Yinni Gusunɔ u koo Edɔmubɑ
sɛɛyɑsiɑ
34
1 Bɛɛ bwese tukunu, i susimɑ i nɔ.
I bɛɛn lɑɑkɑri kpĩiyɔ.
Tem mu swɑɑ dɑkio kɑ ye yɑ wɑ̃ɑ mɛ sɔɔ,
kɑ sere ye mu mɑrumɔ.
2 Domi wee, Yinni Gusunɔn mɔru yɑ koo tɔmbu kpuro wɔri
kɑ ben tɑbu kowobu sɔɔ kpuro.
U koo de bu goonɑ kpɑ bu kɑm ko.
3 Ben yɛm mu ko n kokumɔ sɑɑ guunun di.
Ben gonu ko n kɔ̃ɔkire,
kpɑ nin nuburɑ n pusɑ.
4 Wɔllun kperi kɑ suru kɑ sɔ̃ɔ koo wukurɑ,
kpɑ wɔllu tu kure nge tireru,
kpɑ kperi yi, yi wɔruku nge dɑ̃ɑ wuru si su dɛllɑ.
5 Yinni Gusunɔn tɑkobi yɑ yɛm debɑ wɔllɔ.
Wee, yɑ koo sɑrɑmɑ yu Edɔmubɑ wɔri,
be u siri u nɛɛ, bu kɑm koosio.
6 Wee, tɑkobi ye, yɑ yɛm kɑ yɑɑ gum yibɑ.
N sɑ̃ɑre u kɑ yɑ̃ɑnu kɑ bonu yɑ̃kuru mɔ̀ Botisirɑɔ.
Tɔn dɑbirɑ bɑ sɑkirɑ Edɔmu kpuro sɔɔ.
7 Gbeeku kɛtɛbɑ kɑ nɛɛ, yi wɔrukumɔ kɑ be sɑnnu.
Mɑ yɛm mu tem wukiri mɑ tuɑ yɑ gum kure.
8 Domi sɑɑ yɑ tunumɑ
Yinni Gusunɔ u kɑ win yibɛrɛbɑ mɔru kɔsiɑ.
Kpɑ u bu sɛɛyɑsiɑ Siɔnin sɔ̃.
9 Edɔmun nim mu koo gɔsirɑ kontɑɑ.
Kpɑ yen tuɑ yu ko nge gbim.
Kpɑ yen tem mu dɔ̃ɔ mwɑɑrɑ nge kontɑɑ.
10 Dɔ̃ɔ wi, u ǹ gbimɔ sɔ̃ɔ sɔɔ kɑ wɔ̃kuru.
Win wiisu su ko n seewɑwɑ sere kɑ bɑɑdommɑɔ.
Kpɑ tem mɛ, mu kɑm ko mɑm mɑm.
Goo kun mɑɑ sɑrɔ mi.
11 Gunɔ sɑrenu kɑ duuru bɛɛkunɑ
nu ko n wɑ̃ɑ mi.
Boorosu kɑ gbɑnɑmgbɑɑnɑ
nu koo sokunu ko mi.
N koo kowɑ bɑtumɑ dirɑ.
12 Ben sinɑ bibu kpurowɑ bɑ koo kɑm ko.
Goo kun ko n mɑɑ wɑ̃ɑ
wi u koo bɑndu di mi.
13 Kikisu kɑ sɑ̃ki kɑ ɑwĩi yi koo kpi
ben sinɑ kpɑɑnɔ kɑ ben kuku yenɔ,
kpɑ nu ko purukɑnu kɑ tɑɑtɑɑnun wɑ̃ɑ yenu,
14 kpɑ gbeeku yɛɛ yi n kɑ dɛmɑkunu yinnɑmɔ mi,
kpɑ bonu nu n sokunɑmɔ gbɑburu mi.
Miyɑ wɔ̃kurun siinibɑ bɑ ko n ben wɑ̃ɑ yeru mɔ
kpɑ bɑ n wɛ̃re mi.
15 Wɛɛ yi koo yin wɑ̃ɑ yeru ko mi,
yi sɛ̃ɑ ke kpɑ yi kɔwɑ,
kpɑ yi yin binu gure yin kɔkɔrɔ.
Miyɑ yɑberekunu nu koo mɑɑ mɛnnɑ.
16 I Yinni Gusunɔn tireru wukio kpɑ i gɑri. I ko wɑ mi bɑ yoruɑ bɑ nɛɛ,
yɛɛ yinin gɑɑ kun biɑrɑmɔ mi.
Yi kpuro yi koo nɑwɑ.
Domi win tiin nɔɔwɑ gɑ ye geruɑ.
Win Hundewɑ u koo mɑɑ yi mɛnnɑ.
17 Wiyɑ u tem mɛ yĩirɑ,
mɑ u mu yin bɑɑyere bɔnu kuɑ kɑ tɛtɛ,
mu n kɑ sɑ̃ɑ yigim,
kpɑ yi n wɑ̃ɑ mi sere kɑ bɑɑdommɑɔ.