35
1 Dɑfidin womu.
Yinni Gusunɔ, be bɑ mɑn wɔrim wee,
ɑ bu wɔrio.
Be bɑ kɑ mɑn sɑnnɑmɔ, ɑ kɑ bu sɑnnɔ.
2 A tɛrɛ piibu kɑ bɑkɑru suo,
kpɑ ɑ nɑ ɑ mɑn somi.
3 A wunɛn yɑɑsɑ suo ɑ be bɑ mɑn nɔni sɔ̃ɔmɔ sɔ̃ɔsi,
kpɑ nɑ n yɛ̃ mɑ wunɑ ɑ sɑ̃ɑ nɛn fɑɑbɑ kowo.
4 A de be bɑ mɑn kɑsu bu go bu sekuru wɑ.
A de be bɑ kĩ n kɑm ko bu biti soorɑ
kpɑ bu biru wurɑ.
5 A de bɑ n sɑ̃ɑ nge yɑkɑ si woo gɑ kɑ doonɔ,
kpɑ Yinni Gusunɔn gɔrɑdo u bu girɑ.
6 A de ben swɑɑ yu wɔriɑ,
kpɑ yɑm wɔ̃kuru tu ye wukiri.
Kpɑ Yinni Gusunɔn gɔrɑdo u bu nɑɑ swĩi.
7 Wee nɑ ǹ gɑ̃ɑnu kue bɑ kɑ mɑn suurɑ bɛriɑmmɛ.
8 A de bu kɑm ko subɑru sɔɔ,
bu wɔri ben suurɑ ye sɔɔ, bu gbi.
9 Kpɑ nɑ n nuku dobu mɔ̀ wunɛn sɔ̃ Yinni Gusunɔ,
fɑɑbɑ ye ɑ mɑn kuɑn sɔ̃.
10 Kpɑ sɑɑ nɛn gɔ̃ru sɔɔn di, n nɛɛ,
goo sɑri wi u dɑm mɔ nge wunɛ.
Domi ɑ nɛ wɔnwɔndo yɑrɑ
sɑɑ wi u mɑn dɑm keren nɔmɑn di.
11 Wee, wee kowobu bɑ seewɑ bɑ mɑn gɑri mɑnimɔ yi nɑ ǹ yɛ̃.
12 Nɑ̀ n bu geɑ kuɑ, kɔ̃sɑ bɑ rɑ mɑn kɔsie,
kpɑ bu mɑn deri nɛ turo.
13 Adɑmɑ sɑnɑm mɛ nɛn yibɛrɛ be, bɑ bɑrɔ,
nɑ sɑɑkin yɑberu sebuɑ nuku sɑnkirɑrun sɔ̃.
Mɑ nɑ tii tɔ̃yɑ mɔ̀ kɑ nɔɔ bɔkuru.
Nɑ rɑ n yiirewɑ nɑ n kɑnɑru mɔ̀,
14 nɑ n sɑ̃ɑ nge ben kpɑɑsi, ǹ kun mɛ nge ben mɛro bisi.
Nɑ nuki sɑnkire nge wi u win mɛro biɑ.
15 Adɑmɑ be, bɑ rɑ mɛnnɛwɑ bu nuku dobu ko,
sɑnɑm mɛ nɑ sokurɑ.
Bɑ rɑ mɛnnɛwɑ nɛn biru bu kɑ mɑn kɔ̃sɑ bwisikusi,
kpɑ bɑ n mɑn yɑɑ kɑsikimɔ bɑɑdommɑ.
16 Bɑɑ kɑ be bɑ ǹ Gusunɔ yɛ̃ bɑ mɑn yɛ̃ɛmɔwɑ.
Bɑ mɑn kɔ̃rusi, bɑ nɔɔ dɔnnɛ gbɑm gbɑm.
17 Yinni, sere dommɑ kɑɑ n yenibɑ mɛɛrɑ.
A ku de bu mɑn wɔri,
domi bɑ sɑ̃ɑwɑ nge gbee sinɑ kpɛnsu.
18 Wunɑ kon siɑrɑ mi wunɛn tɔmbɑ mɛnnɛ,
kpɑ n nun bɛɛrɛ wɛ̃ tɔn dɑbinun suunu sɔɔ.
19 A ku de be bɑ sɑ̃ɑ nɛn yibɛrɛbɑ bɑ n mɑn yɛ̃ɛmɔ kɑm sɔɔ,
kpɑ be bɑ mɑn tusɑ kɑm sɔɔ bɑ n mɑn wɔmmɔ kɑ gɔnibu.
20 Domi ben gɑri gerubu kun do.
Kɔ̃sɑ bɑ rɑ n tɔmbu mɑnimɔ,
be bɑ wɑ̃ɑ bɔri yɛndu sɔɔ tem mɛ sɔɔ.
21 Bɑ rɑ n mɑn nɔɔ gɛ̃ɛwɑ bɑ n mɔ̀, bɑ mɑn wɑ.
22 Yinni Gusunɔ, wunɑ ɑ ye kpuro wɑɑmɔ.
Yen sɔ̃, ɑ ku nɔɔ mɑri,
ɑ ku mɑɑ kɑ mɑn tondɑ.
23 Gusunɔ, nɛn Yinni, ɑ seewo ɑ mɑn siriɑ.
A kɑ mɑn yinɔ.
24 Gusunɔ nɛn Yinni, ɑ sɑ̃ɑwɑ gemgii, ɑ mɑn sirio,
kpɑ bu ku rɑɑ mɑɑ nuku dobu ko nɛn sɔ̃,
25 bu gere ben gɔ̃ruɔ bu nɛɛ,
wee, ye bɑ kĩ, yɑ koorɑ, bɑ mɑn kɑmiɑ.
26 A de be, be bɑ nuku dobu mɔ̀ nɛn wɑhɑlɑn sɔ̃,
be kpuro bu sekuru wɑ sɑnnu sɑnnu.
A de be, be bɑ mɑn seesimɔ,
bu sekuru wɑ tɑ n kpɑ̃.
27 Adɑmɑ ɑ de be bɑ nuku dobu mɔ nɛn tɑɑrɛ sɑrirun sɔ̃ bu yɛ̃ɛri,
kpɑ bɑ n wunɛ Yinni Gusunɔ siɑrɑmɔ bɑɑdommɑ,
wunɛ, wi ɑ kĩ nɛ, wunɛn sɔm kowo nɑ n wɑ̃ɑ bɔri yɛndu sɔɔ.
28 Yinni, nɑ kon wunɛn gem gɑri kpɑrɑ.
Kon mɑɑ nun tɔmɑ bɑɑdommɑ.