48
1 Womu ge Koren bibu bɑ kuɑ. Ge wee.
2 Yinni Gusunɔ, ɑ kpɑ̃,
yen sɔ̃nɑ n weenɛ bu nun tɔmɑ bɑɑmɑ,
wunɛn wuuɔ kɑ wunɛn guu dɛɛrɑ ten wɔllɔ te bɑ mɔ̀ Siɔni.
3 Tɑ yɔ̃ burɑm burɑm tɔnɑ.
Wi u tu mɛɛrɑ kpɑ u n nuku dobu mɔ̀ ten burɑm sɔ̃.
Guu ten sɔ̃ɔ yɛ̃sɑn nɔm geu giɑ, sinɑ bokon sinɑ kpɑɑrɑ mi.
4 Yinni Gusunɔ, wunɛn sinɑ kpɑɑru sɔɔ,
ɑ rɑ sun sɔ̃ɔsiwɑ mɑ ɑ sɑ̃ɑ bɛsɛn kuku yeru kɑ gem.
5 Domi wee, sinɑmbu bɑ mɛnnɑ,
bɑ nɔɔ tiɑ kuɑ bu kɑ Siɔni wɔri.
6-7 Adɑmɑ ye bɑ nun wɑ,
miyɑ bɛrum bu mwɑ, bɑ wururɑ nge tɔn kurɔ
wi mɑrubun wɑhɑlɑ yɑ nɛnuɑ sɑnɑm mɛ u yiire.
Yerɑ bɑ nɑndɑ bɑ duki suɑ.
8 Bɑ fukurɑ bɑ wɔrukɑ nge goo nimkuu ge sɔ̃ɔ yɑri yerun woo gɑ fukɑ.
9 Ye sɑ nɔɔmɔ bɑ gerumɔ, sɑ ye wɑ Gusunɔ, wɔllu kɑ tem Yinnin wuuɔ.
Sɑ ye wɑ Gusunɔ bɛsɛn Yinnin wuuɔ.
Wiyɑ u koo de wuu ge, gɑ n wɑ̃ɑ sere kɑ bɑɑdommɑɔ.
10 Gusunɔ, sɑ wunɛn durom bwisikunu mɔ̀ wunɛn sɑ̃ɑ yee ten mi.
11 Nge mɛ ɑ yĩsiru yɑrɑ,
nge mɛyɑ bɑ koo nun tɔmɑ hɑnduniɑn goonu nnɛ sɔɔ.
Domi ɑ rɑ tɔmbu kpɑre gem sɔɔ.
12 Be bɑ wɑ̃ɑ Siɔnin guurɔ, bɑ nuku dobu mɔ̀.
Yudɑn tɔmbu bɑ yɛ̃ɛrimɔ wunɛn siri bi ɑ kuɑn sɔ̃.
13 I sĩiyɔ i kɑ Siɔni sikerenɑ.
I yen kɔ̃su yenu gɑrio.
14 I yen gbɑ̃rɑ te mɛɛrio,
kpɑ i yen sinɑ kpɑɑnu mɛɛri
i rɑ kɑ bɛɛn bibu yen fɑɑgi kuɑ,
15 i nɛɛ, Yinni Gusunɔwɑ u sɑ̃ɑ bɛsɛn Yinni
sere kɑ bɑɑdommɑɔ.
Wiyɑ u koo mɑɑ sun kpɑrɑ sere kɑ bɛsɛn gɔɔn tɔ̃rɔ.