37
To kapitulu 37:1-9 nignangon si Mosis no pighimu ni Bisalil ka sooranan to kasabutan sumao to insugu to Magboboot ki Mosis. Pigdorodyow lagboy ka tibo no pighimu rin, woy pigpakopkopan din to bulawan. Nighimu sikandin to soob to sooranan no duon daruwa no diwata to Magboboot no pighimu no bulawan. Woy songo pighimu rin ka mgo kadyu no igloungan to sooranan no pigpakopkopan pad to bulawan.
To 37:10-16 nighimu ka mgo duma ni Bisalil to lamisa no sabukanan to pan woy to tibon mgo kaaglagan to sikan no mgo platu woy boung woy mgo kadyu no igloungan to sikan. Pigdorodyowan lagboy ka tibo woy pigpakopkopan to bulawan.
To 37:17-24 nighimu sikandan to bulawan no sabukanan to ilawan no papitu ka ilawan no ogpaka-untud to sikan. Dorodyawi lagboy ka poghimu to sikan no sabukanan woy mgo 34 no kilu no bulawan ka piggamit dan to sikan.
To 37:25-29 nighimu pad sikandan to tubaranan no tutunganan to palina iglagkos to igloungan to sikan. Pighimu to kadyu no akasya woy pigpakopkopan pad to bulawan. Songo nighimu sikandan to moumut no palina woy lana no igpanubad dio.
To kapitulu 38: 1-8, nighimu sikandan to tubaranan no tutunganan to mgo igta-taruwoy ran to Magboboot, woy songo pighimu ran ka tibon mgo kaaglagan to sikan. Songo pighimu ran ka brunsi no lipung no luu-anan to mgo boad to mgo taagpanubad.
Takas to sikan to 38:9-20 nighimu sikandan to aad to lama to tukbung no 25 no dopa ka kaadyatan woy 12 no dopa ka kau-agan. Manggad ka inka-aad dan woy duon mgo suwoy no kadyu woy mgo pos-okanan no brunsi. Ka gomawan to lama woy ka gomawan to tukbung nigtangko to ogsilaan to allow.
Nignangon-nangon ka 38:21-31 no to tibon mgo tarabau to poghimu to tukbung, nigsusulat sikandan to kabogatan to mgo piggamit dan. Niggamit sikandan to mgo songo libu no kilu no bulawan, mgo tatou no libu no kilu no plata woy daruwa no libu no kilu no brunsi.
To kapitulu 39:1-31 nignangon si Mosis no songo pighimu ran ka mgo kinabo no ogsau-ubon to mgo taagpanubad no si Aaron woy ka mgo anak din. Nighimu sikandan to sikan no pighingaranan no Ipod no ig-atang to sosoobon to taagpanubad, woy to ig-akob to sikan no dangob no manggad to longod to sosoobon no duon sampuu woy daruwa no loin-loin no mgo mahalon no batu no igpadoromdom to sampuu woy daruwa no lunggunan to mgo otow to Israil. Songo duon sabinit no moilom woy duon kuubow no igsau-ub ni Aaron woy to duma no mgo taagpanubad.
No sikan ian no to 39:32-43 nignangon si Mosis no naponga ka tibon tarabau to Tukbung to Pogtangko to Magboboot. Nighimu ka mgo otow to Israil to tibo sumao to insugu to Magboboot ki Mosis. Pig-aap dan ka tibo dio ki Mosis woy pigpipitow rin. Nigkita sikandin no pighiponga ran ka tibo sumao to sugu to Magboboot kandin, woy sikan ian no pigboligan sikandan ni Mosis.