Sɑlomɔɔ u diru bɑnɑ tèn mi
bɑ kon dɑ Yinni Gusunɔ sɑ̃
(I mɑɑ mɛɛrio Bɑndun Gɑri II, 3:1-14)
6
1 Ye Yuubɑ bɑ yɑrɑ Egibitin di n kuɑ wɔ̃ɔ nɛɛru kɑ wɛnɛ (480), yerɑ Sɑlomɔɔ u diru bɑnɑ toruɑ tèn mi bɑ ko n dɑ Yinni Gusunɔ sɑ̃. N deemɑ win bɑndun wɔ̃ɔ nnɛsen suru yiruse sɔɔrɑ mi.
2 Dii te u bɑnɑ mi, ten dɛ̃ɛbu sɑ̃ɑwɑ gɔm soonu wɑtɑ. Mɑ ten yɑsum mu sɑ̃ɑ gɔm soonu yɛndu. Ten gunum mɑɑ gɔm soonu tɛnɑ. 3 Dii ten duu yee gbiikirun dɛ̃ɛbu sɑ̃ɑwɑ gɔm soonu yɛndu. Duu yee ten yɑsum kɑ dii ten tiin yɑsum tiɑ. Mɑ ten gunum mu sɑ̃ɑ gɔm soonu wɔkuru. 4 Sinɑ boko Sɑlomɔɔ u derɑ bɑ dii te fɛnɛntibɑ kuɑ bɑ sisu kɑre. 5 Yerɑ u mɑɑ gidɑmbisɑ ye yɑ dinu itɑ mɔ gɔri ten yɛ̃si yɛ̃sikɑɔ kɑ ten biruɔ. 6 Gidɑmbisɑ yen dii temkirun yɑsum mu sɑ̃ɑwɑ gɔm soonu nɔɔbu. Te tɑ mɑɑ wɑ̃ɑ suunu sɔɔ, tegim mɑɑ gɔm soonu nɔɔbɑ tiɑ. Itɑserugim mɑɑ sɑ̃ɑwɑ gɔm soonu nɔɔbɑ yiru. N deemɑ sɑ̃ɑ yee ten gɑnɑ yɑ sinum mɔ temɔ, ɑdɑmɑ gidɑmbisɑn dii temkirun wɔllɔ bɑ yen sinum kɑwɑwɑ gɔm soo teeru dɑɑsin dɑ̃ɑ yii yerun sɔ̃. Dii suunukirun wɔllɔ bɑ mɑɑ yen sinum kɑwɑ gɔm soo teeru dɑɑsin dɑ̃ɑ yii yerun sɔ̃. Bɑ yeni kuɑwɑ domi bɑ ǹ kĩ bu sɑ̃ɑ yee ten gɑnɑ yɑbɑ. 7 Ye bɑ dii te bɑnimɔ, bɑ tu bɑnɑwɑ kɑ kpee ni bɑ rɑɑ dɑ̃kɑ ten sɔ̃. Yen sɔ̃nɑ bɑ ǹ sɔm yɑ̃nu gɑnun dɑmu nuɑ mi, ni bɑ kuɑ kɑ sisu, bɑɑ mɑtɑlɑkɑ ǹ kun mɛ gbɑ̃ɑ. 8 Gidɑmbisɑ yen kɔnnɔsu, su wɑ̃ɑwɑ sɔ̃ɔ yɛ̃sɑn nɔm dwɑru giɑ. Mɑ bɑ yɔɔtii bɑnɑ sɑɑ tem di bu kɑ yɔ yen dii wɔrukirɔ. 9 Ye Sɑlomɔɔ u dii te bɑnɑ u kpɑ, yerɑ u tu kpɛ kɑ sɛdurun dɑ̃ɑ bɛsi, kɑ dɑ̃ɑ yen bĩinu. 10 Gidɑmbisɑ yen diru bɑɑteren gunum mu sɑ̃ɑwɑ gɔm soonu nɔɔbu. Mɑ u dii nin dɑɑsi dɑ̃ɑ sɔndi sɔndi nin ɑyenɔ, sɑ̃ɑ yee ten gɑnɑ wɔllɔ.
