Esekiɑsi u bɑrɑ
mɑ Yinni Gusunɔ u nùn bɛkiɑ
(I mɑɑ mɛɛrio Esɑi 38:1-8 kɑ Bɑndun Gɑri II, 32:24)
20
1 Sɑɑ ye sɔɔ, Esekiɑsi u bɑrɑ sere u gɔɔ turuku kuɑ. Mɑ Gusunɔn sɔmɔ Esɑi Amɔtin bii u nɑ win mi. U nùn sɔ̃ɔwɑ u nɛɛ, ɑmɛniwɑ Yinni Gusunɔ u geruɑ. U nɛɛ, ɑ wunɛn yɛnugibu sɔ̃ɔwɔ ye bɑɑwure ko n dɑ ko wunɛn biru. Domi kɑɑ gbi.
2 Yerɑ Esekiɑsi u win wuswɑɑ sĩiyɑ u gɑnɑ girɑri mɑ u kɑnɑru kuɑ u nɛɛ, 3 Yinni Gusunɔ, ɑ suuru koowo, ɑ yɑɑyo mɑ nɑ sĩɑ dee dee wunɛn wuswɑɑɔ. Nɑ wunɛn woodɑbɑ mɛm nɔɔwɑ. Nɑ mɑɑ kuɑ ye n nun wɛ̃re.
Yen biru u swĩ gem gem.
4 Sɑnɑm mɛ Esɑi u yɑriɔ sinɑ kpɑɑru min di, yerɑ Yinni Gusunɔ u kɑ nùn gɑri kuɑ u nɛɛ, 5 ɑ gɔsiro ɑ kɑ Esekiɑsi nɛn tɔmbun kpɑro sɔ̃ ɑ nɛɛ, ɑmɛniwɑ nɛ, Yinni Gusunɔ nɑ geruɑ, nɛ wi nɑ sɑ̃ɑ bɛɛn bɑɑbɑ Dɑfidin Yinni. Nɑ nɛɛ, nɑ win kɑnɑru mwɑ, nɑ mɑɑ win nɔni yĩresu wɑ. Wee, kon de u bɛkurɑ. Yen biru sɔ̃ɔ itɑse u koo dɑ nɛ, Yinni Gusunɔn sɑ̃ɑ yerɔ. 6 Kon mɑɑ win wɑ̃ɑrun tɔ̃ru sosi wɔ̃ɔ wɔkurɑ nɔɔbu kpɑ n nùn fɑɑbɑ ko n wuu ge wɔrɑ sɑɑ Asirin sinɑ bokon nɔmɑn di. Mɛyɑ kon gu kɔ̃su nɛn tiin sɔ̃ kɑ nɛn sɔm kowo Dɑfidin sɔ̃.
7 Yen biru Esɑi u nɛɛ, bu dɑ̃ɑ ye bɑ mɔ̀ figien mɑrum suo bu pɛrɑ bu tɛɛni win bɑrɑ ten wɔllɔ. Mɑ bɑ mu pɛrɑ bɑ tɛɛni mɑ u bɛkurɑ.
8 N deemɑ Esekiɑsi u rɑɑ Esɑi bikiɑ u nɛɛ, mbɑ n ko n sɑ̃ɑ yĩreru te tɑ koo nùn sɔ̃ɔsi mɑ u koo bɛkurɑ kpɑ u dɑ Yinni Gusunɔn sɑ̃ɑ yerɔ yen sɔ̃ɔ itɑseru.
9 Mɑ Esɑi u nùn wisɑ u nɛɛ, Yinni Gusunɔ u koo win gɑri yibiɑ yìn nɔɔ mwɛɛru u kuɑ. Yɔɔtiɑn tiro gɑ koo kesi sere nɑɑ dɑbusɑnu wɔkuru sɔ̃ɔ ù n kɛllɑ. A kĩ gu kɑɑrɑ? Nge gu sosi.
