49
1 Womu ge Koren bibu bɑ wom kowobun wirugii kuɑ. Ge wee.
2 Bɛɛ bwesenu kpuro, i swɑɑ dɑkio i nɔ.
Bɛɛ hɑnduniɑgibu, i swɑɑ tem kpĩiyɔ i nɔ.
3 Dɑmgibu kɑ bwɛ̃ɛbwɛ̃ɛbu, i swɑɑ dɑkio i nɔ.
Sɑ̃ɑrobu kɑ gobigibu, i swɑɑ tem kpĩiyɔ i nɔ.
4 Nɑ kon gɑri bwisigii gere.
Nɛn bwisikunu nu mɑɑ ɑsɑnsi mɔ.
5 Nɑ bwisigibun mɔnnu swɑɑ dɑki,
nɑ kon mɑɑ bɛɛ nu tubusiɑ kɑ mɔrɔku.
6 Mbɑn sɔ̃nɑ kon bɛrum ko wɑhɑlɑn sɑɑ sɔɔ.
Mbɑn sɔ̃nɑ kon bɛrum ko sɑnɑm mɛ nɛn yibɛrɛbɑ bɑ mɑn sikerenɛ nuku kɔ̃surun sɔ̃.
7 Bɑ ben dukiɑ nɑɑnɛ sɑ̃ɑ.
Mɑ bɑ tii sue dukiɑ yen kpɑ̃ɑrun sɔ̃.
8 Adɑmɑ ben goo kun kpɛ̃ u win winsim hunde yɑkiɑ,
kpɑ u Gusunɔ yen kɔsiɑru wɛ̃.
9 Domi hunden yɑkiɑbu gɑ̃ɑ bɑkɑnɑ, bu ǹ nɔru mɔ.
Yen sɔ̃nɑ n ǹ koorɔ bu kpĩ bu ye ko,
10 n ǹ mɑɑ koorɔ bɑ n wɑ̃ɑ sere kɑ bɑɑdommɑɔ.
Bɑ ǹ kpɛ̃ bu gɔɔ yinɑ.
11 Domi sɑ wɑɑmɔ mɑ bwisigibu kɑ gɑri bɑkɑsu kpurowɑ bɑ gbimɔ.
Mɑ bɑ ben dukiɑ derimɔ gɑbu bu gurɑ.
12 Mɛyɑ be bɑ yĩsiru yɑrɑ bɑ rɑ n bwisikɑ
mɑ ben yɛnusu ko n wɑ̃ɑwɑ sere kɑ bɑɑdommɑɔ.
Ben wɑ̃ɑ yenu kun mɑɑ kɑm mɔ̀.
13 Adɑmɑ tɔnu wi u bɛɛrɛ mɔ u ku rɑ tɛ.
U sɑ̃ɑwɑ nge yɛɛ yi bɑ rɑ sɑkiri.
14 Nge mɛyɑ ben ɑre sɑ̃ɑ,
be kɑ be bɑ bu swĩi bɑ ben gɑri swɑɑ dɑki.
15 Bɑ rɑ bu surewɑ gɔriɔ nge yɑ̃ɑ gɔ̃ɔ ge bɑ sure wɔru sɔɔ,
kpɑ gɔɔ u bu di.
N sosi, tɔn dɛɛrobɑ koo bu tɑɑku, kpɑ ben bɛɛrɛ yu kpe,
kpɑ gɔribun wɑ̃ɑ yeru tu ko ben yɛnu.
16 Adɑmɑ Gusunɔ u koo nɛn hunde wɔrɑ sɑɑ gɔribun wɑ̃ɑ yerun di.
Domi u koo mɑn kɔ̃su.
17 Yen sɔ̃, ɑ ku nɑndɑ tɔnu ù n dukiɑ gurɑmɔ,
mɑ win yɛnun ɑrumɑni yɑ sosimɔ.
18 A n yɛ̃ mɑ u ǹ kɑ yen gɑɑ dɔɔ gɔriɔ,
bɑ ǹ mɑɑ kɑ nùn yen gɑɑ sikumɔ.
19 U ko n nuku dobu mɔ win wɑ̃ɑru sɔɔ,
kpɑ bɑ n nùn siɑrɑmɔ nuku doo bi u mɔ̀n sɔ̃.
20 Adɑmɑ yen kɔkɔrɔ, u koo win bɑɑbɑbɑ deemɑwɑ gɔriɔ.
Be, bɑ ǹ mɑɑ hɑnduniɑn yɑm bururɑm wɑsi.
21 Tɔnu wi bɑ bɛɛrɛ wɛ̃ɛmɔ, mɑ u ǹ bwisi mɔ,
u sɑ̃ɑwɑ nge yɛɛ yi bɑ mwɛɛrimɑ bu sɑkiri.