38
1 Dɑfidin womu ge u kuɑ Gusunɔ u kɑ nùn yɑɑyɑ.
2 Yinni Gusunɔ, ɑ ku mɑn sɛɛyɑsiɑ wunɛn mɔru sɔɔ.
A ku mɑn so sɑnɑm mɛ ɑ mɔru bɛsire.
3 Domi wunɛn sɛ̃ɛnu nu mɑn girɑri,
mɑ wunɛn nɔmu gɑ mɑn so gɑ surɑ.
4 Wunɛn mɔrun sɑɑbu, nɛn wɑsin gɑm sɑri mi n bwɑ̃ɑ do.
Nɛn durum sɑɑbu nɑ ǹ mɑɑ dɑm gɑm mɔ.
5 Domi nɛn torɑnu kpɛ̃ɑ sere nu mɑn gunum kerɑ.
Nu sɑ̃ɑ nge sɔmu bɑkɑnu ni nu mɑn bunum kere.
6 Nɛn booboosu kɔ̃sɑ sere su numiɑ nɛn gɑri bɑkɑrun sɔ̃.
7 Nɑ dɛbɑrɑ, nɑ wɑsirɑ sere nɑ ǹ mɑɑ dɑm mɔ.
Bɑɑdommɑ, nɑ rɑ n sĩimɔwɑ kɑ nuku sɑnkirɑnu.
8 Domi bɑrɑrɑ nɛn wɑsi kpuro mwɑ.
Yin gɑm mɑɑ sɑri mi n bwɑ̃ɑ do.
9 Nɑ kɔsikirɑwɑ muku muku, nɑ ǹ mɑɑ dɑm gɑm mɔ.
Nɛn gɔ̃ru gɑ burisinɛ sere nɑ weeweenu mɔ̀.
10 Yinni, ye nɑ kĩ kpuro, wunɑ ɑ yɛ̃.
Nɛn weeweenu kun mɑɑ nun berue.
11 Nɛn gɔ̃ru gɑ ǹ sɔ̃ sɛ̃ɛ, nɛn dɑm mɑn doonɑrimɔ.
Wee nɛn nɔni kun mɑɑ wɑ̃ɑru tere.
12 Nɛn kpɑɑsibu kɑ be bɑ mɑn yɛ̃ kpuro
bɑ mɑn duki suurimɔ nɛn bɑrɑrun sɔ̃.
Mɑ be bɑ mɑɑ wɑ̃ɑ nɛn turuku,
bɑ tii mɛnɑ nɛnɛm.
13 Be bɑ kɑsu bu mɑn go,
bɑ mɑn yɛ̃ri bɛriɑmmɛ bɑɑdommɑ.
Be bɑ nɛn kɔ̃sɑ kɑsu, bɑ mɑn kɔ̃sɑ siemɔ,
bɑ kɑsu bu mɑn nɔni wɔ̃ke.
14 Adɑmɑ nɛ, nɑ mɑɑriwɑ piti nge soso
wi u kun gɑ̃ɑnu nɔɔmɔ,
u ǹ mɑɑ gɑ̃ɑnu gerumɔ.
15 Mɛyɑ nɑ sɑ̃ɑ nge soso.
Nɑ ǹ bu gɑ̃ɑnu wisɑ.
16 Yinni Gusunɔ, wunɛ sɔɔrɑ nɛn yĩiyɔbu wɑ̃ɑ.
Gusunɔ nɛn Yinni, ɑ de ɑ mɑn wisi.
17 A ku de bu nuku dobu ko nɛn sɔ̃,
kpɑ bu mɑn seesi sɑnɑm mɛ nɑ sokurɑmɔ.
18 Wee nɑ wɔrumɑɑ dɔɔ,
mɑ nɛn wɑhɑlɑ yɑ mɑn wɑ̃ɑsi.
19 Nɑ nɛn torɑnu tuubɑ mɔ̀.
Torɑ ni, nu mɑn bɛrum mɔ̀.
20 Wee nɛn yibɛrɛbɑ bɑ bwɑ̃ɑ do,
bɑ mɑɑ dɑm mɔ.
Be bɑ mɑn tusɑ kɑm sɔɔ, bɑ dɑbi.
21 Kɔ̃sɑ bɑ mɑn kɔsiemɔ, ye nɑ bu geɑ kuɑ.
Bɑ nɛn kɔ̃sɑ kɑsu yèn sɔ̃ nɑ rɑ n geɑ mɔ̀.
22 Yinni Gusunɔ, ɑ ku mɑn deri.
Nɛn Yinni, ɑ ku kɑ mɑn tondɑ.
23 A nɑ fuuku ɑ mɑn yɑkiɑ,
wunɑ ɑ sɑ̃ɑ nɛn fɑɑbɑ kowo.