7
1 Womu ge Dɑfidi u kuɑ sɑnɑm mɛ u nuki sɑnkire Kusi Bɛnyɑmɛɛgiin sɔ̃. Ge wee.
2 Gusunɔ nɛn Yinni, wunɑ nɑ nɑɑnɛ sɑ̃ɑ.
A mɑn wɔro be bɑ mɑn nɑɑ giren nɔmɑn di.
3 Kpɑ bu ku rɑɑ mɑn mwɑ bu kɑsuku
nge mɛ gbee sunɔ gɑ rɑ yɑɑ kɑsuku,
goo u kun ye wɔre.
4-5 Gusunɔ, nɛn Yinni, wee bɑ mɑn tɑɑrɛ wɛ̃ɛmɔ bɑ mɔ̀,
nɑ goo torɑri,
nɑ nɛn kĩnɑsi bɔrɔ kɔ̃ɔru kuɑ,
nɑ nɛn yibɛrɛ wɔri,
nɑ win yɑ̃nu wɔrɑ kɑ wɔbiɑ.
Adɑmɑ nɑ̀ n yen gɑɑ kuɑn nɑ kɑ gem,
6 ɑ de nɛn yibɛrɛ u mɑn sɛ̃re u go.
A de u nɛn goru deri mi.
7 Yinni Gusunɔ, ɑ nɛn yibɛrɛ wɔrio kɑ mɔru.
Be bɑ kɔ̃ruɑ, ɑ bu sɛɛyɑsio kɑ mɔru.
A de ɑ n wɑ̃ɑ nɛn bɔkuɔ.
A de ɑ mɑn siriɑ.
8 Yinni Gusunɔ, wee ɑ sɔ̃ wunɛn sinɑ gɔnɑɔ.
A de bwesenu nu mɛnnɑmɑ mi.
A de ɑ nu siri mi.
9 Yinni Gusunɔ, wunɑ kɑɑ tɔmbu siri.
A mɑn sirio nge mɛ nɛn dɛɛrɑrɑ nɛ.
A mɑn nɛn gem wɛ̃ɛyɔ.
10 A de tɔn kɔ̃sobun dɑɑ yu nɔru ko,
kpɑ ɑ de gemgibu bu kuurɑ.
Yinni Gusunɔ, ɑ sɑ̃ɑwɑ gemgii.
Wunɑ ɑ rɑ tɔnun gɔ̃run gɑri wɛ̃ɛri.
11 Wunɑ ɑ rɑ mɑn gɑnɛ nge tɛrɛru.
Wunɑ ɑ rɑ bèn gɔ̃ru gɑ dɛɛre fɑɑbɑ ko.
12 Wunɛ, ɑ rɑ siriwɑ dee dee.
Yinni Gusunɔ, ɑ mɑɑ sɛ̃.
13 Kɑ mɛ, tɔn kɔ̃so u ku rɑ win dɑɑ deri.
U rɑ win tɑkobi nɔɔ dɛrewɑ.
U rɑ win tɛndu bɛriwɑ.
U win sɛ̃u sɔre u yĩisi.
14 U tɑbu yɑ̃ɑ gɔɔginu kuɑ.
Mɑ u sɛ̃ɛ dɔ̃ɔginu kuɑ.
15 U win sɔmburu seewɑ.
U kɔ̃sɑ bwisikumɔ. U weesu wĩimɔ.
16 U suurɑ gbɑ gɑbun sɔ̃,
ɑdɑmɑ win tiiwɑ u koo ye wɔri.
17 Kɔ̃sɑ ye u rɑɑ kuɑ kpuro,
win wirɔwɑ yɑ koo wɔri.
Win dɑmgii te u rɑɑ dɔrɑmɔ,
win wirɑ tɑ koo kɔrɑ.
18 Yinni Gusunɔ, kon nun siɑrɑ,
domi ɑ sɑ̃ɑ nɑɑnɛgii.
Yinni Wɔrukoo, kon nun tɔmɑ kɑ womu.