Esekiɑsi u bɑrɑ mɑ u bɛkurɑ
(I mɑɑ mɛɛrio Sinɑmbu II, 20:1-11)
38
1 Sɑɑ ye sɔɔ, Esekiɑsi u bɑrɑ sere u gɔɔ turuku kuɑ. Mɑ Gusunɔn sɔmɔ Esɑi Amɔtin bii u nɑ win mi, u nùn sɔ̃ɔwɑ u nɛɛ, ɑmɛniwɑ Yinni Gusunɔ u geruɑ. U nɛɛ, ɑ wunɛn yɛnugibu sɔ̃ɔwɔ ye bɑɑwure u koo ko wunɛn biru, domi kɑɑ gbi.
2 Yerɑ Esekiɑsi u win wuswɑɑ sĩiyɑ u gɑnɑ girɑri. Mɑ u kɑnɑru kuɑ. 3 U nɛɛ, Yinni Gusunɔ, ɑ suuru koowo. A yɑɑyo mɑ nɑ sĩɑ dee dee wunɛn wuswɑɑɔ, nɑ wunɛn woodɑbɑ mɛm nɔɔwɑ, nɑ mɑɑ kuɑ ye n nun wɛ̃re. Yen biru u swĩ gem gem.
4 Yerɑ Yinni Gusunɔ u Esɑi sɔ̃ɔwɑ u nɛɛ, 5 ɑ doo ɑ Esekiɑsi sɔ̃ ɑ nɛɛ, ɑmɛniwɑ nɛ, Yinni Gusunɔ nɑ geruɑ. Nɛ, wi nɑ sɑ̃ɑ win bɑɑbɑ Dɑfidin Yinni, nɑ nɛɛ, nɑ win kɑnɑru nuɑ, nɑ mɑɑ win nɔni yĩresu wɑ. Wee, kon win wɑ̃ɑrun tɔ̃ru sosi wɔ̃ɔ wɔkurɑ nɔɔbu, 6 kpɑ n nùn fɑɑbɑ ko n nùn wɔrɑ kɑ Yerusɑlɛmu sɑnnu sɑɑ Asirin sinɑ bokon nɔmɑn di, kpɑ n ye kɔ̃su.
21 Mɑ Esɑi u nɛɛ, bu kɑ figien mɑrum nɑ bu mu pɛre Esekiɑsin bwisi te sɔɔ, kpɑ u bɛkurɑ.
22 Mɑ Esekiɑsi u bikiɑ u nɛɛ, yĩre terɑ̀ tɑ koo mɑn sɔ̃ɔsi mɑ kon dɑ Yinni Gusunɔn sɑ̃ɑ yerɔ.
7 Mɑ Esɑi u nɛɛ, yĩre te wee te tɑ koo nun sɔ̃ɔsi mɑ Yinni Gusunɔ u koo win gɑri yibiɑ yi u geruɑ. 8 U koo de yɑ̃ku yerun tiro gu dɛ̃ɛbu kɑɑrɑ ten yɔɔtiɑn nɑɑ dɑbusɑnu wɔkurun sɑkɑ. Mɑ gɑ kɑɑrɑ nɑɑ dɑbusɑnu wɔku te.
Esekiɑsin siɑrɑbu ye u bɛkurɑ
9 Sɑnɑm mɛ Esekiɑsi u bɛkurɑ, u womu kuɑ u nɛɛ,
10 nɑ rɑɑ gerumɔ nɛn gɔ̃ruɔ nɑ mɔ̀,
nɛn wɑ̃ɑrun suunu sɔɔrɑ kon dɑ gɔribun wɑ̃ɑ yerun kɔnnɔwɔ.
Nɛn wɔ̃ɔ si su tie, nɑ ǹ mɑɑ su dimɔ.
11 Nɑ nɛɛ, nɑ ǹ mɑɑ Yinni Gusunɔ wɑsi
hɑnduniɑ yeni sɔɔ.
Mɛyɑ nɑ ǹ mɑɑ goo wɑsi
tem mɛni sɔɔ mi wɑsobɑ wɑ̃ɑ.
12 Wee, bɑ mɑn nɛn wɑ̃ɑru mwɑɑri,
bɑ tu swɛnyɑsiɑ bɑ kɑ tondɑ
nge yɑ̃ɑ kpɑron kuu bekurugiru.
Bɑ nɛn wɑ̃ɑrun wɛ̃ɛ burɑ.
Mɑ bɑ mɑn kuruɑ
nge mɛ weso u rɑ beku yɑsɑ kure.
Sɔ̃ɔ u sere kpe bɑ koo nɛn wɑ̃ɑru kpeerɑsiɑ.
13 Mɑ nɑ tii deri sɛ̃ɛ
sere kɑ bururu yɑm sɑ̃rerɔ.
Yinni Gusunɔ u nɛn kukunu kɔsukɑ nge gbee sunɔ.
Sɔ̃ɔ u sere kpe, u koo nɛn wɑ̃ɑru kpeerɑsiɑ.
14 Wee, nɑ rɑ n wuri mɔ̀wɑ
nge kpɑɑru bɑniku ge gɑ yɔ̃ɔwɑ.
Kpɑ nɑ n weeweenu mɔ̀
nɑ n kukirimɔ nge totobɛrɛru.
Nɑ wɔllu twɛ̃ɛ kɑ wɔnwɔndu.
Yinni Gusunɔ, nɑ wɑ̃ɑ nuku sɑkirɑ bɑkɑnu sɔɔ.
A mɑn somiɔ.
15 Mbɑ kon mɑɑ gere,
domi Yinni Gusunɔ u nɛn kɑnɑru nuɑ u mɑn wisɑ.
Kon sĩ kɑ tii kɑwɑbu
sere nɛn wɑ̃ɑrun tɔ̃ru tu kɑ kpe
nɛn nuku sɑnkirɑ tenin biru.
16 Yinni Gusunɔ, wunɛn durom sɑɑbuwɑ
tɔnu u kɑ wɑ̃ɑ.
Domi mɛn sɑɑbuwɑ nɑ kɑ wɛ̃siɑmɔ kpɑm.
A mɑn wɑ̃ɑru wesiɑ mɑ nɑ wɑ̃ɑ.
17 Wee, nɛn wɑhɑlɑ yɑ gɔsirɑ bɔri yɛndu,
ɑ wurɑ ɑ mɑn yɑrɑ siki wɔrun di
wunɛn kĩrun sɔ̃.
Domi ɑ nɛn durum kpuro wɔkɑ
ɑ kɔ̃ wunɛn biruɔ.
18 Yinni Gusunɔ, n ǹ mɔ gɔribun
wɑ̃ɑ yerɑ tɑ koo nun siɑrɑ.
N ǹ mɑɑ mɔ gɔɔwɑ u koo nun wɔlle suɑ.
Be bɑ wɑ̃ɑ siki wɔruɔ bɑ ǹ mɑɑ wunɛn durom yĩiyɔ.
19 Adɑmɑ wɑsowɑ u rɑ nun siɑre nge nɛ gisɔ.
Kɑ tundo wi u rɑ win bibu sɔ̃ mɑ ɑ nɑɑnɛ mɔ.
20 Yinni Gusunɔ, wunɑ ɑ mɑn fɑɑbɑ kuɑ.
Sɑ ko bɛsɛn mɔrɔkunu kɑ bɑrɑnu kɑ guunu so
su kɑ nun siɑrɑ bɛsɛn wɑ̃ɑru kpuro sɔɔ
wunɛn sɑ̃ɑ yerɔ.