5
1 Sinɑm be bɑ wɑ̃ɑ sɑɑ dɑɑ te bɑ mɔ̀ Efɑrɑtin di sere n kɑ girɑri Filisitibɑn temɔ, n kɑ dɑ Egibitin dɑɑrɔ, Sɑlomɔɔwɑ u be kpuro mɔ win wɑ̃ɑru kpuro sɔɔ. Bɑ rɑ n kɑ nùn wɔ̃ɔ gobi nɑɑwɑmmɛ.
2 Dĩɑ ni Sɑlomɔɔn yɛnugibu bɑ rɑ di sɔ̃ɔ teeru wee. Som mɛ mu ǹ ye, tɔnnu nɔɔbɑ nnɛ kɑ sere mɑɑ som buuru tɔnnu yɛndu yiru sɑri, 3 kɑ kɛtɛ wɔkuru yi bɑ nɔɔrimɔ yɛnuɔ kɑ kɛtɛ yɛndu yi bɑ rɑ kpɑre, kɑ yɑ̃ɑnu wunɔbu (100) kɑ gbeeku yɛɛ gɛɛ nge nɛnnu kɑ gini kɑ sere mɑɑ gue yi yi gum mɔ.
4 Be bɑ wɑ̃ɑ Efɑrɑtin sɔ̃ɔ duu yerɔ, sɑɑ Tifusɑkin di sere kɑ Gɑsɑɔ Sɑlomɔɔwɑ u be kpuro mɔ. Win woodɑwɑ bɑ kɑ sɔmburu mɔ̀. Mɑ bɔri yɛndɑ wɑ̃ɑ berɑ mi kpuro sɔɔ. 5 Win wɑɑti ye sɔɔ, Yudɑbɑ kɑ Isireli be bɑ wɑ̃ɑ sɑɑ tem mɛn goo gbiikirun di sere mɛn goo gɔmkirɔ bɑ wɑ̃ɑwɑ bɔri yɛndu sɔɔ, ben bɑɑwure u win gberu wukumɔ.
6 Yenibɑn biru, Sɑlomɔɔ u dumi mɔ nɔrɔbun subɑ weeru (40.000), mɑ u yi wɑ̃ɑ yeru kuɑ. Yiyɑ yi rɑ win tɑbu kɛkɛbɑ gɑwe. U mɑɑ mɑɑsɔbu mɔ tɔnu nɔrɔbun subɑ wukurɑ yiru (12.000).
7 Berɑ wɔkurɑ yiru yen wirugii berɑ, bɑ rɑ n kɑ dĩɑnu nɑɑmɔ ni Sɑlomɔɔ kɑ win tɔmbu bɑ rɑ di. Wɔ̃ɔ tiɑ sɔɔ, suru tiɑ berɑ bɑɑyere yɑ mɔ yu kɑ dĩɑnu nɑ. Bɑ ku rɑ de dĩɑnu nu biɑrɑ Sɑlomɔɔn yɛnuɔ. 8 Bɑ rɑ mɑɑ kɑ dobi kɑ tɑkɑ de de win dumin sɔ̃ mi yi wɑ̃ɑ nge mɛ bɑ bu sɔ̃ɔwɑ bu ko.
Sɑlomɔɔ u tɔmbu kpuro
bwisi kerɑ
9 Gusunɔ u Sɑlomɔɔ bwisi kɑ lɑɑkɑri kɑ yɛ̃ɛ bɑkɑru kɑ̃ te tɑ ǹ kinɛ mɔ. 10 Win bwisi yi, yi sɔ̃ɔ yɑri yerugibun bwisigibu kɑ Egibitigibun bwisigibugii kere sere mi n tomɑ. 11 Goo sɑri wi u nùn bwisi turɑ. Win bwisi yi, yi Etɑni, Ɛsɑrɑkin sikɑdobugii kere. Mɛyɑ yi mɑɑ Hemɑnigii kere kɑ Kɑɑkoligii, kɑ Dɑɑdɑgii kɑ Mɑholin bibugii. Mɑ Sɑlomɔɔ u yĩsiru yɑrɑ bwese ni nu kɑ nùn sikerenɛn suunu sɔɔ. 12 Mɔnnu nɔrɔbun subɑ itɑwɑ (3.000) Sɑlomɔɔ u yoruɑ. Mɑ u womusu kuɑ su nɔrɔbu (1.000) kere. 13 U tɔmbu dɑ̃nun fɑɑgi kuɑ sɑɑ bɑkɑnun di sere kɑ dɑ̃ɑ kikisɔ, si su rɑ kpi gɑnɑ wɔllɔ. Mɛyɑ u mɑɑ yɛɛ nɑɑsu nnɛgiin fɑɑgi kuɑ kɑ yi yi rɑ kɑbiri, kɑ gunɔsu kɑ swɛ̃ɛ. 14 Mɑ sinɑm dɑbinu bɑ tɔmbu gɔrimɔ win mi, sɑɑ tem tukum di bu kɑ win bwisin gɑri nɔ.
