37
1 Dɑfidin womu.
A ku tii nɔwiɑ ko tɔn kɔ̃sobun sɔ̃.
A ku kɑ kɔ̃sɑn kowobu kinɛnu ko.
2 Domi bɑ rɑ mundewɑ nge yɑkɑ gbebusu,
kpɑ bu yɑndɑ nge yɑkɑ bekusu.
3 A n Yinni Gusunɔ nɑɑnɛ sɑ̃ɑ kpɑ ɑ n geɑ mɔ̀.
Nge mɛyɑ kɑɑ n kɑ wɑ̃ɑ yeru mɔ tem mɛ sɔɔ,
kpɑ ɑ n bɔri yɛndu mɔ.
4 A wunɛn nuku dobu kɑsuo Yinni Gusunɔn mi.
U koo mɑɑ nun wɛ̃ ye wunɛn gɔ̃ru gɑ kĩ.
5 A Yinni Gusunɔ wunɛn wɑ̃ɑru nɔmu sɔndio,
ɑ n nùn nɑɑnɛ sɑ̃ɑ.
Wiyɑ u koo nun kpuro wunɑnɑ.
6 U koo de wunɛn gem mu sɔ̃ɔsirɑ
nge sɔ̃ɔ wii wɔllun sɔ̃ɔ.
7 Wi u kpĩɑ u kɔ̃sɑ kuɑ ye u gɔ̃ru doke,
ɑ ku tii nɔwiɑ ko win sɔ̃.
A n mɑɑri kpɑ ɑ n Yinni Gusunɔ swɑɑ dɑki.
8 A mɔru derio, ɑ nuku gbisibu yinɔ,
ɑ ku tii nɔwiɑ ko.
Ye kpurowɑ yɑ koo rɑ nun kɔ̃sɑ koosiɑ.
9 Domi bɑ koo tɔn kɔ̃sobu kpeerɑsiɑ,
ɑdɑmɑ be bɑ Yinni Gusunɔ nɑɑnɛ sɑ̃ɑ,
berɑ bɑ ko n tem mɛ mɔ.
10 N tie fiiko ye tɔn kɔ̃sobɑ kun ko n mɑɑ kɑ wɑ̃ɑ.
Bɑɑ ɑ̀ n mɛɛrɑ mi bɑ rɑɑ wɑ̃ɑ, ɑ ǹ mɑɑ bu wɑsi.
11 Adɑmɑ be bɑ tii yɛ̃, bɑ koo tem mɛ tubi di,
kpɑ bɑ n yɛ̃ɛrimɔ gem gem ɑlɑfiɑ sɔɔ.
12 Tɔn kɔ̃sobɑ gemgibu bwisiku kɔ̃sunu koosimɔ,
mɑ bɑ bu wiru diirisimɔ.
13 Yinni u tɔn kɔ̃so be yɛ̃ɛmɔ,
u yɛ̃ mɑ tɔ̃rɑ bu sisie.
14 Tɔn kɔ̃sobɑ ben tɑkobi womɑmɔ,
mɑ bɑ ben tɛnnu bɛrimɔ
bu kɑ sɑ̃ɑrobu kɑ wɔnwɔndobu hunde wunɑ,
kpɑ bu be bɑ geɑ mɔ̀ go.
15 Adɑmɑ ben tɑkobi be, bɑ koo duwɑ ben tiin toronɔ,
kpɑ ben tɛnnu nu bɔɔkirɑ.
16 Gɑ̃ɑ piimii ni gemgii u mɔ,
nu tɔn kɔ̃so dɑbinun dukiɑ kere.
17 Domi bɑ koo tɔn kɔ̃sobun dɑm kpeerɑsiɑ,
ɑdɑmɑ Yinni Gusunɔ u yɔ̃ gemgibun biruɔ.
18 Yinni Gusunɔ u yɛ̃
ye n koo tɑɑrɛ sɑrirugibu deemɑ ben wɑ̃ɑru sɔɔ.
Ben yɛnu gɑ ǹ bɑnsu mɔ̀.
19 Bɑ ǹ sekuru wɑsi wɑhɑlɑn sɑɑ sɔɔ.
Bɑ ko bɑ n mɑɑ deburu mɔ gɔ̃ɔrun sɑnɑm.
20 Adɑmɑ tɔn kɔ̃sobɑ koo kɑm ko.
Yinni Gusunɔn yibɛrɛbɑ bɑ kɑ yɑkɑsun wɛ̃su weenɛ.
