3
Si Mosis woy ka Niglogdog no Kadyu
1 No kuntoon, nigbabantoy si Mosis to mgo karniru ni Jitro no anugang din no taagpanubad to Midian. Pig-aap ni Mosis ka mgo adyam pohondio to limang to han-hanawan dio to bubungan to Magboboot dio to Horib.a 2 To dio si Mosis, nakita rin ka diwata to Magboboot dio to hapuy to maapung no kadyu. Nakita ni Mosis no niglogdog ka kadyu, di waro matutung. 3 No nigsumansuman si Mosis to “Oghondutun a odyow to pogpitow to soini no ogko-in-inuan no manio no kono ogkatutung ka kadyu.”
4 To nakita to Magboboot no nigmarani on si Mosis to maapung no kadyu, nig-umow sikandin ligkat to taliwaro to kadyu no kagi “Mosis! Mosis!”
Nigtabak si Mosis to “Soini a.”
5 Kagi pa to Magboboot to “Doka’g paragas to pogdani. Luunga nu ka hanig to paa nu. Hoo su ingkannugun ku no tano ka pigsasindogan nu.”
6 Nigparagas ka Magboboot to “Sikanak ka Magboboot no Igbudyag to amoy nu. Koddi ka Magboboot ni Abraham, ni Isaak woy ni Jacob.” No pig-atangan ni Mosis ka langlanguan din su nahallok sikandin to pogpitow to Magboboot. 7 Nigkagi ka Magboboot to “Nakita ku ian ka koirapan to koot-otawan ku dio to Ehiptu. Nakarinog a to pogdorokul dan tongod to mgo otow no nigpogos kandan to pogtarabau. Woy nigmasakit ka goinawa ku tongod to kasakit dan. 8 Nokoy naan no nigpamanoug a odyow no ogpangabangan ku sikandan puun to mgo matig Ehiptu, no og-aapon ku sikandan ligkat dio pohondio to marodyow woy mau-ag no tano no tu-augan to gatas woy tonob no dakol. Ian ka tano no pig-ugpaan to mgo kapunganan ni Canaan, ni Hit, ni Amor, ni Piris, ni Hib woy ni Yibus. 9 Woy kuntoon noko-uma kanak ka pog-umow to mgo otow to Israil, woy nakita ku ka maroot no mgo pighimu to mgo matig Ehiptu kandan. 10 No Mosis, hondio ka. Ogpohipanawon ku sikoikow dio ki Parao odyow to pog-angoy to koot-otawan ku no Israil ligkat to Ehiptu.”
11 Di nigtabak si Mosis to Magboboot no kagi “Hontow a, no sikanak ka oghondio ki Parao odyow to pog-angoy to mgo otow to Israil ligkat to Ehiptu?”
12 Nigtabak ka Magboboot to “Ogdumaan ku sikoikow. Woy soini ka indanan ku koikow no sikanak ka nigpohipanow koikow: ko ogka-angoy nud on ka mgo otow ligkat to Ehiptu, ogsadyoon now ka Magboboot kai to soini no bubungan.”
13 Nig-inso pad si Mosis to “Monua ko oghondio a to mgo otow to Israil woy ognangonan ku sikandan no “Ka Magboboot no Igbudyag to mgo kabuybudyagan now ian ka nigpa-aap koddi kai to kaniu,” woy og-insoon a ran to “Hontow ka ngaran din?” Nokoy naan ka igkatabak ku kandan?”
14 Nignangon ka Magboboot ki Mosis to “Sikoddi ian Ka Duon. Nangoni nu ka mgo otow to Israil no ‘Ka Duon’ ian ka nigpa-aap kanak to kaniu.”
15 Songo nignangon ka Magboboot ki Mosis to “Nangoni nu ka mgo otow to Israil no ‘Ka Magboboot no Igbudyag to mgo kabuybudyagan now, ka Igbudyag ni Abraham, ni Isaak woy ni Jacob ian ka nigpa-aap koddi kai to kaniu.’ Sikan ian ka ngaran ku taman to katamanan, woy sikan ka ig-umow now kanak woy ka ig-umow to tibon mgo kapunganan now. 16 Hondio ka woy limura nu ka tibon mgo igbudyag to Israil woy nangoni nu sikandan no “Ka Magboboot no Igbudyag to mgo kabuybudyagan now, ka Igbudyag ni Abraham, ni Isaak woy ni Jacob, ian ka nigpakita kanak no kagi: Nigbabantoy a kaniu woy nakita ku ka to pighimu kaniu dutun to Ehiptu. 17 Nangulibot a no og-aapon ku sikaniu ligkat to masakit no goinawa now dio to Ehiptu pohondio to tano no pig-ugpaan to mgo kapunganan ni Canaan, ni Hit, ni Amor, ni Piris, ni Hib woy ni Yibus, ian ka tano no tu-augan to gatas woy tonob no dakol.’ 18 Ogpamminogon ka to mgo igbudyag to Israil. No oghondio ka duma to mgo igbudyag to Israil dio to igbudyag to Ehiptu, woy ognangonan now sikandin to ‘Nigkagi kanami ka Magboboot no Igbudyag to mgo Hibriu no mgo otow. Pauguti koy ko oghipanow koy to tatou no allow no kariu-an dio to han-hanawan odyow no ogpakapanubad koy to mgo adyam dio to Magboboot no Igbudyag noy.’” 19 Nigkagi pad ka Magboboot ki Mosis to “Di nataga a no kono ogbabali ka igbudyag to Ehiptu ko kono ogpogoson sikandin pinabadyo to mabogbog no boad. 20 No ogkawadyon ku ka boad ku odyow to poglampos to mgo matig Ehiptu pinabadyo to mgo ogko-in-inuan. Takas to sikan ogbabali ka igbudyag no oghipanow kow. 21 Woy ogpa-marodyowon ku ka goinawa to mgo matig Ehiptu kaniu odyow no ko oghipanow kow on, duon ogka-aap now. 22 Ogpamudyu ka kara boi kaniu to mgo songo baoy rin woy to mgo boi to lunggunan din odyow no ogkabogadyan sikandin to mgo kaaglagan no plata woy bulawan woy mgo kinabo no igkasau-ub to mgo anak now. No sikan ian no ogpaka-agow kow to mgo kaaglagan to mgo matig Ehiptu.”