Bɔ̃rurobɑ bɛɛ tem gowobu
33
1 Bɔ̃rurobɑ bɛɛ, bɛsɛn yibɛrɛbɑ.
Domi i tɔmbu wɔri i ben yɑ̃nu gurɑ
mɑ i kɑ bu murɑfitiru kuɑ,
bɑɑ mɛ bɑ ǹ bɛɛ yen gɑɑ kuɑre.
Yen sɔ̃, ì n tɔmbu wɔri i kpɑ,
i ben yɑ̃nu gurɑ,
bɑ koo mɑɑ bɛɛ kuɑ nge mɛ.
Mɛyɑ sɑɑ ye i bu murɑfitiru kuɑ i kpɑ,
bɑ koo mɑɑ bɛɛ murɑfitiru kuɑ.
2 Yinni Gusunɔ, ɑ bɛsɛn wɔnwɔndu wɑɑwo,
wunɑ sɑ yĩiyɔ.
A de ɑ n sɑ̃ɑ bɛsɛn dɑm bururu bɑɑtere.
Kpɑ ɑ sun fɑɑbɑ ko sɑnɑm mɛ sɑ wɑ̃ɑ nɔni swɑ̃ɑru sɔɔ.
3 Yibɛrɛbɑ bɑ̀ n wunɛn nɔɔ dɑmguu nuɑ,
bɑ koo duki yɑkikirɑ.
À n mɑɑ seewɑ bɑ koo yɑrinɑ.
4 Tɔmbɑ koo ben yɑ̃nu wɔri bu gurɑ
nge mɛ twee yi rɑ tem wukiri
yi dĩɑnu kpuro di.
5 Yinni Gusunɔ u kpɑ̃,
domi u wɑ̃ɑ wɔllɔ.
U koo de win gem mu n yibɑ Siɔni kpuro sɔɔ.
6 Yinni Gusunɔ, kɑɑ de
Siɔnigibu bɑ n wɑ̃ɑ bɔri yɛndu sɔɔ,
kpɑ bɑ n bwisi kɑ lɑɑkɑri mɔ
ye yɑ koo de bu fɑɑbɑ wɑ.
Wunɛn nɑsiɑrɑ tɑ sɑ̃ɑ ben ɑrumɑni.
Bɑ fɑɑbɑ kɑnɑmɔ
7 Adɑmɑ tɛ̃, wee tɑbu durɔbu bɑ kuuki mɔ̀,
bɑ fɑɑbɑ kɑnɑmɔ.
Be bɑ gɔrɑ bu kɑ yibɛrɛbɑ suuru kɑnɑ bu nɔɔ tiɑ ko
bɑ kpɑnɑ, bɑ wuri mɔ̀.
8 Tɔmbu bɑ ku rɑ mɑɑ sĩ swɛɛ sɔɔ.
Domi yibɛrɛbɑ bɑ ben ɑrukɑwɑni kusiɑ.
Bɑ ǹ mɑɑ ben seedɑgibu yɛ̃.
Bɑ ǹ mɑɑ goon bɛɛrɛ yɛ̃.
9 Wee tɔmbu bɑ ben gbeɑ deri.
Libɑnin dɑ̃ɑ sɔ̃su su gberɑmɔ.
Mɑ Sɑronin tem gem mu kuɑ yɑni sɛɛri.
Bɑsɑnin berɑ giɑ kɑ guu te bɑ mɔ̀ Kɑɑmɛliɔ
dɑ̃nun wurusu dɛllɑmɔ.
10 Yinni Gusunɔ u bwese tukunu
sɔ̃ɔwɑ u nɛɛ,
yen sɔ̃ tɛ̃, kon se n yɔ̃rɑ,
kpɑ n sɔ̃ɔsi nge mɛ nɑ kpɑ̃ɑru nɛ.
11 Domi bɛɛn bwisikunu nu sɑ̃ɑwɑ
nge yɑkɑ bii yi bɑ duurɑ.
Nù n koorɑ, nu koo kɑm kowɑ nge yɑkɑ si.
Nɛn wɛ̃siɑru tɑ ko n sɑ̃ɑwɑ nge dɔ̃ɔ wi u koo bɛɛ mwɑ,
12 kpɑ i gɔsirɑ nge kuku ni bɑ dɔ̃ɔ mɛni,
ǹ kun mɛ nge sɑ̃ki yi bɑ bɔɔrɑ bɑ dɔ̃ɔ doke.