Sɑlomɔɔ u sɔɔru mɔ̀ u kɑ
Yinni Gusunɔn sɑ̃ɑ yeru bɑni
(I mɑɑ mɛɛrio Bɑndun Gɑri II, 2:2-15)
15 Hirɑmu Tirin sunɔ u rɑɑ sɑ̃ɑwɑ Dɑfidin bɔrɔ. Ye u nuɑ mɑ bɑ Sɑlomɔɔ bɑndun gum tɑ̃re u kuɑ sunɔ, win tundo Dɑfidin kɔsire, yerɑ u sɔmɔbu gɔrɑ bu nùn tɔbiri. 16 Mɑ Sɑlomɔɔ u mɑɑ gɔrɑ Hirɑmun mi.
17 U nɛɛ, ɑ nɛn tundo Dɑfidi yɛ̃. A yɛ̃ mɑ u ǹ kpĩɑ u Yinni Gusunɔ sɑ̃ɑ yeru bɑniɛ, yèn sɔ̃ tɑbu nùn sikerenɛ bɑɑmɑ kpuron di. Yinni Gusunɔ u mɑɑ derɑ u win yibɛrɛbɑ tɑɑre. 18 Tɛ̃ nɑ wɛ̃re yèn sɔ̃ Gusunɔ nɛn Yinni u derɑ bɔri yɛndɑ wɑ̃ɑ nɛn tem beri berikɑ kpuro sɔɔ. Mɛyɑ nɑ ǹ mɑɑ yibɛrɛ goo mɔ wi u koo mɑn wɔrimɑ. 19 Yen sɔ̃, tɛ̃ nɑ niɑ sɑ̃ɑ n diru bɑni mi bɑ ko n dɑ Gusunɔ nɛn Yinni sɑ̃, nge mɛ win tii u rɑɑ Dɑfidi nɛn tundo sɔ̃ɔwɑ. U nɛɛ, win bii wi u koo sinɑ win sinɑ gɔnɑ wɔllɔ u ko win kɔsire, wiyɑ u koo nùn diru bɑniɑ. 20 Yen sɔ̃, ɑ de wunɛn sɔm kowobu bu mɑn dɑ̃ɑ dɑmgiɑ ye bɑ mɔ̀ sɛduru bɔɔriɑmɑ Libɑnin guurun di. Kpɑ n nun ben kɔsiɑru wɛ̃ nge mɛ ɑ geruɑ kpuro. Nɛn sɔm kowobu bɑ koo wunɛgibu somi bu kɑ sɔmbu te ko. Domi ɑ yɛ̃ mɑ goo sɑri bɛsɛ sɔɔ wi u dɑ̃ɑ burɑbu yɛ̃ nge bɛɛ, Sidonigibu.
21 Ye Hirɑmu u Sɑlomɔɔn gɑri yi nuɑ, yerɑ win nukurɑ dorɑ gem gem. Mɑ u nɛɛ, nɑ Yinni Gusunɔ siɑrɑ wi u Dɑfidin bii bwisi kɑ̃ u kɑ tɔn dɑbi te kpɑrɑ.
