Womusu 32

¹ Dɑfidin womu.

Doo nɔɔrugiiwɑ wìn torɑnu bɑ suuru kuɑ,

mɑ bɑ win durum wunɑ.

² Doo nɔɔrugiiwɑ wìn kɔ̃sɑ Yinni Gusunɔ kun gɑrisi,

mɑ u ǹ mɑɑ keetɑ mɔ win gɔ̃ruɔ.

³ Sɑnɑm mɛ nɑ ǹ nɛn durum wure, nɛn kukunu gbisɑ,

nɑ weeweenu kuɑ tɔ̃ɔ giriru,

⁴ domi wunɛn nɔmu gɑ mɑn sɛ̃re bururu kɑ yokɑ.

Nɛn dɑm mu dɛllɑ nge mɛ dɑ̃ɑ wurusu su rɑ ko sɔ̃ɔ sɑ̃rerun sɑɑ.

⁵ Nɑ nɛɛ, kon nɛn torɑnu wurɑ

wunɛ Yinni Gusunɔn mi.

Nɑ nɛn durum tuubɑ kuɑ wunɛn mi,

nɑ ǹ nɛn kɔ̃sɑ beruɑ.

Mɑ ɑ mɑn nɛn durum tɑɑrɛ wunɑri.

⁶ Yen sɔ̃, n weenɛ bɑɑwure wi u nun nɑɑnɛ sɑ̃ɑ

u nun kɑnɑ wɑhɑlɑn sɑɑ sɔɔ.

Bɑɑ nim bɑkɑm mù n yibɑ mu sɑrɑ,

mu ǹ yɛ̃ro turi.

⁷ Wunɑ sɑ̃ɑ nɛn kuku yeru,

ɑ rɑ mɑn gbɑre wɑhɑlɑn di.

A derɑ nɑ womusu mɔ̀ wunɛn fɑɑbɑn sɔ̃.

⁸ Yinni Gusunɔ, ɑ nɛɛ, kɑɑ mɑn keu ko,

kpɑ ɑ mɑn swɑɑ sɔ̃ɔsi ye n weenɛ n swĩi.

Kɑɑ mɑn bwisi kɛ̃, kpɑ ɑ n mɑn kɔ̃su.

⁹ A mɑɑ nɛɛ, n ku ko bwisi sɑrirugii nge dumɑ,

ǹ kun mɛ nge birɑkɔ,

yìn nɔɔwɔ bɑ ǹ koo ko bɑ kun yɑrukɑ

kɑ kɑrɑbɑsuuru doke,

bɑ n kɑ yi gɑwe, kpɑ yi ku rɑɑ tɔnu wɔri.

¹⁰ Tɔn kɔ̃sobun wɑhɑlɑ kpɑ̃,

ɑdɑmɑ wi u Yinni Gusunɔ nɑɑnɛ sɑ̃ɑ,

win durom mu rɑ n yɛ̃ro wɑ̃ɑsiwɑ.

¹¹ Yen sɔ̃, bɛɛ gemgibu, i gɔ̃ru doro Yinni Gusunɔ sɔɔ,

kpɑ i dɛsinu kɑrɑ.

Bɛɛ bèn gɔ̃ru gɑ dɛɛre,

i guudɑ koowo kɑ nuku dobu, bɛɛ kpuro.