11 Mɑ Yinni Gusunɔ u kɑ Sɑlomɔɔ gɑri kuɑ u nɛɛ, 12 wee, ɑ mɑn diru bɑniɑmmɛ. Mɛyɑ ɑ̀ n mɑɑ nɛn yiirebu kɑ nɛn woodɑbɑ mɛm nɔɔwɑmmɛ, kon nɛn nɔɔ mwɛɛru yibiɑ te nɑ wunɛn tundo Dɑfidi kuɑ wunɛn sɔ̃. 13 Ko nɑ n wɑ̃ɑ dii te sɔɔ nɛn tɔmbu Isirelibɑn suunuɔ, nɑ ǹ bu derimɔ.
Dii ten sɔɔn burɑ yɑ̃nu
14 Ye Sɑlomɔɔ u dii te bɑnɑ u kpɑ, 15 yerɑ u derɑ bɑ ten sɔɔn gɑni wukiri kɑ dɑ̃ɑ dɑmgiɑ ye bɑ mɔ̀ sɛdurun bɛsi, sɑɑ yin tem di sere bɑ kɑ dɑɑsi girɑri. Mɑ u mɑɑ dɑ̃ɑ dɑmgiɑ ye bɑ mɔ̀ sipɛrɛ tɛriɑ ten temɔ. 16 Yerɑ u dii ten sɔɔwɔ burɑnɑ kɑ sɛdurun dɑ̃ɑ sɑɑ ten tem di sere kɑ dɑɑsiɔ, mɑ n kuɑ dii sɔɔ gèn yɑsum kuɑ gɔm soonu yɛndu. Mɑ u gu kuɑ dii te tɑ dɛɛre gem gem. 17 Sɑ̃ɑ yee ten ɑdɛrɔn dɛ̃ɛbu bu sɑ̃ɑwɑ gɔm soonu weeru. 18 Sɛdurun dɑ̃ɑ ye bɑ doke dii ten gɑni sɔɔ mi, bɑ ye sɔɔ bwɑ̃ɑnu kɑ biibiin weenɑsii yoruɑ. Dii ten gɑnɑn gɑm sɑri mi n tere. 19 Dii sɔɔ ge u kuɑ sɑ̃ɑ yee ten suunu sɔɔ mi, u gu kuɑwɑ u kɑ Yinni Gusunɔn woodɑn kpɑkoro te yi mi. 20 Dii sɔɔ gen dɛ̃ɛbu bu sɑ̃ɑwɑ gɔm soonu yɛndu. Mɑ gen yɑsum mɑɑ sɑ̃ɑ gɔm soonu yɛndu. Mɑ gen gɑnin gunum mɑɑ sɑ̃ɑ gɔm soonu yɛndu. Mɑ u yi wurɑ wukiri. U mɑɑ derɑ bɑ kpɑkororu gɑru kuɑ kɑ sɛdurun dɑ̃ɑ, bɑ wurɑ pote. Mɑ bɑ tu yi dii sɔɔ gen kɔnnɔwɔ. 21 Mɑ u derɑ bɑ wurɑn tii tii doke sɑ̃ɑ yee ten sɔɔwɔn gɑniɔ kɑ ten temɔ. U mɑɑ wurɑn sum piiminu kuɑ u doke dii te tɑ dɛɛre gem gem kɔnnɔwɔ. Niyɑ bɑ kɑ beku kɑre te gɑbe. 22 U wurɑ dokewɑ dii ten sɔɔwɔ kpuro, sere kɑ kpɑkoro te tɑ wɑ̃ɑ dii te tɑ dɛɛre gem gem kɔnnɔwɔ.
