Genesis
1
Ka Poghimu To Tibo
1 To binunsuran pighimu to Magboboot ka langit woy ka tano. 2 No kuntoon waro pad matapid woy awang-awang do ka tano. Dooman ka duon to ampow to maraom no woig, woy nigwoil-woil ka gimukud to Magboboot dio to ampow to woig. 3 Nigkagi ka Magboboot to “Ogmaawang on,” woy waro do malingon-ngon no nigmaawang on. 4 Nakita to Magboboot no marodyow ka maawang, woy piglunsud din ka maawang woy ka dooman. 5 Pighingaranan to Magboboot ka maawang no “allow” woy pighingaranan din ka dooman no “marusilom.” No, duon pogka-tangkob woy duon pogkapawo - sikan ian ka an-anadyan no allow.
6 No, nigkagi ka Magboboot to “Oglopow ka oatan odyow no ogbaaron ka mgo woig to daruwa.” 7 No, pighimu to Magboboot ka oatan, woy piglunsud din ka woig dio to diraom to oatan woy ka woig dio to ampow to oatan. 8 Pighingaranan to Magboboot ka oatan no ‘ka-aw-awangan.’ No, duon pogkatangkob woy duon pogkapawo - sikan ian ka igkaruwa no allow.
9 No, nigkagi ka Magboboot to “Ogkalimud ka woig to diraom to ka-aw-awangan odyow no duon ogkohimu no mammara no tano,” woy niglopow soini. 10 Pighingaranan to Magboboot no ‘tano’ ka mammara woy pighingaranan din ka nalimud no mgo woig no ‘mgo dagat’, woy nakakita ka Magboboot no marodyow soini. 11 No, nigkagi pad ka Magboboot to “Duon ogtubu to tano; mgo ogbogas no mgo ogtubu, mgo kadyu no ogbogas to duon lisu, to tibo no nigkaloinloin no ogtubu,” woy sumao to kagi rin niglopow soini. 12 Nigtubu to tano ka mgo nigkaloinloin no mgo ogtubu no ogbogas, woy mgo nigkaloinloin no mgo kadyu no ogbogas. Nakakita ka Magboboot no marodyow soini. 13 No, duon pogkatangkob woy duon pogkapawo - sikan ian ka igkatou no allow.
14 No, nigkagi ka Magboboot to “Oglopow no duon mgo ogladyag dio to langit odyow to poglunsud to allow woy to marusilom, woy odyow no ogko-indanan ka mgo guabung woy longdong woy mgo tuid.” 15 Woy kagi pad to Magboboot to “Ogsilo sikandan dio to langit odyow to pogbat-ow to tano,” woy niglopow soini sumao to innangon din. 16 Nighimu ka Magboboot to daruwa no dakol no ogladyag - ka dakol-dakol no ogladyag odyow to pogboot to allow, woy ka malmaintok no ogladyag odyow to pogboot to marusilom. Songo pighimu rin ka mgo bituon. 17 Insabuk din sikandan dio to langit odyow to pogbat-ow to tano, 18 woy odyow to pogboot to allow woy to marusilom woy odyow to poglunsud to kaadyag woy to dooman, woy nakakita ka Magboboot no marodyow ka pighimu rin. 19 No, duon pogka-tangkob woy duon pogkapawo - sikan ian ka igkohop-at no allow.
20 No, nigkagi ka Magboboot to “Oglopow no duon marasig lagboy no nigkaloinloin no mgo ngaap dio to mgo woig, woy duon ogladyang no mgo manuk-manuk dio to aw-awangan.” 21 No, sikan ian pighimu to Magboboot ka mgo ngaap to dagat woy ka tibon mgo dagdakol woy mallintok no mgo ngaap no og-ugpo to mgo woig, woy songo pighimu rin ka tibo no mgo nigkaloinloin no mgo manuk-manuk no ogladyang. Nakakita ka Magboboot no marodyow ka nohimu rin. 22 Pigboligan to Magboboot ka mgo ngaap no kagi rin “Og-anak kow woy ogmoon-ing kow odyow no ogkaponu ka mgo woig kaniu, woy ogmoon-ing ka mgo manuk-manuk to kalibutan.” 23 No, duon pogka-tangkob woy duon pogkapawo - sikan ian ka igkalima no allow.
24 No, nigkagi ka Magboboot to “Oglopow to tano ka mgo nigkaloinloin no mgo adyam, mgo ogpananap to tano woy ka tibo no mgo magintaunan no nigkaloinloin,” woy niglopow soini sumao to kagi rin. 25 Pighimu to Magboboot ka mgo nigka-loinloin no mgo magintaunan, mgo nigkaloinloin no mgo adyam, woy mgo nigkaloinloin no mgo ogpananap to tano, woy nakakita ka Magboboot no marodyow soini. 26 No, nigkagi ka Magboboot to “Oghimuon ta ka otow no unawa to aungata, iing kanta, woy sikandan ka ogboot to mgo ngaap to dagat, to mgo manuk-manuk to aw-awangan, to mgo adyam, ian to tibo no kalibutan woy to tibo no duon goinawa no nig-ugpo to sikan.” 27 No, pighimu to Magboboot ka otow no unawa to aung din, ian pighimu rin sikandan iing kandin. Lukos woy boi ka nohimu rin. 28 Pigboligan to Magboboot ka mgo otow no kagi rin “Og-anak kow woy ogmoon-ing kow. Ogtangkap kow to tano woy sikaniu ka ogboot to soini. Sikaniu ka ogboot to mgo ngaap to dagat woy to mgo manuk-manuk to aw-awangan woy to tibo no duon goinawa no og-ugpo to tano.” 29 No, kagi pad to Magboboot to “Igbogoy ku kaniu ka tibo no mgo nigkaloinloin no ogtubu no ogbogas duon to tano woy mgo bogas to kadyu. Ogkohimu sikan no ogkakoon now. 30 Woy dio to mgo manuk-manuk to aw-awangan woy dio to tibo no nig-ugpo to tano - dio to tibo no duon goinawa, igbogoy ku ka tibo no mgo nigkaloinloin no lagut odyow no duon ogkoonon dan.” Woy niglopow soini sumao to innangon to Magboboot. 31 No, nigpitow ka Magboboot to tibo no nohimu rin woy nakakita sikandin no marodyow lagboy soini. No, duon pogkatangkob woy duon pogkapawo - sikan ian ka igkohon-om no allow.