22 Mɑ u kpɑm Sɑlomɔɔ gɔriɑ u nɛɛ, nɑ nuɑ ye ɑ gerumɑ. Yen sɔ̃, nɑ kon ko ye ɑ bikiɑ mi kpuro. Kon nun dɑ̃ɑ dɑmgiɑ ye bɑ mɔ̀ sɛduru kɑ sipɛrɛ kɑsuɑmɑ. 23 Nɛn sɔm kowobu bɑ koo kɑ dɑ̃ɑ ye nɑ sɑɑ Libɑnin guunun di sere nim wɔ̃kuɔ. Yen biru, kon ye tɑri tɑri yɑ n kɑ gɛruɑ nim sɔɔ yu kɑ nɑ sere mi kɑɑ mɑn sɔ̃. Miyɑ kon de bu ye kusiɑ bu yi, kpɑ wunɛn tiigibu bu den yen wunɑnɔ ko. Ye kɑɑ mɑn kɔsiɑ, yerɑ ɑ nɛn yɛnugibu dĩɑnu mɔrisiɑmɑ.
24 Mɑ Hirɑmu u dɑ̃ɑ ni kpuro mɔrisiɑ nge mɛ̀n nɔɔ Sɑlomɔɔ u kĩ. 25 Mɑ Sɑlomɔɔ u Hirɑmu ɑlikɑmɑ tɔnnu nɔrɔbun subɑ nɔɔbɑ tiɑ (6.000) mɔrisiɑ, kɑ olifin gum yɑrum ditiri nɔrɔbun subɑ nɔɔbɑ itɑ (8.000). Nge mɛyɑ u rɑ ko wɔ̃ɔ bɑɑgere Hirɑmu u kɑ win yɛnu nɛnɛ.
26 Yinni Gusunɔ u Sɑlomɔɔ bwisi kɑ̃ nge mɛ u rɑɑ geruɑ. Mɑ bɔri yɛndɑ wɑ̃ɑ wi kɑ Hirɑmun bɑɑ sɔɔ. Mɑ bɑ ɑrukɑwɑni mɔɔsinɛ.
Sɑlomɔɔ u tɔmbu sɔmɑ koosiɑ
27 Sɑlomɔɔ u tɔmbu gɔsɑ Isirelibɑ sɔɔ be bɑ koo kpĩ bu sɔmunu sɔbe. Mɑ ben geerɑ kuɑ tɔmbu nɔrɔbun subɑ tɛnɑ (30.000). 28 Adonirɑmuwɑ u sɑ̃ɑ tɔn be kpuron kpɑro. Mɑ u bu bɔnu kuɑ wuunu itɑ, nɔrɔbun subɑ wɔku wɔkubu (10.000). Suru tiɑ sɔɔ, wuu nin teerɑ tɑ rɑ kɑ dĩɑ ni de Libɑniɔ, kpɑ be bɑ tie bɑ n wɑ̃ɑ yɛnuɔ. Yen sɔ̃nɑ ben bɑɑwure u rɑ ko suru yiru win yɛnuɔ, kpɑ u ko suru tiɑ Libɑniɔ. 29 Sɑlomɔɔ u mɑɑ sɔm kowobu mɔ tɔnu nɔrɔbun subɑ wɛnɛ (80.000) be bɑ rɑ kpenu dɑ̃ku guunɔ, kɑ tɔmbu nɔrɔbun subɑ wɑtɑ kɑ wɔkuru (70.000) be bɑ rɑ kpee ni gure. 30 Be bɑ rɑ n sɔm kowo be kpuro kpɑre, bɑ n bu woodɑ wɛ̃ɛmɔ, bɑ sɑ̃ɑwɑ nɔrɔbun subɑ itɑ kɑ goobɑ wunɔbu (3.300). 31 Sɑlomɔɔ sinɑ boko, u woodɑ wɛ̃ u nɛɛ, bu kpee bɑkɑnu bɛsukuo ni nu geenu sɑ̃ɑ bu kɑ dii ten kpɛɛkpɛɛku swĩi. 32 Win sɔm kowobu kɑ Hirɑmugibu kɑ Gibɑligibu be bɑ sɔmbu ten sɑriɑ yɛ̃ bɑ mɛnnɑ bɑ dɑ̃ɑ yen sɔmburu kuɑ mɑ bɑ kpee ni dɑ̃kɑ bu kɑ dii te bɑni.