Egibitigibɑ sɑ̃ɑwɑ tɔmbu
31
1 Bɔ̃rurobɑ Yudɑ
be bɑ kpikiru dɔɔ Egibitiɔ bu kɑ somiru wɑ.
Bɑ ben nɑɑnɛ doke dumi sɔɔ,
kɑ tɑbu kɛkɛ dɑbi ni dumi gɑwe sɔɔ
kɑ sere mɑɑsɔ dɑmgibu sɔɔ.
Adɑmɑ bɑ ǹ Gusunɔ ben Yinni Dɛɛro kɑsu,
bu nùn nɑɑnɛ ko.
2 Yen sɔ̃nɑ win tii u yɛ̃ ye u mɔ̀.
U koo de kɔ̃sɑ yu nɑ.
U ǹ mɑɑ win gɑri kɔbiɑmɔ.
U koo tɔn kɔ̃sobu seesi,
kɑ mɑɑ be bɑ bu somimɔ.
3 Egibitigibu bɑ ǹ sɑ̃ɑ Gusunɔ,
bɑ sɑ̃ɑwɑ tɔmbu.
Mɛyɑ mɑɑ ben dumi yi ǹ dɑm tukum gɑm mɔ,
yi sɑ̃ɑwɑ yɛɛ diri.
Yinni Gusunɔ ù n win dɑm sɔ̃ɔsimɑ,
be bɑ somiru kɑsu kɑ be bɑ bu somiru wee,
bɑ koo sokurɑ bu wɔruku,
kpɑ be kpuro bu mɛnnɑ bu gbi.
Yinni Gusunɔ
u koo Yerusɑlɛmu kɔ̃su
4 Amɛniwɑ Yinni Gusunɔ u mɑn sɔ̃ɔwɑ u nɛɛ,
gbee sunɔ ge gɑ yɑɑ mwɑ gɑ wuri koosimɔ
gɑ ku rɑ yɑ̃ɑ kpɑrobun bɛrum ko,
bɑɑ bɑ̀ n dɑbi mɑ bɑ gu tɑrusi bɑ gbɑ̃sukumɔ.
Nge mɛyɑ wi, wɔllu kɑ tem Yinni, u ko n sɑ̃ɑ
ù n sɑrɑmɑ u kɑ Siɔnin guuru kɔ̃su, u tu sɑnnɑ.
5 Nge mɛ gue yi rɑ n yin binu kɔ̃su,
nge mɛyɑ wi, wɔllu kɑ tem Yinni,
u koo Yerusɑlɛmu yɑkiɑ u ye kɔ̃su.
6 Yen sɔ̃, bɛɛ Isirelibɑ, bɛɛ be i kɑ Yinni Gusunɔ wi tondɑ n kpɑ̃, i gɔ̃ru gɔsio kpɑ i wurɑmɑ win mi. 7 Domi sɑɑ yɑ sisi yè sɔɔ bɛɛn bɑɑwure u koo win bwɑ̃ɑroku ni u sekɑ kɑ sii geesu kɑ wurɑ wunɑ u kɔ̃ ni nu nùn durum koosiɑmɔ.
8 Mɛyɑ bɑ koo Asirigibu kɑm koosiɑ,
ɑdɑmɑ n ǹ kɑ tɔnun dɑm.
Bɑ koo duki yɑrinɑ tɑbu sɔɔ
kpɑ bu ben ɑluwɑɑsibɑ mwɛɛri bu yoo sɔmɑ koosiɑ.
9 Ben sinɑ boko u koo dukɑ yɑkurɑ bɛrum sɔ̃.
Kpɑ ben tɑbu sinɑmbu bu bɛrum soorɑ
bu ben gidi bɔrɑ biru kisi bu doonɑ.
Yeniwɑ Yinni Gusunɔ u geruɑ
wi bɑ rɑ sɑ̃ Yerusɑlɛmuɔ kɑ yɑ̃ku dɔ̃ɔ mwɑɑrɑruginu.