10 Mɑ Esekiɑsi u nɛɛ, n ǹ sɛ̃ yɔɔtiɑn tiro gu kɑ sosi nɑɑ dɑbusɑnu wɔkuru sɔ̃ɔ ù n kɛllɑ. Yen sɔ̃, nɑ kĩwɑ gu kɑɑrɑ.
11 Yerɑ Gusunɔn sɔmɔ Esɑi u Yinni Gusunɔ kɑnɑ u de gu kɑɑrɑ. Mɑ Yinni Gusunɔ u derɑ n koorɑ mɛ.
Bɑbilonin sinɑ boko
u Esekiɑsi sɔmɔbu gɔriɑ
(I mɑɑ mɛɛrio Esɑi 39)
12 Sɑɑ ye sɔɔ, Mɛrodɑki Bɑlɑdɑni, Bɑlɑdɑnin bii, Bɑbilonin sinɑ boko u Esekiɑsi sɔmɔbu gɔriɑ kɑ tireru kɑ kɛ̃nu. Domi u nuɑ mɑ Esekiɑsi u bɑrɑ. 13 Ye sɔmɔ be, bɑ tunumɑ Esekiɑsin mi, yerɑ u bu dɑm koosiɑ, mɑ u ben gɑri swɑɑ dɑki ye bɑ kɑ sĩimɔ. Yen biru u kɑ bu dɑ win ɑrumɑni beru yerɔ. Yerɑ yɑ sɑ̃ɑ sii geesu kɑ wurɑ kɑ turɑre kɑ gum nubu durorugim kɑ tɑbu yɑ̃nu. Ye yɑ gesi sɑ̃ɑ win ɑrumɑni kpuro, yen gɑɑ sɑri ye u ǹ bu sɔ̃ɔsi.
14 Yen biruwɑ Esɑi u nɑ u sinɑ boko Esekiɑsi bikiɑ u nɛɛ, mɑn diyɑ tɔn beni bɑ nun nɑɑwɑ. Ye bɑ tunumɑ, mbɑ bɑ geruɑ.
Mɑ Esekiɑsi u nùn wisɑ u nɛɛ, bɑ nɑwɑ sɑɑ tem tontonden di mɛ bɑ mɔ̀ Bɑbiloni.
15 Esɑi u kpɑm nùn bikiɑ u nɛɛ, mbɑ kɑ mbɑ bɑ wɑ wunɛn yɛnuɔ.
Mɑ Esekiɑsi u nùn wisɑ u nɛɛ, ye yɑ wɑ̃ɑ nɛn yɛnu ge sɔɔ kpuro, bɑ wɑwɑ. Nɛn ɑrumɑni sɔɔ gɑ̃ɑnu sɑri ni nɑ ǹ bu sɔ̃ɔsi.
16 Yerɑ Esɑi u nùn sɔ̃ɔwɑ u nɛɛ, ɑ swɑɑ dɑkio ɑ nɔ ye Yinni Gusunɔ u geruɑ. 17 U nɛɛ, wee tɔ̃ru gɑrɑ sisi tè sɔɔ bɑ koo wunɛn ɑrumɑni kpuro gurɑ bu kɑ dɑ Bɑbiloniɔ kɑ ye wunɛn bɑɑbɑbɑ bɑ sweenɑ bɑ nun deriɑ. Yen gɑɑ sɑri ye bɑ koo nun deriɑ tɔ̃ɔ te. 18 Bɑ koo wunɛn tiin bweseru sɔɔ bibu mwɛɛri kpɑ bu kɑ bu dɑ Bɑbiloniɔ bu bu mɑɑtɑm ko. Kpɑ bu ko sinɑ bokon sɔm kowobu sinɑ kpɑɑrɔ.
19 Yerɑ Esekiɑsi u Esɑi wisɑ u nɛɛ, Yinni Gusunɔn gɑri yi ɑ geruɑ mi, gɑri burɑ.
Domi ɑlɑfiɑ kɑ bɔri yɛndu tɑ ko n wɑ̃ɑ nɛn wɑ̃ɑrun tɔ̃ru kpuro sɔɔ.
20-21 Yen biru Esekiɑsi u kpunɑ u gu, mɑ bɑ nùn sikɑ win bɑɑbɑbɑn sikɑɔ. Sɑɑ yerɑ win bii Mɑnɑse u bɑndu kɔsire kuɑ. Ye Esekiɑsi u kuɑn sukum kɑ mɑɑ win wɔrugɔru kɑ nge mɛ u wɔru gbɑ mi nim mu koo sinɑ, mɑ u mu tori wunɑ yi kɑ nim nɑ Yerusɑlɛmuɔ, ye kpuron gɑri yi yoruɑ Yudɑbɑn sinɑmbun fɑɑgin tireru sɔɔ.