36
Ka Tukbung to Magboboot
1 No sikan ian no ogtarabau si Bisalil woy si Oholiab woy ka tibon mgo otow no pigbogadyan to Magboboot to katagaanan odyow to poghimu to tibo no mgo tarabau to pogpos-ok to tukbung sumao to sugu to Magboboot.”
2 No pigpo-umow ni Mosis si Bisalil woy si Oholiab woy ka tibon mgo otow no pigbogadyan to Magboboot to katagaanan woy no nigkoiniat to poghimu to tarabau. 3 Pigtinawo dan ligkat ki Mosis ka tibon mgo intaruwoy to mgo otow to Israil no inbogoy odyow to poghimu to tukbung. Nigparagas nig-aap ka mgo otow to mgo igtaruwoy ran kara masoom. 4 No nighagtong nigtarabau ka tibon mgo otow no duon katagaanan no nigtatarabau to tukbung 5 no nigkagi sikandan ki Mosis to “Litos on ka inbogoy to mgo otow odyow to poghiponga to tibon mgo tarabau no insugu to Magboboot, di nigparagas sikandan to pog-aap to mgo igtaruwoy.”
6 No nigsugu si Mosis no nigpa-tugun to tibon koot-otawan to kagi “Warad on otow no lukos woy ko boi no oghimu pad to igtaruwoy rin odyow to poghimu to tukbung.” No sikan ian no naponoran ka mgo otow to pog-aap, 7 su duon dod ogkasamo to pig-aap dan odyow to poghiponga to tibon mgo tarabau.
8 Nigtarabau ka tibon mgo lukos no duon katagaanan dio to sampuu no mgo manggad no oghimuon no tukbung. Piggamit dan ka dorodyawi no linu woy mgo sinulid no moilom, moitom-itom woy malaab no nighimu to manggad no duon mgo langlanguan to mgo diwata to Magboboot. 9 Un-unawa ka karakoan to mgo manggad no pighimu ran no papitu no dopa ka kaadyatan woy songo dopa ka kau-agan. 10 Pinogtombil dan ka lalima no mgo manggad, woy songo pinogtombil dan ka dangob no lalima. 11 Nighimu sikandan to mgo tal-talinga dio to ilis to sagboka no manggad woy dio to dangob no manggad no niggamit to moilom no manggad. 12 Kalimmaan ian ka mgo tal-talinga no pighimu ran to sagboka no manggad, woy songo kalimmaan ka mgo tal-talinga no pighimu ran to dangob no manggad no pinogtangko ka mgo tal-talinga. 13 Nighimu sikandan to kalimmaan no mgo ligpit no bulawan odyow to pogsagboka to daruwa no manggad odyow no ogkasagboka ka tukbung. 14 Nighimu ka mgo otow to sampuu woy sagboka no mgo manggad no niggamit to bulbul to kambing odyow to pogtol-ob to tukbung. 15 Un-unawa ka karakoan to sikan no mgo manggad no papitu woy tonga no dopa ka kaadyatan, woy songo dopa ka kau-agan. 16 Nigtotohi sikandan no pinogtombil dan ka lalima no manggad to sagboka no oad, woy pinogtombil dan ka dangob no hon-om no manggad to sagboka pad no oad. 17 Nighimu sikandan to kalimmaan no tal-talinga to ilis to sagboka no oad, woy songo pighimu ran ka kalimmaan no tal-talinga to ilis to koopusan to dangob no oad. 18 Nighimu sikandan to kalimmaan no ligpit no brunsi odyow to pogsagboka to tukbung. 19 Woy pighimu ran pad ka sagboka no igtol-ob to tukbung no mgo laplap to karniru no pig-ood to malaab, woy sagboka pad no igtol-ob no niggamit to mgo laplap to mgo bakaato dagat.
Pigmaupot no mgo kinagian
Pigmaupot noy ka duma no mgo birsikulu to kapitulu 36 pohondio to kapitulu 39 kuntoon odyow no magaan kow ogpakagon-gon to mgo maasi ogbasahon no mgo baad to libru to Exodu di uromo ogkohokad porom ka tibo to soini.
To duma no mgo birsikulu to kapitulu 36 nigparagas si Mosis to pognangon ko nokoy ka pighimu to mgo otow. Nighimu sikandan to mgo suwoy woy mgo tukias no ogsabukan to mgo manggad to tukbung. Pighimu soini to akasya no kadyu woy pigpakopkopan pad to bulawan. Nighimu sikandan to mgo pos-okanan no mgo mabogat odyow no igkapos-ok ka tukbung agad hondoi sikandan nigdoog. Nighimu sikandan to mgo manggad no ig-atang to in-oog lagboy no sinabong to tukbung, woy songo nighimu sikandan to manggad no ig-atang to gomawan to tukbung.