Sunɔ geo
32
1 Sɔ̃ɔ teeru goo u koo yɑri u bɑndu di
kpɑ wi kɑ win bwɑ̃ɑbu bu tem mɛ kpɑrɑ gem sɔɔ.
2 Ben bɑɑwure u ko n sɑ̃ɑwɑ nge kuku yeru woo bɔkɔn sɔ̃,
ǹ kun mɛ nge dɑɑru mi kɑkoru sɑri,
ǹ kun mɛ nge kpee bɑkɑrun sɑɑru
mi dɑ̃ru gɑru sɑri.
3 Be n weenɛ bu yɑm wɑ, ben nɔni koo wukiɑrɑ.
Be n weenɛ bu gɑri swɑɑ dɑki, bɑ koo nɔ sɑ̃ɑ sɑ̃ɑ.
4 Be bɑ ku rɑ bwisiku bɑ koo
kɑsu bu giɑ.
Be bɑ mɑɑ bebirimɔ bɑ koo gɑri gere dee dee
tɔmbu bu kɑ nɔ.
5 Bɑ ǹ mɑɑ gɑri bɔkɔ sokumɔ tɔn boko.
Mɛyɑ bɑ ǹ mɑɑ tɔn kɔ̃so sokumɔ tɔn geo.
6 Domi gɑri bɔkɔ u rɑ gɑri swiniwɑ.
Kɔ̃sɑ sɔɔrɑ win bwisikunu nu rɑ n woo.
Win kookoosu kɑ win gɑri kpuro ku rɑ Gusunɔ bɛɛrɛ wɛ̃.
Mɛyɑ u ku rɑ wi u gɔ̃ɔru bɑrɔ dĩɑnu kɛ̃.
U ku rɑ mɑɑ wi nim nɔru gɑ mɔ̀ nim kɛ̃.
7 Tɔn kɔ̃son kookoosu kpuro su ku rɑ n wɑ̃.
U rɑ kpunɑɑ dɑbinu kowɑ
u kɑ bwɛ̃ɛbwɛ̃ɛ kɑm koosiɑ kɑ weesu,
bɑɑ bwɛ̃ɛbwɛ̃ɛ wi, ù n gem mɔ.
8 Adɑmɑ tɔn geo, kpunɑɑ geɑ u rɑ ko.
U rɑ n mɑɑ yɔ̃wɑ gem sɔɔ dim dim.
Bɑ Yerusɑlɛmun tɔn kurɔbu
kirɔ mɔ̀
9 Bɛɛ tɔn kurɔbu,
bɛɛ be i kun bwisikunu gɑnu mɔ bɛɛn wɑ̃ɑru sɔɔ,
i seewo i nɛn gɑri nɔ.
Bɛɛ wɔndiɑ gɑru koo sɑribɑ,
i mɑn swɑɑ dɑkio.
10 Gɑsɔku ɑmɑdɑɑre, i ko i wururɑ,
domi i ǹ mɑɑ resɛm wɑsi i sɔri.
11 I de i nɑndɑ
bɛɛ be i ǹ bwisikunu mɔ bɛɛn wɑ̃ɑru sɔɔ.
Bɛɛ gɑru koo sɑribɑ i diirio.
I bɛɛn yɑ̃nu potirio i yɔ̃rɑ bɑsi,
kpɑ i kĩɑsu dewe nuku sɑnkirɑnun sɔ̃.
12 I bɛɛn bwɑ̃su nɛnuɔ,
i kɑ nuku sɑnkirɑnu sɔ̃ɔsi,
yèn sɔ̃ bɛɛn gbee geenu
kɑ bɛɛn resɛm gbɑɑ geenu
nu koo kɑm ko.
13 Wee Yinni Gusunɔn tɔmbun tem
kɑ yɛnu gèn mi nuku dobu rɑɑ wɑ̃ɑ,
n koo ko bɑnsu,
kpɑ sɑ̃ki yi kpi mi.
14 Bɑ koo ben sinɑ kpɑɑru biru kisi
kpɑ Yerusɑlɛmu ye yɑ rɑɑ tɔmbu yibɑ bu ye deri.
Yen guuru kɑ yen kɔ̃sobun wɑ̃ɑ yenu nu koo ko bɑnsu.
Yɛɛ kpiki yi ko n dɑ bɔsu mi,
kpɑ bu mɑɑ yɑɑ sɑbenu kpɑrɑ mi.
Yerusɑlɛmun seebu
15 Adɑmɑ Gusunɔn Hunde u koo sɑrɑmɑ wɔllun di
u n wɑ̃ɑ bɛsɛ sɔɔ.
Sɑɑ yerɑ mi dĩɑnu ku rɑ rɑɑ kpi, n koo dĩɑnu ko,
kpɑ yɑm mi dɑ̃nu kun dɑɑ dɑbi, n ko dɑ̃ɑ sɔ̃ɔ.
16 Sɑɑ ye sɔɔrɑ gem mu ko n wɑ̃ɑ
tem mɛ kpuro sɔɔ.
17 Mɛyɑ mu koo kɑ bɔri yɛndu nɑ,
kɑ wɛ̃rɑbu bɛrum sɑriru sɔɔ
sere kɑ bɑɑdommɑɔ,
18 kpɑ bɛsɛ Yinni Gusunɔn tɔmbu
sɑ n wɑ̃ɑ mi,
bɔri yɛndu sɔɔ dii nɑɑnɛginɔ.
19-20 Sɑ ko n wɑ̃ɑwɑ doo nɔɔru sɔɔ
sɑ n dĩɑnu duurumɔ mi nim mu wɑ̃ɑ,
kpɑ sɑ n bɛsɛn kɛtɛkunu kɑ bɛsɛn nɛɛ yɔ̃su yi n dimɔ bɑɑmɑ.
Adɑmɑ guru kpenu nu koo yibɛrɛbɑn tɑbu kowobu kɑm koosiɑwɑ
be, be bɑ dɑbi nge dɑ̃ɑ sɔ̃ɔ,
kpɑ ben wuu ge, gu wɔrumɑ.