Sinɑ boko Esekiɑsi
u bwisi bikiɑ
(I mɑɑ mɛɛrio Esɑi 37:1-7)
19
1 Sɑɑ ye Esekiɑsi sinɑ boko u gɑri yi nuɑ, yerɑ u win tiin yɑbenu nɛnuɑ u gĩɑnɑ. Mɑ u sɑɑki suɑ u sebuɑ nuku sɑnkirɑnun sɔ̃. Mɑ u dɑ Yinni Gusunɔn sɑ̃ɑ yerɔ. 2 Yerɑ u Eliɑkimu sɔm kowobun wirugii kɑ mɑɑ Sebinɑ win tire yoro kɑ yɑ̃ku kowo guro gurobu gɔrɑ Gusunɔn sɔmɔ Esɑi Amɔtin biin mi. N deemɑ be mɑɑ, sɑɑkibɑrɑ bɑ sebuɑ bɑ kɑ dɑ mi. 3 Ye bɑ turɑ mi, bɑ nùn sɔ̃ɔwɑ bɑ nɛɛ, ɑmɛniwɑ Esekiɑsi u geruɑ u nɛɛ, gisɔn tɔ̃ɔ te, nuku sɑnkirɑnu sɔɔrɑ sɑ wɑ̃ɑ. Bɑ sun sɛɛyɑsiɑmɔ, mɑ bɑ sun doke sekuru sɔɔ. Gisɔn wɑhɑlɑ ye, yɑ sɑ̃ɑwɑ nge tɔn kurɔ wi u yiire u kĩ u mɑ, mɑ u ǹ dɑm mɔ u kɑ wɛ̃mɑ. 4 Ǹ n mɛn nɑ, ɑ kɑnɑru koowo bɛsɛ be sɑ ginɑ tien sɔ̃. Sɔrɔkudo Gusunɔ wunɛn Yinni u ko n Asirin sinɑ bokon gɑri yi nuɑ wi u nɑ u nùn wɔnwɑ. Kpɑ u nùn sɛɛyɑsiɑ.
5 Ye Esɑi u Esekiɑsin bwɑ̃ɑ ben gɑri yi nuɑ, 6 yerɑ u bu sɔ̃ɔwɑ u nɛɛ, ye i ko i bɛɛn yinni sɔ̃ wee. I nɛɛ, ɑmɛniwɑ Yinni Gusunɔ u geruɑ. U nɛɛ, u ku de gɑri yi u nuɑ mi, yi nùn bɛrum ko, ye Asirin sinɑ bokon gɔro be, bɑ kɑ wi Yinni Gusunɔ wɔnwɑ mi. 7 U koo de Asirin sinɑ boko wi, u lɑbɑɑri gɑɑ nɔ kpɑ yu win bwɛ̃rɑ gɔsiɑ u wurɑ win temɔ. Miyɑ u koo de bu nùn go kɑ tɑkobi.
Asirigibu
bɑ mɑɑ Yudɑbɑ nɑndɑsiɑ
(I mɑɑ mɛɛrio Esɑi 37:8-13 kɑ Bɑndun Gɑri II, 32:17)
8 Asirin sinɑ bokon gɔro wi, u gɔsirɑ u dɑ Libinɑɔ. Domi u nuɑ mɑ win yinni u doonɑ Lɑkisin di u dɑ u Libinɑgii be tɑbu wɔri. 9 Sɑɑ ye sɔɔrɑ Asirin sinɑ boko u nuɑ mɑ Tirɑkɑ Etiopin sinɑ boko u nùn tɑbu wɔrim wee. Yerɑ u mɑɑ Esekiɑsi sɔmɔbu gɔriɑ u nɛɛ, 10 ɑmɛniwɑ i ko i Esekiɑsi sinɑ boko sɔ̃. I nɛɛ, u ku de Gusunɔ win Yinni wi u nɑɑnɛ sɑ̃ɑ mi, u nùn nɔni wɔ̃ke, u nɛɛ, nɛ, Asirin sinɑ boko nɑ ǹ kpɛ̃ n Yerusɑlɛmu mwɑ. 11 Wi Esekiɑsin tii u nuɑ nge mɛ bɛsɛn sinɑm be bɑ mɑn gbiiye bɑ rɑɑ tem mɛ mu tiegibu kpuro kɑm koosiɑ. Yerɑ wi, u tɑmɑɑ u koo yɑri win nɔmɑn di? 12 Sɑnɑm mɛ nɛn bɑɑbɑbɑ bɑ Gosɑni kpeerɑsiɑ kɑ Hɑrɑni kɑ Resɛfu kɑ sere Edɛnigibu, be bɑ wɑ̃ɑ Telɑsɑɑɔ, ben bũnu kpĩɑ nu bu yɑrɑ? 13 Nge mɑnɑ Hɑmɑtigibun sunɔ u wɑ̃ɑ kɑ Aɑpɑdigibun sunɔ kɑ Sefɑɑfɑimugibun sunɔ, kɑ Henɑgibun sunɔ kɑ sere mɑɑ Ifɑgii.