23 Mɑ u wɔllun kɔ̃sobun weenɑsibu yiru gɛɛ kuɑ kɑ dɑ̃ɑ dɑmgiɑ u doke dii te tɑ dɛɛre gem gem sɔɔ. Yin gunum mu sɑ̃ɑwɑ gɔm soonu wɔkuru. 24 Yin kɑsɑn dɛ̃ɛbu bu sɑ̃ɑwɑ gɔm soonu nɔɔbu nɔɔbu. Yin kɑsi yiru ye yɑ girɑrinɛ mi, yin dɛ̃ɛbu kuɑwɑ gɔm soonu wɔkuru. 25-26 Wɔllun kɔ̃sobun weenɑsii be, bɑ weenɛwɑ mɑm mɑm. Bɑ mɑɑ gunum kɑ yɑsum nɛwɑ. 27 Sɑlomɔɔ u bu yɔ̃rɑsiɑ dii te tɑ dɛɛre gem gem suunu sɔɔ. Bɑ kɑsɑ dɛmiɛ. Turon kɑse teeru tɑ gɑnɑ gee girɑri. Mɑ turogirɑ mɑɑ gɑnɑ giɔ girɑri. Mɑ kɑsɑ yiru yeni, yɑ yinnɛ dii ten suunu sɔɔ. 28 Mɑ u yi kpuro wurɑ pote.
29 Yen biru, u derɑ bɑ dii ten sɔɔwɔ kɑ ten ɑdɛrɔwɔ wɔllun kɔ̃sobun weenɑsibu kuɑ gɑni sɔɔ, kɑ sere mɑɑ kpɑkpɑ wurusu, kɑ biibiibɑn weenɑsii. 30 Mɑ u sɑ̃ɑ yee ten temɔ kpuro wurɑ doke.
31 Yerɑ u gɑmbo sikɑnɛbɑ doke dii te tɑ dɛɛre gem gem kɔnnɔwɔ ye bɑ kuɑ kɑ dɑ̃ɑ dɑmgiɑ. Gɑmbo ye, kɑ yen kɑdirin yɑsum mu kɑ gɑnɑ yen bɔnu nɔɔbun tiɑ nɛ. 32 Dɑ̃ɑ dɑmgiɑ bɑ kɑ gɑmbo sikɑnɛ be kuɑ. Mɑ bɑ wɔllun kɔ̃sobu kɑ kpɑkpɑ wurusu kɑ biibiibɑn weenɑsii yoruɑ gɑmbo ye sɔɔ. Yerɑ u ye kpuro wurɑ pote, mɑ yɑ kuɑ burɑru. 33 U mɑɑ derɑ bɑ sɑ̃ɑ yee ten kɔnnɔn gɑmbon kɑdiri kuɑ kɑ dɑ̃ɑ dɑmgiɑ. Mɑ u ye gɑmbo sikɑnɛbɑ dokeɑ ye bɑ kuɑ kɑ dɑ̃ɑ ye bɑ mɔ̀ sipɛrɛ. Gɑmbo ye, kɑ yen kɑdirin yɑsum mu kɑ gɑnɑ yen bɔnu nnɛn tiɑ nɛ. 34 Dɑ̃ɑ yen bɛsi yiru yiruwɑ bɑ doke gɑmbo sikɑnɛ yen bɑɑyere sɔɔ. Bɑ̀ n ye kɛniɑ kpɑ yu tii kure. 35 Mɑ bɑ wɔllun kɔ̃sobu kɑ kpɑkpɑ wurusu kɑ biibiin weenɑsii yoruɑ gɑmbo ye sɔɔ. Mɑ u ye kpuro wurɑ doke.
36 Mɑ bɑ dii te ɑgbɑrɑ toosi bɑ kɑ sikerenɑ. Bɑ yen gɑnɑ kuɑwɑ kpenu itɑn sɔkenun sɑkɑ. Mɑ bɑ sɛdurun dɑ̃ɑ bĩinu sɔndi yen wɔllɔ.
37 Sɑlomɔɔn bɑndun wɔ̃ɔ nnɛsen suru yiruse sɔɔrɑ bɑ Yinni Gusunɔn sɑ̃ɑ yee ten kpɛɛkpɛɛku swĩi. 38 Mɑ bɑ dii te bɑnɑ bɑ kpɑ kɑ ten bɑɑyere kpuro nge mɛ bɑ ten kpunɑɑ yi, win bɑndun wɔ̃ɔ wɔkurɑ tiɑsen suru nɔɔbɑ itɑse sɔɔ.
Sɑlomɔɔ u dii te bɑnɑwɑ wɔ̃ɔ nɔɔbɑ yiru.