50
1 Asɑfun womu. Ge wee.
Yinni Gusunɔ u gɑri mɔ̀, u hɑnduniɑgibu soku
be bɑ wɑ̃ɑ sɔ̃ɔ yɑri yerɔ n kɑ dɑ sɔ̃ɔ duu yerɔ.
2 Gusunɔ u kurɑmɑ sɑɑ Siɔni wuu burɔ gen min di kɑ yɑm bururɑm.
3 Bɛsɛn Yinni u wee wi, wi u ku rɑ mɑri.
Win wuswɑɑɔ dɔ̃ɔ boko sɔ̃ruɑ,
mɑ guru woo bɔkɔ gɑ kɑ nùn sikerenɛ.
4 U nɔɔgiru sue wɔllɔ kɑ temɔ u kɑ win tɔmbu siri.
5 U mɔ̀, i mɑn nɛn tɔmbu mɛnnɑmɑ be bɑ mɑn nɑɑnɛ sɑ̃ɑ,
be, be bɑ kɑ mɑn ɑrukɑwɑni bɔkuɑ
mɑ bɑ ye sire kɑ yɑ̃kuru.
6 Wɔllu kpuro tɑ koo win gem gɑri kpɑrɑ.
Domi wiyɑ u sɑ̃ɑ siri kowo.
7 Yinni Gusunɔ u nɛɛ,
i swɑɑ dɑkio bɛɛ nɛn tɔmbu Isirelibɑ.
Nɑ kon bɛɛ sɔ̃ mɑ nɛnɑ nɑ sɑ̃ɑ bɛɛn Yinni.
8 N ǹ bɛɛn yɑ̃kunun sɔ̃ nɑ bɛɛ gerusimɔ.
Domi nɑ rɑ bɛɛn yɑ̃ku dɔ̃ɔ mwɑɑrɑruginu mwɛ bɑɑdommɑ.
9 Nɑ ǹ mɑɑ nɑɑ kinɛnu mwɑɑmɔ bɛɛn yɛnuɔ,
ǹ kun mɛ boo kinɛnu bɛɛn boo gɔ̃sɔ.
10 Domi nɛnɑ nɑ gbeeku yɛɛ kpuro mɔ
kɑ yi yi wɑ̃ɑ guunɔ dɑbi dɑbinu.
11 Nɑ gunɔ si su wɑ̃ɑ guunɔ kpuro yɛ̃
kɑ mɑɑ yɛɛ yi yi wɑ̃ɑ yɑkɑsɔ.
Yi mɑɑ sɑ̃ɑwɑ nɛgii.
12 Ǹ n gɔ̃ɔrun nɑ tɑ mɑn mɔ̀, n ǹ wunɛ kon sɔ̃.
Domi nɛnɑ nɑ hɑnduniɑ mɔ kɑ ye yɑ wɑ̃ɑ ye sɔɔ kpuro.
13 I tɑmɑɑ kon nɑɑ kinɛnun yɑɑ temwɑ?
I tɑmɑɑ boo kinɛnun yɛmɑ kon nɔ?
14 Ye n burɑm bo, yerɑ i nɛ Gusunɔ bɛɛn Yinni siɑrɑ.
Kpɑ i bɛɛn nɔɔ mwɛɛnu yibiɑ ni i mɑn kuɑ.
15 A mɑn sokuo sɑnɑm mɛ ɑ nuki sɑnkire.
Sɑɑ ye sɔɔ, kon nun wurɑri, kpɑ ɑ mɑn bɛɛrɛ wɛ̃.
16 Adɑmɑ Gusunɔ u kɔ̃sɑn kowo sɔ̃ɔmɔ u mɔ̀,
mbɑn sɔ̃nɑ ɑ nɛn woodɑbɑ siɑmɔ mɑ ɑ nɛn ɑrukɑwɑnin gɑri gerumɔ,
17 wunɛ wi ɑ ku rɑ sɔ̃ɔsiru kɑ̃,
mɑ ɑ nɛn gere ɑtɑfiiru sɑ̃ɑ.
18 À n gbɛnɔ wɑ, ɑ rɑ kɑ nùn nɔɔ tiɑ ko,
ɑ rɑ n wɑ̃ɑ kɑ sɑkɑrɑ kowobu.
19 Wunɛn nɔɔ gɑ rɑ n kɔ̃sɑ yibɑwɑ,
wunɛn yɑrɑ yɑ weesu sekumɔ.
20 Mi ɑ sinɑ kpuro, wunɛn winsimwɑ ɑ rɑ n wĩimɔ,
kpɑ ɑ n wunɛn mɛro bisin kɔ̃sɑ gerumɔ.
21 Yenibɑ kpurowɑ ɑ kuɑ, mɑ nɑ mɑɑri.
Domi ɑ tɑmɑɑ nɑ sɑ̃ɑwɑ nge wunɛ.
Adɑmɑ kon nun tɑɑrɛ wɛ̃
kpɑ n kpuro terɑsiɑ wunɛn wuswɑɑɔ.
22 I lɑɑkɑri koowo, kpɑ i swɑɑ dɑki i nɔ
bɛɛ be i nɛ Gusunɔ duɑri.
Mɑ n kun mɛ, kon bɛɛ sɛ̃re n yɑɑku.
Goo kun mɑɑ kpɛ̃ u bɛɛ wɔrɑ.
23 Wìn yɑ̃kuru tɑ sɑ̃ɑ siɑrɑbu,
yɛ̃rowɑ u mɑn bɛɛrɛ wɛ̃ɛmɔ.
Wi u mɑɑ win tii nɛni dee dee
yɛ̃rowɑ u koo nɛn fɑɑbɑ wɑ.