Esekiɑsin kɑnɑru
(I mɑɑ mɛɛrio Esɑi 37:14-20)
14 Ye Asirin sinɑ bokon sɔmɔ be, bɑ turɑ Esekiɑsin mi, yerɑ bɑ nùn tireru wɛ̃ tè sɔɔ ben yinnin gɑri wɑ̃ɑ. Mɑ Esekiɑsi u tu gɑrɑ. Yen biru u dɑ Gusunɔn sɑ̃ɑ yerɔ mɑ u tu dɛriɑ mi. 15 U kɑnɑru kuɑ u nɛɛ, Gusunɔ bɛsɛn Yinni, wunɛ wi ɑ sɔ̃ gɔrɑdobɑn suunu sɔɔ, wunɛ turowɑ ɑ sɑ̃ɑ sinɑmbu kpuron Yinni. Wunɑ ɑ wɔllu kɑ tem tɑkɑ kuɑ. 16 A nɔni seeyo ɑ mɛɛri, kpɑ ɑ swɑɑ dɑki ɑ nɛn gɑri nɔ. Kpɑ ɑ Sɑnkeribu Asirin sunɔn gɑri nɔ, wi u win sɔm kowobun wirugii gɔrimɑ u kɑ nun wɔmɛ. 17 Kɑ gem, Yinni, nɑ yɛ̃ mɑ Asirin sinɑmbu bɑ bwese dɑbinu kpeerɑsiɑ kɑ nin tem. 18 Mɑ bɑ nin bwɑ̃ɑrokunu dɔ̃ɔ mɛniki. Domi nu ǹ sɑ̃ɑ Gusunɔ. Nu sɑ̃ɑwɑ tɔmbun sɔmɑ ye bɑ kuɑ kɑ dɑ̃ɑ kɑ kpenu. Yen sɔ̃nɑ bɑ kpĩɑ bɑ nu kpeerɑsiɑ. 19 Adɑmɑ wunɛ, ɑ sɑ̃ɑwɑ Gusunɔ bɛsɛn Yinni. A sun wɔro sɑɑ Sɑnkeribun nɔmɑn di kpɑ hɑnduniɑn sinɑmbu kpuro bu giɑ mɑ wunɛ turowɑ ɑ sɑ̃ɑ Gusunɔ.
Esɑin gɑri
yi u sinɑ boko nɔɔsiɑ
(I mɑɑ mɛɛrio Esɑi 37:21-35)
20 Yerɑ Esɑi Amɔtin bii u Esekiɑsi sɔmɔ gɔriɑ u nɛɛ, bu nùn sɔ̃ mɑ Gusunɔ Isirelibɑn Yinni u win kɑnɑru mwɑ te u kuɑ Sɑnkeribu Asirin sinɑ bokon sɔ̃. 21 Ye Yinni Gusunɔ u geruɑ win sɔ̃, ye wee. U nɛɛ,
Yerusɑlɛmun tɔmbu kpuro bɑ nùn gɛmɑ.
Bɑ nùn yɑɑkoru mɔ̀.
Bɑ nùn yɛ̃ɛmɔ bɑ wii gimɑnu koosimɔ.
22 Wɑrɑ u kɑm mɛɛrɑ. Wɑrɑ u wɔnwɑ.
Wɑrɑ u kɑ nɔɔ gɔmunu mɔ̀.
U ǹ yɛ̃ mɑ wi, Gusunɔ, Isirelibɑn Yinnin tii
wi u dɛɛren wuswɑɑɔrɑ u tii sue?
23 Win sɔmɔbɑ nɑ, bɑ wi, Yinni Gusunɔ wɔnwɑ.
Mɑ u nɛɛ, kɑ win tɑbu kɛkɛ dɑbirɑ
u yɔɔwɑ Libɑnin guu ni nu bon wɔllɔ.
Mɑ u duɑ sere sere yen dɑ̃ɑ sɔ̃ɔn sɔɔwɔ
u gen dɑ̃ɑ geɑ ye bɑ mɔ̀ sɛduru kɑ sipɛrɛ
ye yɑ gunum bo bɔɔrɑ.
24 U nɛɛ, u bwiɑ gbɑ.
Mɑ u tem tukum nim nɔrɑ.
Win tɑbu kowobu bɑ bɔsu
Egibitin nim tori kpuro sɔɔ
bɑ yi sɑnkɑ.
