10
1 Yinni Gusunɔ, sɑ nɔni sɔ̃ɔre.
Mbɑn sɔ̃nɑ ɑ kɑ sun tomɑ.
Mbɑn sɔ̃nɑ ɑ kukuɑ.
2 A mɛɛrio nge mɛ tɔn kɔ̃sobɑ tii sue.
Bɑ yɑ̃ɑrobu nɔni sɔ̃ɔmɔ bɛrum sɑriru sɔɔ.
Bɑ bu kɔkirimɔ bɑ suremɔ ben yinɑ sɔɔ.
3 Tɔn kɔ̃sobɑ woo kɑnɑmɔ.
Ye ben gɔ̃ru gɑ binɛ sɑ̃ɑ, yerɑ bɑ rɑ kɑsu.
Bɑ̀ n ye wɑ, kpɑ bu Gusunɔ wɔmɛ bu nùn yɑɑkoru koosi.
4 Ben tii suɑbu sɔɔ, bɑ rɑ nɛɛ,
Gusunɔ sɑri, u ǹ bikiɑmɔ ye bɑ mɔ̀.
5 Ye bɑ niɑ sɑ̃ɑ, yɑ rɑ koorewɑ.
Bɑ ǹ kpɛ̃ bu Gusunɔn siribu tubu.
Bɑ rɑ ben yibɛrɛbɑ yɑ̃ɑtɑm siewɑ.
6 Kpɑ bu tii sɔ̃ bu nɛɛ, bɑ ǹ wɔrumɑmɔ pɑi!
Kɔ̃sɑ gɑɑ kun bu deemɑmɔ.
7 Bɔ̃ri kɑ weesu kɑ gɑri kɔ̃siyɑ
yi rɑ n yibɑ ben nɔsɔ.
Kɔ̃sɑ ben yɑrɑ yɑ rɑ n wuuwɑ.
8 Wuun biruɔrɑ bɑ rɑ n kukuɑ.
Miyɑ bɑ rɑ n tɔmbu yɔɔru bwɛ̃ɛyɛ.
Tɑɑrɛ sɑrirugii goo ù n yɑrɑ,
bu nùn sɛ̃re bu go.
Dɑm sɑrirugii ù n yɑrimɑ,
bu nùn mwɑ bu go.
9 Bɑ rɑ n kukuɑwɑ nge gbee sunɔ ge gɑ yɑɑ mɑrɑ.
Bɑ̀ n dɑm sɑrirugii mwɑ ben yinɑ sɔɔ,
kpɑ bu nùn gɑwɑ bu kɑ doonɑ,
10 kpɑ bu nùn sɛ̃suku bu go.
Ben dɑm bɑkɑm mu nùn kɑmiɑ.
11 Bɑ rɑ tii sɔ̃wɑ bu nɛɛ, Gusunɔ kun ben gɑri mɔ̀.
U ku rɑ mɛɛri ye bɑ mɔ̀.
12 Yinni Gusunɔ, ɑ seewo,
ɑ ku be bɑ nɔni sɔ̃ɔre duɑri,
ɑ bu somiɔ.
13 Mbɑn sɔ̃nɑ kɑɑ de tɔn kɔ̃sobu bu nun wɔmɛ
bu nɛɛ, ɑ ku rɑ bu sɛɛyɑsie.
14 Yinni Gusunɔ, ɑ rɑ n yɛ̃ nɔni swɑ̃ɑ
te tɔmbɑ mɔ hɑnduniɑ sɔɔ.
A rɑ bu somi. A rɑ mɑɑ gobekubɑ nɔɔri.
Yen sɔ̃nɑ bɑ rɑ nun tii wɛ̃.
15 A tɔn kɔ̃son dɑm buo,
ɑ nùn win kɔ̃sɑ kɔsieyo.
Kpɑ win nuku kɔ̃suru tu kpe mɑm mɑm.
16 Yinni Gusunɔ, wunɑ ɑ sɑ̃ɑ sinɑ boko sere kɑ bɑɑdommɑɔ.
Kɑɑ be bɑ ǹ nun sɑ̃ɑmɔ girɑ wunɛn tem di.
17-18 Yinni Gusunɔ, ɑ kɑnɑ nini swɑɑ dɑkio.
Wɔnwɔndo ù n nun kɑnɑ, ɑ nùn dɑm kɛ̃ɛyɔ.
Be bɑ dɑm dɔremɔ, bɑ̀ n nun sokɑ, ɑ bu wɔro.
Be bɑ gobekubɑ dɑm dɔremɔ, ɑ bu sirio,
kpɑ goo u ku mɑɑ de bɑ n win bɛrum mɔ.