɑ mɑn goon yɛm bikiɑ.
Ko nɑ n wunɛn gem mɛ ɑ mɑn wɛ̃ tɑkɑru mɔ̀.
17 Yinni Gusunɔ, ɑ nɛn nɔɔ wukio
kpɑ gu nun siɑrɑ bu nɔ yɑm kpuro.
18 À n dɑɑ yɑ̃ku dɔ̃ɔ mwɑɑrɑrugiru kĩ,
nɑ n dɑɑ nun tu kue.
Adɑmɑ ɑ ǹ yɑ̃kunu kĩ.
19 Yɑ̃ku te tɑ nun wɛ̃re,
teyɑ gɔ̃ru ge gɑ tii kɑwɑ.
Gusunɔ, ɑ ǹ tɔmbu yinɑmɔ
be bɑ tuubɑ kuɑ kɑ tii kɑwɑbu.
20 A de ɑ kɑ Siɔni nɔnu geu mɛɛri kpɑ ɑ ye geɑ kuɑ,
kpɑ ɑ Yerusɑlɛmun gbɑ̃rɑru seeyɑ.
21 Sɑnɑm mɛyɑ kɑɑ yɑ̃kunu mwɑ ni ɑ bikiɑ.
Niyɑ yɑ̃ku dɔ̃ɔ mwɑɑrɑruginu.
Kpɑ bu nɑɑ kinɛnu go wunɛn yɑ̃ku yerɔ.