25 Adɑmɑ u ǹ yɛ̃ mɑ wi, Yinni Gusunɔn tiiwɑ
u yenibɑn himbɑ yi sɑɑ yellun di?
Wee tɛ̃, himbɑ ye, yɑ koorɑ.
Mɑ u derɑ wi, Asirin sinɑ boko
u wuu si su gbɑ̃rɑnu mɔ bɑnsu koosiɑ.
26 Yinni Gusunɔwɑ u derɑ wuu sin tɔmbɑ bɛrum soorɑ,
bɑ wɑ̃ɑ sekuru sɔɔ.
Bɑ kuɑ dɑm sɑrirugibu nge yɑkɑsu gberɔ,
ǹ kun mɛ, nge doo gɑ̃ɑru te gɛmi di.
27 Yinni Gusunɔ wi, u mɑɑ nɛɛ,
u yɛ̃ sɑɑ ye Asirin sinɑ boko wi,
u rɑ sinɛ kɑ sɑɑ ye u rɑ du dirɔ
kɑ sɑɑ ye u rɑ yɑri,
kɑ mɑɑ sɑɑ ye u kɑ nùn mɔru mɔ̀.
28 Tɛ̃ yèn sɔ̃ u kɑ Yinni Gusunɔ mɔru mɔ̀
mɑ u nùn gɑri sɔ̃ɔwɑ kɑ tii suɑbu,
u koo win wɛ̃ru yɑbɑ u yɔni doke.
Kpɑ u mɑɑ nùn yɑrukɑ dokeɑ nɔɔwɔ.
Kpɑ u de u gɔsirɑ u wurɑ mìn di u nɑ.
29 Mɑ Esɑi u Esekiɑsi sɔ̃ɔwɑ u nɛɛ, wee ye yɑ ko n sɑ̃ɑ yĩreru wunɛn mi. Gisɔku ge, kɑ gɑsɔku, doo gɑ̃ɑriyɑ i ko i di. Adɑmɑ wɔ̃ɔ itɑse i ko i duurewɑ kpɑ i gɛ̃. Mɛyɑ i ko i mɑɑ resɛm duure kpɑ i yen mɑrum di. 30-31 Yudɑbɑn bweseru sɔɔ, be bɑ tiɑrɑ Siɔnin guurɔ Yerusɑlɛmuɔ bɑ koo fɑɑbɑ wɑ kpɑ bu kpɑrɑ nge dɑ̃ɑ, kpɑ bu gbini ko sere tem sɔɔwɔ kpɑ bu binu mɑ. Yeniwɑ Gusunɔ, wɔllu kɑ tem Yinni u koo ko win hɑniɑn sɔ̃. 32 U geruɑ u nɛɛ, Asirin sinɑ boko wi, u ǹ duɔ Yerusɑlɛmuɔ. Mɛyɑ win tɑbu kowobu bɑ ǹ ye susiɔ bɑ n tɛrɛnu nɛni bu kɑ kuku yenu ko bu sere nɛɛ, bɑ koo sɛ̃u to. 33 Swɑɑ ye u kɑ nɑ, yerɑ u koo kɑ gɔsirɑ, u ǹ duɔ wuu ge sɔɔ. Yinni Gusunɔn tiiwɑ u geruɑ mɛ. 34 Domi u koo wuu ge kɔ̃suwɑ u gu fɑɑbɑ ko win tiin sɔ̃, kɑ mɑɑ Dɑfidi win sɔm kowon sɔ̃.
Yinni Gusunɔ
u Asirigibu kɑmiɑ
(I mɑɑ mɛɛrio Esɑi 37:36-38 kɑ Bɑndun Gɑri II, 32:21-22)
35 Ye n kuɑ wɔ̃kuru yerɑ Yinni Gusunɔn gɔrɑdo u yɑrɑ u dɑ Asirigibun sɑnsɑniɔ mɑ u tɔnu nɔrɔbun subɑ wunɑɑ wɛnɛ kɑ nɔɔbu (185.000) go. Ye bɑ seewɑ bururu, bɑ deemɑ wee gonɑ nu tɛrie. 36 Yerɑ Sɑnkeribu Asirin sinɑ boko u gɔsirɑ u dɑ u wɑ̃ɑ Ninifuɔ. 37 Sɔ̃ɔ teeru u dɑ u yiire win bũu wi bɑ rɑ soku Nisɔrɔkun nuurɔ. Miyɑ win bibu yiru beni, Adɑmɛlɛki kɑ Sɑrɛsɛɛ bɑ nùn go kɑ tɑkobi. Mɑ bɑ kpikiru suɑ bɑ dɑ tem mi bɑ mɔ̀ Arɑrɑti giɑ. Mɑ win bii Esɑɑ Hɑdoni u bɑndu kɔsire kuɑ.