Bɑ koo yɑrinɑwɑ nge dɔ̃ɔ wiisu.
21 Tɔn kɔ̃sobu bɑ̀ n bɔkurɑ, bɑ ku rɑ wesie.
Adɑmɑ gemgii u rɑ kɛ̃ kɑ nuku tiɑ.
22 Be Yinni Gusunɔ u domɑru kuɑ,
bɑ ko n tem mɛ mɔ,
ɑdɑmɑ be u bɔ̃rusi, beyɑ bɑ koo kpeerɑsiɑ.
23 Yinni Gusunɔ u rɑ tɔn geo kpɑre win sɑnum sɔɔ.
Yɛ̃ron swɑɑ rɑ nùn wɛ̃re.
24 Ù n sokurɑ u wɔrumɑ, u rɑ sewɑ,
domi Yinni Gusunɔ u win nɔmɑ nɛni.
25 Nɑ rɑɑ sɑ̃ɑ bii, tɛ̃ nɑ bukurɑ.
Nɑ ǹ mɑɑ wɑɑre Gusunɔ u gemgii deri,
ǹ kun mɛ win bibu bu bɑrɑ ko bu kɑ di.
26 Bɑɑdommɑ u wɛ̃ɛmɔ kɑ nuku tiɑ.
U ǹ be bɑ bɔkurɑmɔ yinɑrimɔ.
Win bibu bɑ rɑ mɑɑ gɑbu ɑrufɑɑni kue.
27 A kɔ̃sɑ derio kpɑ ɑ geɑ ko,
kpɑ wunɛn bibun bweseru tɑ n tem mɛ mɔ kɑ bɑɑdommɑɔ.
28 Yinni Gusunɔ u gem kĩ.
U ǹ win tɔmbu derimɔ, u rɑ n bu kɔ̃su.
Adɑmɑ bɑ koo tɔn kɔ̃sobun bweseru kpeerɑsiɑ.
29 Gemgibɑ ko n tem mɛ mɔ,
kpɑ bɑ n wɑ̃ɑ mi, kɑ bɑɑdommɑɔ.
30 Gemgiin nɔɔ, gɑri bwisigiiyɑ gɑ rɑ yɑre.
Win yɑrɑ, gemɑ yɑ rɑ mɑɑ gere.
31 Gusunɔn woodɑ yɑ rɑ n wɑ̃ɑ win gɔ̃ruɔ.
Win nɑɑsu kun mɑɑ sokurɑmɔ.
32 Tɔn kɔ̃so u rɑ n gemgii sɑ̃kiriɑmmɛwɑ,
kpɑ u n swɑɑ kɑsu u kɑ nùn go.
33 Adɑmɑ Yinni Gusunɔ kun derimɔ u nùn nɔmɑ turi.
U ǹ mɑɑ nùn tɑɑrɛ wɛ̃ɛmɔ siribun sɑnɑm.
34 A n Yinni Gusunɔ yĩiyɔ kpɑ ɑ n win swɑɑ swĩi.
U koo nun wɔlle suɑ kpɑ ɑ n kɑ tem mɛ mɔ.
Kɑɑ wɑ tɔn kɔ̃sobɑ kpeerɔ.
35 Nɑ tɔn kɔ̃sobu wɑ kɑ ben dɑm kpuro,
bɑ yɛki nge dɑ̃ɑ kɛrigiru te tɑ kpɑre.
36 Adɑmɑ ben bɑɑ yɑ doonɑ, wee bɑ ǹ mɑɑ wɑ̃ɑ.
Nɑ bu kɑsu, ɑdɑmɑ bɑ ǹ wɑɑrɔ.
37 A tɑɑrɛ sɑrirugii mɛɛrio
kpɑ ɑ n nùn lɑsɑbu sɑ̃ɑ.
Domi wi u rɑ bɔri yɛndu kɑ̃n bweserɑ kun kpeemɔ.
38 Adɑmɑ mɛm nɔɔ sɑrirugibɑ koo kɑm kowɑ kpuro,
kpɑ tɔn kɔ̃sobun bweseru tu kpeerɑ.
39 Yinni Gusunɔwɑ u gemgibu fɑɑbɑ mɔ̀.
Wiyɑ u rɑ bu bere nɔni swɑ̃ɑrun sɑnɑm.
40 U bu somimɔ, u bu wɔrɑmɔ tɔn kɔ̃sobun nɔmɑn di,
u bu fɑɑbɑ mɔ̀, domi win miyɑ bɑ ben kuku yeru kɑsu.