40
(I mɑɑ mɛɛrio nɑɑsu 14-18, 70:2-6)
1 Dɑfidin womu ge u wom kowobun wirugii kuɑ. U nɛɛ,
2 nɑ nɛn yĩiyɔbu doke Yinni Gusunɔn mi.
Mɑ u mɑn sĩiremɑ u nɛn nɔɔ swɑɑ dɑki.
3 U mɑn gɑwɑ u yɑrɑ sɑɑ kɑm kobun wɔrun di,
mi pɔtɔkɔ wɑ̃ɑ.
U nɛn nɑɑsu sɔndi kpee sɑɑrɑ wɔllɔ,
kpɑ n kɑ yɔ̃rɑ dim dim.
4 Gusunɔ u derɑ nɑ womu kpɔɔ mɔ̀
ge nɑ kɑ nùn siɑrɑmɔ.
Tɔn dɑbiru tɑ nuɑ mɑ tɑ bɛrum kuɑ,
mɑ tɑ ten nɑɑnɛ doke Yinni Gusunɔ sɔɔ.
5 Doo nɔɔrugiiwɑ wi u Yinni Gusunɔ nɑɑnɛ sɑ̃ɑ,
wi u ku rɑ gɛre u tii suobu kɑ wee kowobu swĩi.
6 Gusunɔ nɛn Yinni, wunɛn sɔm geenu
kɑ wunɛn himbɑ ye ɑ sun kuɑ yɑ dɑbi.
Gusunɔ, ɑ kpɑ̃, ɑ ǹ sɑɑrɑ mɔ.
Nɑ kĩ n ye kpuro kpɑrɑ n tɔmbu nɔɔsiɑ.
Adɑmɑ yen geerɑ kpɑ̃ sere nɑ ǹ kpɛ̃ n ye sɑɑri.
7 A ǹ yɑ̃kuru kĩ, ǹ kun mɛ kɛ̃ru.
A ǹ yɑ̃ku dɔ̃ɔ mwɑɑrɑrugiru bikie,
ǹ kun mɛ torɑrugiru.
Adɑmɑ ɑ nɛn swɑsu kɔriɑ.
8 Mɑ nɑ nɛɛ, nɛ wee,
nge mɛ bɑ nɛn gɑri yoruɑ woodɑn tireru sɔɔ.
9 Gusunɔ nɛn Yinni, nɑ kĩ n wunɛn kĩru ko.
Wunɛn woodɑ yɑ wɑ̃ɑ nɛn gɔ̃ruɔ.
10 Tɔn wɔrun suunu sɔɔ,
nɑ rɑ wunɛn fɑɑbɑn lɑbɑɑri geɑ kpɑre.
Yinni Gusunɔ, ɑ yɛ̃ mɑ nɑ ku rɑ nɛn nɔɔ mɑri.
11 Nɑ ǹ wunɛn fɑɑbɑn gɑri beruɑ nɛn gɔ̃ruɔ.
Nɑ wunɛn nɑɑnɛ kɑ wunɛn somiru tɔmbu nɔɔsiɑ.
Nɑ tɔn wɔru gunɑ wunɛn tɔn geeru
kɑ wunɛn bɔrɔkiniru sɔ̃ɔsi.
12 Yinni Gusunɔ, ɑ ku de n wunɛn wɔnwɔndu biɑ.
A de wunɛn tɔn geeru kɑ wunɛn bɔrɔkiniru
tu mɑn kɔ̃su sɑɑ kpuro sɔɔ.
13 Domi kɔ̃sɑ ye yɑ mɑn sikerenɛ yɑ ǹ gɑrirɔ.
Nɛn kom kɔ̃sum kpuro mɑn girɑri,
mu ǹ wɑɑbu wɑ̃.
Mu nɛn wirun seri dɑbiru kere.
Nɑ mwiɑ kpɑnɑ.
14 Yinni Gusunɔ, ɑ mɑn wɔro,
ɑ nɑ fuuku ɑ mɑn fɑɑbɑ ko.
15 A de be bɑ kɑsu bu mɑn hunde wunɑ
bu seku bɑkɑru wɑ.
A de be bɑ nuku dobu mɔ nɛn wɑhɑlɑn sɔ̃
bu biru wurɑ kpɑ bu sekuru di.
16 A de be bɑ mɑn yɑɑkoru mɔ̀
bɑ n wɑ̃ɑ dɛsirun biti sɔɔ.
17 Adɑmɑ ɑ de be bɑ nun kɑsu
bɑ n nuku dobu mɔ.
Kpɑ be bɑ wunɛn fɑɑbɑ wurɑ
bɑ n yɛ̃ɛrimɔ wunɛn sɔ̃.
Kpɑ bɑ n gerumɔ mɑ Yinni Gusunɔwɑ kpɑ̃ɑru bo.
18 Adɑmɑ nɛ sɑ̃ɑrowɑ, nɑ ǹ gɑ̃ɑnu mɔ.
Kɑ mɛ, Yinni u mɑn yɑɑye.
Nɛn Yinni, wunɛ wi ɑ rɑ mɑn somi kpɑ ɑ mɑn wɔrɑ,
ɑ ku tɛ.