Bɑbilonin sinɑ boko
u Esekiɑsi sɔmɔbu gɔriɑ
(I mɑɑ mɛɛrio Sinɑmbu II, 20:12-19)
39
1 Yenibɑn biru Mɛrodɑki Bɑlɑdɑni, Bɑlɑdɑnin bii, Bɑbilonin sinɑ boko, u Esekiɑsi sɔmɔbu gɔriɑ kɑ tireru kɑ kɛ̃nu. Domi u nuɑ Esekiɑsi u bɑrɑ mɑ u bɛkurɑ. 2 Ye sɔmɔ be, bɑ tunumɑ Esekiɑsin mi, yerɑ win nukurɑ dorɑ. Mɑ u kɑ bu dɑ u bu sɔ̃ɔsi mi win ɑrumɑni yɑ beruɑ, ye yɑ sɑ̃ɑ sii geesu kɑ wurɑ kɑ turɑre kɑ gum nubu durorugim kɑ tɑbu yɑ̃nu kɑ ye yɑ wɑ̃ɑ win ɑrumɑni beru yerɔ kpuro gesi. Gɑ̃ɑnu sɑri win dirɔ kɑ win tem kpuro sɔɔ ni u ǹ bu sɔ̃ɔsi.
3 Yen biruwɑ Gusunɔn sɔmɔ Esɑi u nɑ u Esekiɑsi bikiɑ u nɛɛ, mɑn diyɑ tɔn beni bɑ nun nɑɑwɑ. Ye bɑ tunumɑ, mbɑ bɑ geruɑ.
Mɑ Esekiɑsi u nùn wisɑ u nɛɛ, bɑ nɑwɑ sɑɑ tem ton tonden di mɛ bɑ mɔ̀ Bɑbiloni.
4 Esɑi u kpɑm nùn bikiɑ u nɛɛ, mbɑ bɑ wɑ wunɛn yɛnuɔ.
Esekiɑsi u nùn wisɑ u nɛɛ, ye yɑ wɑ̃ɑ nɛn yɛnu ge sɔɔ kpuro bɑ wɑwɑ. Nɛn ɑrumɑni sɔɔ gɑ̃ɑnu sɑri ni nɑ ǹ bu sɔ̃ɔsi.
5 Yerɑ Esɑi u nùn sɔ̃ɔwɑ u nɛɛ, ɑ swɑɑ dɑkio ɑ nɔ ye Gusunɔ, wɔllu kɑ tem Yinni u geruɑ. 6 U nɛɛ, tɔ̃ru gɑrɑ sisi tè sɔɔ bɑ koo wunɛn ɑrumɑni kpuro gurɑ bu kɑ dɑ Bɑbiloniɔ, kɑ ye wunɛn bɑɑbɑbɑ bɑ sweenɑ bɑ nun deriɑ. Yen gɑɑ sɑri ye bɑ koo nun deriɑ tɔ̃ɔ te. 7 Bɑ koo wunɛn tiin bweseru sɔɔ bibu mwɛɛri, kpɑ bu kɑ dɑ Bɑbiloniɔ bu bu mɑtɑm ko bu ko sɔm kowobu yen sinɑ kpɑɑrɔ.
8 Yerɑ Esekiɑsi u Esɑi wisɑ u nɛɛ, Yinni Gusunɔn gɑri yi ɑ geruɑ mi, gɑri burɛyɑ. Domi ɑlɑfiɑ kɑ bɔri yɛndu tɑ ko n wɑ̃ɑ nɛn wɑ̃ɑrun tɔ̃ru kpuro sɔɔ.BƆNU YIRUSEGUSUNƆ U ISIRELIBA NUKURU YƐMIASIA