Esɑi 35

Dɛɛrobun swɑɑ

¹ Sɑnɑm mɛ sɔɔ, tem mi gɑ̃ɑnu ku rɑ kpi,

mu koo tem wurɑmɑ

kpɑ mu biibii burɛ kpi.

² Kpɑ nuku dobu bu sɔ̃ɔsirɑ mi,

kɑ womusu kɑ nɑsɑrɑn kuuki.

Mu ko n girimɑ mɔ

nge Libɑnin dɑ̃ɑ sɔ̃ɔ.

Mu ko n bɛɛrɛ mɔ

nge guu te bɑ mɔ̀ Kɑɑmɛli kɑ Sɑronin tem gem.

Sɑɑ ye sɔɔ, bɑ koo Yinni Gusunɔn yiiko wɑ

kɑ yen girimɑ.

³ Yen sɔ̃ tɛ̃,

bɛɛ be i wɑsire, i nɔmɑ sɑ̃ɑre,

i tii tɑ̃sisio i nɔmɑ suɑ.

Bɛɛ be i diirimɔ,

i de bɛɛn dũɑ yi dɑm ko.

⁴ Bɛɛ bèn gɔ̃ru gɑ ǹ kpĩ,

i ku nɑndɑ. I tii dɑm kɛ̃ɔ.

Domi Gusunɔ bɛɛn Yinni u sisi u bɛɛ mɔru bɑrɑ,

kpɑ u bɛɛn yibɛrɛbɑ kɔsie ye bɑ bɛɛ kuɑ.

Win tiiwɑ u koo nɑ u bɛɛ fɑɑbɑ ko.

⁵ Sɑɑ yerɑ wɔ̃kobun nɔni koo wukiɑrɑ,

kpɑ sosobu bu gɑri nɔ,

⁶ kpɑ kɔ̃ri kpirinugibu bɑ n yɔ̃ɔkumɔ nge kpɑsi.

Mɛyɑ wi u ku rɑ kpĩ u gɑri gere,

win yɑrɑ koo kusiɑrɑ

kpɑ u n nɔɔgiru mɔ̀ kɑ nuku dobu.

Nim mu koo yɑri mu koku

tem mi gɑ̃ɑnu ku rɑ kpi sɔɔ,

⁷ kpɑ yɑni sɛɛri mi sɔ̃ɔ rɑ gɛm wɔ̃ yi ko yɛru,

kpɑ dɑru koki yi yɑri

mi tem mu gbere,

kpɑ nɑɑ yɑri kɑ gbĩi yi kpi

mi gbeeku bɔ̃nu nu rɑ kuke.

⁸ Miyɑ bɑ koo swɑɑ yɑrɑ bu ye

soku dɛɛrobun swɑɑ.

Durumgii goo kun dɔɔ mi.

Be bɑ ye swĩi, bɑ ǹ kɔ̃ɔrɑmɔ,

bɑɑ be bɑ ǹ bwisi mɔ.

⁹ Gbee sunɔ ǹ kun mɛ yɑɑ gɔbɑ gɑɑ kun swɑɑ ye sĩimɔ.

Be Yinni Gusunɔ u fɑɑbɑ kuɑ,

beyɑ bɑ koo swɑɑ ye mwɑ,

¹⁰ bu kɑ dɑ Siɔniɔ kɑ nɑsɑrɑn womusu.

Ben wuswɑɑ yɑ n nuku dobu sɔ̃ɔsimɔ bɑɑdommɑ,

kpɑ weeweenu kɑ nuku sɑnkirɑnu nu bu doonɑri.