9
1 Womu ge Dɑfidi u wom kowobun wirugii kuɑ. Bɑ gu kuɑwɑ kɑ gɔ̃ru yɑ̃kɑ. Ge wee.
2-3 Yinni Gusunɔ, kon nun siɑrɑ kɑ nɛn gɔ̃ru kpuro.
Kon wunɛn sɔm mɑɑmɑɑkigiɑn gɑri kpɑrɑ.
Kon womu ko kɑ nuku dobu.
Yinni Wɔrukoo, kon nun tɔmɑ.
4 Nɛn yibɛrɛbɑ bɑ nun wɑ, bɑ biruku yirɑ wurɑ.
Nɛn yibɛrɛbɑ bɑ nun wɑ, bɑ wɔrukɑ bɑ gbisukɑ.
5 Yinni Gusunɔ, wunɛ wi ɑ sɔ̃ wunɛn sinɑ gɔnɑɔ,
ɑ rɑ siri dee dee.
Wunɛ wi ɑ sɔ̃ wunɛn sinɑ gɔnɑɔ,
ɑ mɑn gem wɛ̃.
6 Yinni Gusunɔ, ɑ bwese ni nu ǹ nun yɛ̃ gerusi.
A tɔn kɔ̃sobu kpeerɑsiɑ.
A ben yĩsɑ go sere kɑ bɑɑdommɑɔ.
7 Yinni Gusunɔ, ɑ nɛn yibɛrɛbɑn wusu kɔsukɑ.
A ben tii kpeerɑsiɑ mɑm mɑm.
Bɑ ǹ mɑɑ bu yɑɑyɑmɔ sere kɑ bɑɑdommɑɔ.
8-9 Yinni Gusunɔ, ɑ sɔ̃ wunɛn sinɑ gɔnɑɔ.
Kɑɑ n sɑ̃ɑwɑ sunɔ sere kɑ bɑɑdommɑɔ.
Wunɑ ɑ hɑnduniɑ kpɑre gem sɔɔ.
Wunɑ ɑ tɔmbu sirimɔ dee dee.
10 Yinni Gusunɔ, ɑ sɑ̃ɑwɑ be bɑ dɑm dɔremɔn kɔ̃so.
A sɑ̃ɑwɑ be bɑ kpikiru suɑn kuku yeru.
11 Yinni Gusunɔ, be bɑ wunɛn yĩsirun bɛɛrɛ yɛ̃,
bɑ rɑ n nun nɑɑnɛ sɑ̃ɑ.
Be bɑ nun kɑsu, ɑ ku rɑ bu biru kisi.
12 Yinni Gusunɔ u win sinɑ gɔnɑ tɛriɑ Siɔniɔ.
I nùn siɑro kɑ womusu. I win sɔmɑn gɑri kpɑro.
I de bwesenu kpuro nu yi nɔ.
13 U rɑ be bɑ wuri mɔ̀ yɑɑye.
U rɑ be bɑ nɔni sɔ̃ɔren kɑnɑru nɔ.
U rɑ be bɑ bu dɑm dɔremɔ sɛɛyɑsie.
14 Yinni Gusunɔ, ɑ mɑn durom kuo.
A mɛɛrio wɑhɑlɑ ye nɑ mɔ̀ be bɑ mɑn tusɑn sɔ̃.
A mɑn wɔro gɔɔn nɔmɑn di,
15 kpɑ n kpĩ nɑ n wɑ̃ɑ Siɔnin tɔmbun suunu sɔɔ,
nɑ n tɑkɑru mɔ̀ ye ɑ mɑn kuɑn sɔ̃,
nɑ n nuku dobu mɔ̀ fɑɑbɑ ye ɑ mɑn kuɑn sɔ̃.
16-17 Wee bwese tukunu nu suurɑ gbɑ gɑbun sɔ̃,
mɑ nin tii nu wɔri ye sɔɔ.
Nu gɑbu yinɑ bɛriɑ, mɑ nin tiin nɑɑsu wɔri ye sɔɔ.
Tɔn kɔ̃sobɑ sɔm kɔ̃sunu kuɑ.
Mɑ ben tii bɑ nin ɑre wɑ.
Yinni Gusunɔ u sɔ̃ɔsi mɑ u rɑ siri dee dee.
18 Wee ye u koo de n koorɑ.
Tɔn kɔ̃sobɑ koo gbiwɑ.
Be bɑ nùn yinɑ bɑ koo kɑm ko.
19 Adɑmɑ u ku rɑ yɑ̃ɑrobu duɑri.
U rɑ de wɔnwɔndobu bɑ n yĩiyɔbu mɔ wi sɔɔ.
20 Yinni Gusunɔ, ɑ seewo.
A ku de bu nɛɛ, tɔnuwɑ u kɑ nun kinɛnu mɔ̀.
A ku de bwese tukunu nu nun ɑtɑfiiru ko.
A bu sɛɛyɑsio nge mɛ n weenɛ,
21 kpɑ nu bɛrum soorɑ,
nu giɑ mɑ nu sɑ̃ɑwɑ tɔn dirobu.
Yinni Gusunɔ, ɑ seewo.