33
1 Bɛɛ be i sɑ̃ɑ gemgibu, i Gusunɔ siɑro kɑ womusu.
Bɛɛ be i dɛɛre, i nùn siɑro bɑɑdommɑ.
2 I nùn siɑro kɑ mɔrɔkunu
kpɑ i womusu ko kɑ gɔ̃ɔgenu.
3 I nùn bɛɛrɛ wɛ̃ɛyɔ kɑ wom kpɔɔ,
kpɑ i gɑ̃ɑsu torɑ i kɑ nùn siɑrɑ.
4 Yinni Gusunɔ u rɑ gem gerewɑ.
Ye u mɑɑ geruɑ kpuro yɑ rɑ koorewɑ mɑm mɑm.
5 U rɑ ye yɑ woodɑ kɑ gem swĩi kɑ̃.
Win durom mu yibɑ tem kpuro sɔɔ.
6 Win nɔɔn gɑriyɑ wɔllɑ kɑ tɑkɑ koorɑ,
kɑ gɑ̃ɑ ni nu wɑ̃ɑ te sɔɔ kpuro.
7 Mɑ u derɑ nim wɔ̃kun nim mu mɛnnɑ yɑ̃ɑtem.
8 Bɛɛ hɑnduniɑgibu, i Yinni Gusunɔ nɑsio.
I diirio win wuswɑɑɔ.
9 Domi ye u geruɑ kpuro, yerɑ yɑ rɑ koore.
Ù n woodɑ wɛ̃ kpɑ yu koorɑ.
10 Yinni Gusunɔ u rɑ bwesenun himbɑ gɔsie,
kpɑ yu kɑm ko mɑm mɑm.
11 Adɑmɑ win himbɑ yɑ ku rɑ gɔsiɑre,
yɑ ko n wɑ̃ɑwɑ sere kɑ bɑɑdommɑɔ.
12 Bwese te tɑ Gusunɔ mɔ Yinni,
tɑ ko n nuku dobu mɔwɑ.
Mɛyɑ bwese te u mɑɑ gɔsɑ win tiin sɔ̃
tɑ koo yɛ̃ɛriwɑ.
13 Sɑɑ wɔllun diyɑ Yinni Gusunɔ u tɔmbu kpuro mɛɛrɑ.
14 Sɑɑ win wɑ̃ɑ yerun di, u hɑnduniɑgibu kpuro mɛɛrɑ.
15 Wi, wi u tɔmbu kpuro bwisikunu wɛ̃,
u mɑɑ ben kookoosu kpuron lɑɑkɑri mɔ.
16 Sinɑ boko ù n nɑsɑrɑ wɑ tɑbu sɔɔ,
n ǹ mɔ yèn sɔ̃ u tɑbu kowo dɑbiru mɔ.
N ǹ mɑɑ tɑbu durɔn dɑm
mu rɑ nùn yɑre win yibɛrɛn nɔmɑn di.
17 Wi u win nɑɑnɛ doke dumɑ sɔɔ,
u ǹ nɑsɑrɑ wɑsi.
Mɛyɑ kɑ yen dɑm kpuro
yɑ ǹ kpɛ̃ yu nùn wɔrɑ kɑrin di.
18 Adɑmɑ be bɑ Yinni Gusunɔ nɑsie,
mɑ bɑ ben yĩiyɔbu doke win durom sɔɔ,
beyɑ u kɔ̃su,
19 u kɑ ben hunde wɔrɑ gɔɔn di,
kpɑ bɑ n wɑsi bɑɑ gɔ̃ɔru tɑ̀ n duɑ ben tem sɔɔ.
20 Bɛsɛ, Yinni Gusunɔn miyɑ bɛsɛn yĩiyɔbu wɑ̃ɑ.
Wiyɑ u koo sun somi kpɑ u sun kɔ̃su nge tɛrɛru.
21 Bɛsɛn gɔ̃ru gɑ do win sɔ̃.
Sɑ mɑɑ nùn nɑɑnɛ sɑ̃ɑ win dɛɛrɑrun sɔ̃.
22 Yinni Gusunɔ, ɑ de wunɛn durom mu n wɑ̃ɑ kɑ bɛsɛ.
Domi wunɛ sɔɔrɑ bɛsɛn yĩiyɔbu wɑ̃ɑ.