13 Bɛɛ be i tomɑ kɑ bɛɛ be i wɑ̃ɑ turuku,
i swɑɑ dɑkio i nɔ ye nɑ kuɑ,
kpɑ i giɑ nge mɛ nɛn dɑm mu nɛ.
14 Durumgibɑ nɑndɑ Siɔniɔ.
Be bɑ ǹ Yinni Gusunɔn bɛɛrɛ yɛ̃ bɑ diirimɔ bɑ mɔ̀,
Yinni Gusunɔ u sɑ̃ɑwɑ nge dɔ̃ɔ yɑri bɑkɑ ye yɑ ku rɑ gbi.
Wɑrɑ u koo kpĩ u yɔ̃rɑ win wuswɑɑɔ,
15 mɑ n kun mɔ wi u sĩimɔ gem sɔɔ,
mɑ u ku rɑ bwɛ̃ɛbwɛ̃ɛ tɑki di,
u ku rɑ mɑɑ nɔm birɑn kɛ̃ru mwɛ,
u ku rɑ tɔn gowobun gɑri swɑɑ dɑki,
u ku rɑ mɑɑ kɑ̃ u kɔ̃sɑ mɛɛri.
16 Tɔnu win bweserɑ ko n wɑ̃ɑwɑ nɑndɑbu sɑri
nge wi u kukuɑ kpee bɑɑ sɔɔ.
U koo mɑɑ wɑ u di, u nɔ.
Bɑ koo Yerusɑlɛmu wɔrɑ
17 Sɔ̃ɔ teeru, kɑɑ sinɑ boko wɑ
u wɑ̃ɑ win yiikon girimɑ sɔɔ,
u bɑndu dii tem bɑkɑm sɔɔ.
18 Kɑɑ wunɛn yellun bɛrum yɑɑyɑ
mɛ ɑ rɑɑ mɔ sɑɑ ye ɑ wɑ̃ɑ yoru sɔɔ,
kpɑ ɑ nɛɛ, mɑnɑ gbere mwɑɔbu bɑ wɑ̃ɑ.
Mɑnɑ wɔ̃ɔ gobigibu bɑ wɑ̃ɑ.
Mɑnɑ gbɑ̃rɑrun kɔ̃sobu bɑ wɑ̃ɑ.
19 A ǹ mɑɑ tɔn tuko be bɑ tii sue mi wɑsi,
be, bèn bɑrum ɑ ǹ nɔɔmɔ.
20 A Yerusɑlɛmu mɛɛrio
mi sɑ rɑ bɛsɛn tɔ̃ɔ bɑkɑnu ko.
Kɑɑ ye wɑ yɑ wɑ̃ɑ bɔri yɛndu sɔɔ.
Yɑ ko n sɑ̃ɑwɑ nge kuu bekurugiru
tèn dɑ̃nu bɑ ǹ mɑɑ wukɑmɔ.
Mɛyɑ bɑ ǹ mɑɑ ten wɛ̃ɛ kusiɑmɔ.
21 Miyɑ Yinni Gusunɔ u koo sun win girimɑ sɔ̃ɔsi.
U koo de sɑ n wɑ̃ɑ dɑɑ bɑkɑnun bɔkuɔ.
Adɑmɑ yibɛrɛbɑn goo nimkusu ku ǹ kpɛ̃ su sĩ mi,
bɑɑ si su kpɑ̃ɑru bo.
22-23 Wee, sin wɛ̃ɛ yi koo kɑsikirɑ,
kpɑ yi kun mɑɑ sin bekɑ nɛni gberebɑ sɔɔ
woo gu kɑ su bɔriɑ.
Yerɑ n koo de bu bu dukiɑ bɑkɑ gurɑri.
Bɑɑ kɑ yɛmɔbɔ bɑ koo dɑ mi,
bu kɑ yɑ̃ɑ ni gurɑ.
Yinni Gusunɔwɑ u ko n sɑ̃ɑ bɛsɛn siri kowo,
kpɑ u sun woodɑ wɛ̃.
Wiyɑ u ko n sɑ̃ɑ bɛsɛn sinɑ boko.
Kpɑ u sun fɑɑbɑ ko.
24 Goo kun mɑɑ gerumɔ u nɛɛ,
u bɑrɔwɑ.
Yinni Gusunɔ u koo Yerusɑlɛmugibu ben durum wɔkɑ.