34
1 Dɑfidi u tii gɔsiɑ wiiro Abimɛlɛkin wuswɑɑɔ, yerɑ durɔ wi, u nùn girɑ win min di. Sɑɑ yerɑ Dɑfidi u womu geni kuɑ u nɛɛ,
2 nɑ kon Yinni Gusunɔ siɑrɑ sɑɑ bɑɑyere.
Mɛyɑ nɛn nɔɔ gɑ ǹ mɑrimɔ nɑ kun nùn tɔmɛ.
3 Yinni Gusunɔ sɔɔrɑ kon yɛ̃ɛri.
Bɛɛ wɔnwɔndobu, i swɑɑ dɑkio,
kpɑ i gɔ̃ru dorɑ.
4 I kɑ mɑn Yinni Gusunɔ wɔlle suo,
su win yĩsiru bɛɛrɛ wɛ̃ sɑnnu.
5 Nɑ Yinni Gusunɔ sokɑ, mɑ u mɑn wurɑri,
u mɑn yɑrɑ nɛn bɛrum kpuron di.
6 Be bɑ nùn wuswɑɑ kisi, bɑ rɑ n nuku dobu mɔwɑ.
Bɑ ǹ mɑɑ ben wuswɑɑ wukirimɔ sekurun sɔ̃.
7 Yinni Gusunɔ u rɑ wɔnwɔndon sokuru nɔ.
Mɛyɑ u rɑ mɑɑ nùn yɑre nuku sɑnkirɑnu kpuron di.
8 Win gɔrɑdo u rɑ be bɑ nùn nɑsie kɔ̃su,
kpɑ u bu yɑrɑ kɑrin di.
9 I nɑ, i win durom dendɑ kpɑ i wɑ nge mɛ mu kpɑ̃.
Doo nɔɔrugiiwɑ wi u kuku yeru kɑsu win mi.
10 Bɛɛ be i sɑ̃ɑ wigibu, i nùn nɑsio.
Domi be bɑ nùn nɑsie, gɑ̃ɑnu ku rɑ bu kɔmiɛ.
11 Bɑɑ gbee sunɔ kpɛmu gɑ rɑ gɑsɔ bie gu di.
Adɑmɑ be bɑ Yinni Gusunɔ kɑsu,
gɑ̃ɑ geenu kun bu sɑrɑrimɔ.
12 Bɛɛ nɛn bibu, i susimɑ i nɔ,
kpɑ n bɛɛ sɔ̃ɔsi nge mɛ i ko kɑ Yinni Gusunɔ nɑsiɑ.
13 Wi u kĩ u wɑ̃ɑru di bɔri yɛndu sɔɔ,
kpɑ u tɛ,
14 u kɔ̃sɑn gerubu de, kpɑ u weesu deri.
15 U kɔ̃sɑ suurio, kpɑ u geɑ ko.
U ɑlɑfiɑ nɑɑ giro.
16 Gemgibɑ Yinni Gusunɔ u rɑ n nɔni wɛ̃ɛ.
Mɛyɑ u rɑ mɑɑ ben wuri swɑɑ dɑki.
17 Yinni Gusunɔ u rɑ kɑ kɔ̃sɑn kowobu sɑnnɛ,
kpɑ u de bu ben gɑri duɑri tem mɛni sɔɔ.
18 Yinni Gusunɔ u rɑ gemgibun sokuru wure,
kpɑ u bu wunɑ ben wɑhɑlɑ kpuron di.
19 U rɑ n kɑ be bɑ nuki sɑnkire wɑ̃ɑ,
kpɑ u be bɑ mwiɑ kpɑnɑ fɑɑbɑ ko.
20 Kɔ̃sɑ dɑbinɑ nu rɑ gemgii deemɛ,
ɑdɑmɑ Yinni Gusunɔwɑ u rɑ nùn wɔre ye kpuron di.
21 Wiyɑ u win wɑsin gbin gbinkɑ kɔ̃su.
U ǹ derimɔ bɑɑ win kuku teeru tu kɔsirɑ.
22 Adɑmɑ kɔ̃sɑ yɑ̀ n tɔn kɔ̃so deemɑ, yɑ rɑ nùn gowɑ.
Mɛyɑ u rɑ mɑɑ gemgiin yibɛrɛbɑ sɛɛyɑsie.
23 Wiyɑ u rɑ win sɔm kowobun hunde wɔre kɑrin di.
Be bɑ mɑɑ nùn nɑɑnɛ sɑ̃ɑ bɑ ǹ tɑɑrɛ wɑsi.