Exodu
1
Nabaybadyaran ka mgo otow to Israil dio to Ehiptu
1 Soini ka mgo ngaran to mgo anak ni Israil no nighondio to Ehiptu duma to amoy ran (no songo pighingaranan ki Jacob) woy duma to mgo lunggunan dan: 2 Si Riubin, si Simion, si Livi, woy si Juda; 3 Si Isakar, si Sibulun woy si Binyamin; 4 Si Dan woy si Naptali; si Gad woy si Asir. 5 Kapituan ka tibon mgo pinanganak ni Jacob; duon on si Jose to Ehiptu to sikan.
6 No kunto-on namatoy si Jose woy ka tibon mgo suod din, woy noubus nammatoy ka tibon mgo otow to sikan no kapunganan, 7 di nanganak ka mgo pinanganak ni Israila, woy nigmoon-ing lagboy sikandan taman to nakatangkap sikandan to tibon tano.
8 No nigdatong no duon iam no igbudyag to Ehiptu no waro mataga to mgo nabadyaan ni Jose. 9 Nigkagi sikandin duon to mgo otow rin to “Pitow kow, darasigi on lagboy soini no mgo otow to Israil no mabogbog pad kanta. 10 Nokoy naan no ogbantoy ki to litos no oghimuon ta kandan. Hoo su ko kono ki ogbantoy, ogmoon-ing pad sikandan woy ko duon allow no minangadyawoy ogbulig sikandan to mgo usig ta, woy og-atu sikandan kanta woy og-awo to ugpaan ta.”
11 No nigtinuru sikandan to mgo otow to pogpogos to mgo otow to Israil to pogtarabau odyow no ogkabogatan sikandan. Woy pighimu to mgo otow to Israil ka mgo lunsud to Pitom woy Ramisis no mgo sabukanan to mgo kaaglagan ni Parao.b 12 Di agad to pigloig-loig ka mgo otow to Israil, nigmoon-ing pad atag sikandan woy nigparagas sikandan to pogtangkap to tano, taman to nahallok on ka mgo matig Ehiptu to mgo otow to Israil, 13 woy pigpatarabau sikandan to waro koid-u. 14 Nigpatarabau ka mgo matig Ehiptu to mgo otow to Israil to mgo mabogat no tarabau to poghimu to mgo baoy woy dio to kamot taman to nigmasakit ka goinawa to mgo otow to Israil su waro koid-u to mgo nigpatarabau kandan.
15 Pignangonan to igbudyag to Ehiptu ka mgo taag-udyamu to mgo Hibriucno si Sipra woy si Pua, 16 no kagi “Ko og-udyamuon now ka mgo Hibriu no mgo boi ko og-anak sikandan, ko lukos ka bato, himatadyi now sikandin; di ko boi ka bato, baagara now sikandin.” 17 Di nahallok ka mgo taag-udyamu to Magboboot woy waro sikandan mogbabali to innangon to hari to Ehiptu; inbaagad dan ka mgo lukos no bato. 18 No inpo-umow to igbudyag to Ehiptu ka mgo taag-udyamu woy nig-inso sikandin to “Manio to soini ka pighimu now? Manio to inbaagad now ka mgo lukos?”
19 Nigtabak ka mgo taag-udyamu ki Parao to “Kono og-unawa ka mgo boi no Hibriu to mgo boi no matig Ehiptu; manokal lagboy sikandan, woy og-anak sikandan to kono pad oglopow ka mgo taag-udyamu.” 20 Sikan ian pigbuligan to Magboboot ka mgo taag-udyamu woy nigparagas nigmoon-ing ka mgo Hibriu no otow. 21 Woy tongod su nahallok ka mgo taag-udyamu to Magboboot, pigbogadyan din sikandan to kandan do no mgo anak. 22 No, pigsugu ni Parao ka mgo otow rin no kagi: “Itugdo now to Nilu no woig ka kara lukos no ogko-otow, di baagara now ka mgo boi.”