39
1 Dɑfidin womu ge u Yedutum, wom kowobun wirugii kuɑ. U nɛɛ,
2 nɑ rɑɑ nɛɛ, kon nɛn sɑnu sɑnusu lɑɑkɑri ko
kpɑ n ku durum ko nɛn gɑri gerubu sɔɔ.
Kon nɛn nɔɔ kpĩ sɑnɑm mɛ nuku kɔ̃surugii wɑ̃ɑ nɛn bɔkuɔ.
3 Nɑ rɑɑ mɑɑri, nɑ ǹ gɑ̃ɑnu geruɑ,
mɑ nɑ deemɑ n kuɑ kɑm,
domi nɛn nɔni swɑ̃ɑru tɑ sosiwɑ.
4 Nɛn lɑɑkɑri yɑ seewɑ.
Ye nɑ bwisikumɔ yɑ mɑn nɛni nge dɔ̃ɔ,
mɑ nɑ geruɑ nɑ nɛɛ,
5 Yinni Gusunɔ, ɑ mɑn nɛn wɑ̃ɑrun sɑkɑ sɔ̃ɔsio
kpɑ nɑ n yɛ̃ nge mɛ nɑ ǹ dɑm mɔ.
6 N wee ɑ nɛn tɔ̃ru yĩirɑ kɑ wunɛn nɔmɑn yɑsum,
mɑ nɛn wɑ̃ɑrun sɑnɑm kun gɑ̃ɑnu turɑ wunɛn nɔni sɔɔ.
Kɑ geemɑ tɔnu bɑɑwure koo doonɑ nge woo tiɑ,
7 ǹ kun mɛ nge tiro.
Ye u mɔ̀ kpuro kɑmɑ.
U ɑrumɑni mɛnnɑmɔ, u ǹ yɛ̃ wɑrɑ koo ye di.
8 Tɛ̃ Yinni, mbɑ nɑ mɑɑ mɑrɑ.
Nɛn yĩiyɔbu wɑ̃ɑ wunɛ sɔɔ.
9 A mɑn yɑkio nɛn durum kpuron di.
A ku de gɑri bɑkɑsu su n mɑn yɑɑkoru mɔ̀.
10 Kon mɑri, nɑ ǹ gɑri gerumɔ,
domi wunɑ ɑ derɑ yɑ koorɑ mɛ.
11 A ku mɑɑ mɑn wɑhɑlɑ ko.
Nɑ wɑsikirɑmɔ wunɛn nɔm gɛrɑn sɔ̃.
12 A rɑ tɔnu gerusi
kpɑ ɑ nùn sɛɛyɑsiɑ win torɑnun sɔ̃.
Ye tɔnu u kĩ, yerɑ ɑ rɑ di nge kɔkɔbu.
Geemɑ, tɔnu bɑɑwure u koo doonɑwɑ nge woo tiɑ.
13 Yinni Gusunɔ, ɑ nɛn kɑnɑru nɔɔwɔ,
kpɑ ɑ nɛn sokuru swɑɑ dɑki.
A ku nɛn wuri ɑtɑfiiru ko,
domi nɑ sɑ̃ɑwɑ sɔɔ wunɛn mi nge nɛn sikɑdobɑ kpuro.
14 A mɑn derio sɛ̃ɛ,
kpɑ n wom wɑ n sere sɑriru ko.