4
Mgo Ogko-in-inuan no tuus
1 Nigtabak si Mosis to Magboboot no kagi “Monuon ku naan ko kono ogtuu sikandan kanak, woy kono ogpamminog kanak woy ogkagi sikandan to ‘Waro ka nakakita to Magboboot’?”
2 No nig-inso ka Magboboot ki Mosis to “Nokoy ka sikan to boad nu?”
Nigtabak si Mosis to “Tukod.”
3 Kagi to Magboboot to “Itugdo nu to tano.” Intugdo ni Mosis ka tukod din dutun to tano, woy no uod ka tukod din, woy nigpallaguy si Mosis no nigpamariu to uod. 4 No nignangon ka Magboboot ki Mosis to “Puruta nu ka uod duon to ikug din.” No pigpurut ni Mosis ka uod woy man on no tukod din duon to boad din.
5 Kagi to Magboboot to “Sikan ka oghimuon nu odyow no ogtuu sikandan no ka Magboboot, ka Igbudyag to mgo kabuybudyagan dan; ka Magboboot ni Abraham, ni Isaak woy ni Jacob ian ka nigpakita koikow.”
6 No nignangon ka Magboboot to “Isuksuk nu ka boad nu to kinabo nu.” Insuksuk ni Mosis ka boad din to kinabo din, woy to pogpalibuwas din to boad din, nigmaputi on lagboy to ibung.
7 Nigkagi pad ka Magboboot to “Ilibong nu isuksuk to kinabo nu.” No inlibong insuksuk ni Mosis ka boad din to kinabo din, woy to pogpalibuwas din man do to boad din, noulian on no unawa to duma no laplap din.
8 Nigkagi ka Magboboot to “Ko kono ogtuu sikandan koikow to an-anadyan no ogko-in-inuan no tuus, naugpa ogtuu sikandan to igkarangob no tuus. 9 Di, ko kono ogtuu sikandan to soini daruwa no tuus, woy ko kono ogpannalinga sikandan koikow, purut ka to woig ligkat to Nilu no woig, woy ibus-ug nu duon to tano. Ogkohimu no langosa dio to tano ka woig no ogpuruton nu to Nilu.”
10 Nignangon si Mosis to Magboboot no “Igbudyag ku, kono a ogkatou to pogkagi to marodyow. Amag nokani pad woy kuntoon no nig-a-aukuy ka kanak, sikan dod. Mananoy a to poglituk.”
11 Nigtabak ka Magboboot kandin no kagi “Hontow ka nighimu to bobo to otow? Hontow ka ogpakapo-omaw to otow woy ka ogpakapabongol to otow? Hontow ka nigbogoy no ogpakakita sikandin woy no ogpakabutud kandin? Kono buwa no sikoddi no Magboboot? 12 No, hondio ka, woy ogbuligan ku sikoikow to pogkagi, woy og-anaron ku sikoikow ko nokoy ka ogkagion nu.”
13 Di nigtabak si Mosis to “Igbudyag ku, marodyow pad poron ko loin no otow ka igpa-aap nu.”
14 No nigmoinit ka goinawa to Magboboot ki Mosis, woy nignangon sikandin to “Monua ko si Aaron no kakoy nu no kapunganan ni Livi? Nataga a no marodyow sikandin to pogkagi. Nighipanow on sikandin odyow to pogtomu koikow, woy ogkarago sikandin to pogkakita rin koikow. 15 Ogkagian nu sikandin, woy ogbogadyan nu sikandin to mgo kinagian; ogbuligan ku sikaniu daruwa to pogkagi, woy og-anaron ku sikaniu to oghimuon now. 16 Si Aaron ka ogkagi to mgo otow liwan koikow, woy ogkounawa no sikandin ka bobo nu, woy ogkounawa no sikoikow ka Magboboot to kandin. 17 Di og-aapon nu ka sikan no tukod no duon to boad nu, odyow no ogpakahimu ka to mgo ogko-in-inuan to sikan.”
Niglibong si Mosis to Ehiptu
18 No nig-uli si Mosis woy nigpamudyu sikandin to anugang din no si Jitro no kagi “Pauguti a nu to pog-uli to koot-otawan ku dio to Ehiptu odyow no ogkataga a ko manokal dod sikandan.”
Nigtabak si Jitro to “No. Marodyow no poghipanow.”
19 Sikan ian ka pighimu ni Mosis su nigkagi ka Magboboot kandin dio to Midian to “Libong ka to Ehiptu, su namatoy on ka tibon mgo otow no nigbabantak to poghimatoy koikow nokani.”
20 No sikan ian no inpountud ni Mosis ka asawa rin woy ka mgo anak din to asnua, woy nighipanow sikandin pohondio to Ehiptu. Pig-aap din ka tukod to Magboboot dio to boad din.
21 Nigkagi ka Magboboot ki Mosis to “Kuntoon no pigbogadyan ku sikoikow to kabogbogan, ko oglopow ka to Ehiptu, ligdongi nu no igpakita nu ki Parao ka mgo ogko-in-inuan no in-anad ku koikow. Di igpamakogal ku ka goinawa rin odyow no kono ogbabali sikandin to pogpohipanow to mgo otow. 22 No nangoni nu pa si Parao to “Soini ka innangon to Magboboot; Panganoy no anak ku si Israil, 23 woy pignangonan ku sikoikow no ogpohipanawon nu ka anak ku, odyow no ogsadyo sikandin kanak. Di waro ka mogbabali. No kuntoon oghimatadyan ku ka panganoy no anak nu.””
24 To sagboka no lopowanan ni Mosis poghondio din to Ehiptu, pigtomu sikandin to Magboboot, woy oghimatadyan sikandin poron to Magboboot.b 25 Di nigpurut si Sipora no asawa ni Mosis to magaang no batu no sumaom, woy pigtuli din ka anak din. Pigpoiran din ka paa ni Mosis to laplap no napurut din. Nignangon sikandin to “Sikoikow ka iglukos ku to langosa.”
26 No waro himatadyi si Mosis to Magboboot. (Ka pogtuli ian ka inpasabut ni Sipora to pognangon din to “Iglukos to langosa.”)
27 Nignangon ka Magboboot ki Aaron to “Hondio ka to han-hanawan odyow to pogtomu ki Mosis.” No pigtomu ni Aaron si Mosis dio to longod to bubungan to Magboboot, woy pigharokan ni Aaron si Mosis. 28 No nignangon-nangon si Mosis ki Aaron to tibo no innangon to Magboboot kandin, woy to mgo tuus no ogko-in-inuan no insugu to Magboboot no oghimuon din.
29 Pigpalimud ni Mosis woy ni Aaron ka tibon mgo igbudyag to Israil, 30 woy nignangon-nangon si Aaron to tibo no innangon to Magboboot ki Mosis. Songo pighimu rin ka mgo tuus to tangkaan to mgo otow, 31 woy nigtuu sikandan. To pogkarinog dan no nohimonow ka Magboboot kandan, woy no nakita rin ka masakit no goinawa ran, nig-unduk sikandan no pigsadyo dan ka Magboboot.