2
Pogko-otow ni Mosis
1 Kunto-on duon lukos no kapunganan ni Livi no nig-asawa to boi no songo kapunganan ni Livi, 2 woy naboros ka boi woy nig-anak sikandin to lukos. To pogkakita to inoy no marodyow lagboy ka bato, inhoos din sood to tatou no buwan. 3 Di to konad igkohoos ka bato, nigpurut ka inoy to banban no pighimu no liang woy pigbulitan din to alkitrana. Intagu din ka bato dio to liang, woy pigsabuk din ka liang dio to mgo tibogow to ilis to Nilu no woig. 4 Nigsasindog ka atoboi to bato to madmariu odyow to pogpitow ko nokoy ka ogkabadyaan to bato.
5 No, nighondio ka anak no boi ni Parao dio to Nilu odyow to pogparigus, woy songo nigduma ka mgo suguanon din dio to tikoba. Pigkita to anak to igbudyag ka liang dio to mgo tibogow, woy pigsugu din ka suguanon din odyow to pog-angoy to sikan. 6 Pigpuwasan din ka liang woy nakita rin ka bato. Nigsinogow ka bato woy noid-uan sikandin to boi. Kagi rin “Sagboka to mgo anak to Hibriu soini.”
7 No nig-inso ka atoboi to bato dio to anak ni Parao no kagi “Og-angoy a buwa koikow to sagboka no Hibriu no boi odyow to pogpasusu to bato?”
8 Nigtabak ka boi to “No. Hondio ka.” Nighondio ka atoboi to bato, woy pig-angoy rin ka inoy to bato. 9 Nignangon ka anak ni Parao dio to inoy to “Puruta nu soini no bato, woy pasusui a nu, woy ogbadyaran ku sikoikow.” No pigpurut to boi ka bato woy pigpasusu rin.
10 To nalutas on ka bato pig-aap sikandin to inoy dio to anak no boi ni Parao, woy pigdoromdom din no kandin on no anak ka bato. Pighingaranan to anak ni Parao ka bato ki Mosis, no kagi “Pigpurut ku sikandin ligkat to woig.”b
Nigpanlaguy si Mosis pohondio to Midian
11 Songo allow to nigdakol on si Mosis, nighondio sikandin odyow to pogpitow to koot-otawan din duon to mabogat no tarabau ran. Nakakita sikandin to sagboka no otow to Ehiptu no nigbaras to sagboka no Hibriu, sagboka no otow ian no unawa ki Mosis. 12 Agpas nigpamitow-pitow sikandin, woy waro otow no nakita rin. No, pighimatadyan ni Mosis ka otow to Ehiptu, woy inlobong din ka lawa dio to badyokbok.
13 To pogkapawo, nighondio man do si Mosis woy nakita rin ka daruwa no Hibriu no nigpasun-suntukoy. Pig-inso din ka nakasao no kagi “Manio to pigsuntuk nu ka unawa koikow no Hibriu?” 14 Nigtabak ka otow ki Mosis to “Hontow ka nigtinuru koikow to poghusoy woy to pogbo-ot kanami? Nigbabantak ka buwa to poghimatoy kanak iing to poghimatoy nu to matig Ehiptu?” No nahallok on si Mosis su nigdoromdom sikandin to “Nataga naan sikandan to pighimu ku.”
15 To nakarinog on si Parao to pighimu ni Mosis, nigbabantak sikandin to poghimatoy kandin, di nigpanlaguy si Mosis, woy nighondio sikandin to tano to Midian. Nigpinnuu sikandin to longod to sagboka no sakuganan dio.
16 No, duon taagpanubad to Midian no duon papitu no anak no boi. Nighondio ka mgo boi to sakuganan odyow to pogsakug to woig no og-inomon to mgo adyam to amoy ran. 17 Duon mgo taagbantoy to karniru no niglopow no nigdogil to mgo boi porom, di nighasindog si Mosis woy pigpangabangan din ka mgo boi, woy pigpoinom din ka mgo karniru ran. 18 To nig-uli ka mgo boi dio to amoy ran no si Riuilcnig-inso ka amoy kandan no kagi “Manio to magaan kow naka-uli kuntoon?” 19 Nigtabak sikandan to “Duon matig Ehiptu no nigpangabang kanami to mgo taagbantoy to karniru. Songo nigsakug sikandin woy pigpoinom din ka mgo karniru noy.” 20 Nig-inso ka amoy to mgo anak din no kagi “Hondoi naan sikandin? Manio to pig-ongkoran now? Hinggata now sikandin to pogkoon kai.”
21 Nigbabali si Mosis to pog-ugpo duma ki Riuil, woy pigpaasawa ni Riuil ka anak din no si Sipora ki Mosis. 22 Nig-anak si Sipora to lukos, woy pighingaranan ni Mosis ka bato ki Girsom no kagi “Nohimu a no dagpu to loin no ugpaan.”d
23 To naugoylugoy on no mgo tuid, namatoy ka igbudyag to Ehiptu. Nigsinogow woy nigdorokul ka mgo otow to Israil tongod to pogko-uripon dan, woy niglopow ka poid-u-hoid-u ran dio to Magboboot. 24 Nakarinog ka Magboboot to pogdorokul dan, woy pigdoromdom din ka kasabutan din ki Abraham, ki Isaak woy ki Jacob. 25 No nigpitow ka Magboboot to mgo otow to Israil woy nohimonow sikandin kandan.