5
Pigtimuan ka Ingkabaybadyari to mgo Otow to Israil
1 Takas to sikan nanhondio si Mosis woy si Aaron ki Parao, woy nignangon sikandan to “Soini ka kinagian to Magboboot no Igbudyag to Israil kagi ‘Pohipanawa nu ka koot-otawan ku, odyow no ogsadyoon a ran dio to han-hanawan.’”
2 Nigtabak si Parao to “Hontow ka Magboboot? Manio no ogbabali a to mgo sugu din no ogpohipanawon din ka Israil? Waro a mokoila to Magboboot woy kono ku ogpohipanawon ka Israil.”
3 No nigkagi si Mosis to “Nigpakita kanami ka Magboboot no Igbudyag to mgo Hibriu. No pauguti koy nu to poghipanow to han-hanawan to kariu-an to tatou no allow to poghipanow odyow no ogpakapanubad koy to mgo tubad tongod to Magboboot no Igbudyag noy. Hoo su ko kono koy oghondio, naugpa ko ogkalogparan koy pinabadyo to mgo darau woy to minangadyawoy.”
4 Di nigtabak ka igbudyag to Ehiptu kandan to “Mosis woy Aaron, manio to inpahagtong now ka mgo otow to tarabau ran? Libong kow on to tarabau now!” 5 Kagi pa ni Parao to “Pitow kow, moon-ing on soini no mgo otow, woy inpahagtong now sikandan to tarabau ran.”
6 To sikan dod no allow, nigsugu si Parao to mgo taagpogos to mgo uripon din no kagi: 7 “Kono kow on ogbogoy to lagami to mgo otow ko oghimu sikandan to mgo tisa;apapamuruta now on sikandan to lagami ran. 8 Di sikan dod ka karasigan to mgo tisa no igpohimu now kandan. Dokow ogsalini ka koon-ingan to mgo tisa. Poguon sikandan no mgo otow; nokoy naan no nigbabansagon sikandan to ‘oghondio koy odyow to pogpanubad to Magboboot noy.’ 9 Pogosa now ka mgo otow to pogtarabau to mabmabogat odyow no konad ogpamminog sikandan to mgo ubat.”
10 No niglibuwas ka mgo otow no taag-aap to mgo uripon, woy pignangonan dan ka mgo otow to “Soini ka kinagian ni Parao: kono ad on ogbogoy kaniu to lagami. 11 Hondio kow, woy ogpamurut kow to lagami ko agad hondoi kow ogpakakita, di kono ogkasalinan ka tarabau now to poghimu to tisa.’”
12 No nigsusuwoysuwoy ka mgo otow to tibon tano to Ehiptu, odyow to pogpamurut to lagami no ogkagamit dan. 13 Ungud pogosa sikandan to mgo taagpogos to uripon no kagi ran “Hipongaa now ka tarabau now kara allow, unawa to nokani no duon lagami now.” 14 Pigbarasan to mgo taagpogos to mgo uripon ni Parao ka mgo igbudyag no og-aap to mgo otow to Israil no kagi “Manio to waro kow nakaponga to tibon mgo tisa kuntoon woy gabii unawa to nokani?”
15 No nighondio ka mgo otow to Israil no mgo taag-aap to otow dio to ki Parao no nig-a-aras no kagi “Manio to soini ka pighimu nu to mgo suguanon nu? 16 Waro koy bogadyi to lagami di ungud koy ognangonan to ‘Himua now ka mgo tisa!’ Pigbarasan koy no mgo suguanon nu, di ka mgo otow now ian ka nakasao.”
17 Nigtabak si Parao to “Poguon kow no mgo otow, poguon ian! Sikan ian no ungud kow ognangon to ‘Pauguti koy nu to poghondio to pogpanubad to Magboboot.’ 18 Libong kow to tarabau now. Kono kow ogkabogadyan to lagami, di awoson no ogparagas kow to poghimu to tibon mgo tisa unawa to nokani.”
19 No nakasabut on ka mgo otow to Israil no taag-aap to otow no dakol ka koirapan dan naan su pignangonan sikandan to ‘Kono ogkasalinan ka mgo tisa no oghimuon now kara allow.’
20 To pog-awo dan to tangkaan ni Parao, nakita ran si Mosis woy si Aaron no nigtatagad kandan, 21 woy nigkagi sikandan to “Sagmanon kow woy oglogparan kow poron to Magboboot! Inat nasongotan on si Parao woy ka mgo hibatoon din to pogpitow kanta tongod kaniu. Pigbogadyan now sikandan to kampilan odyow to poghimatoy kanta!”
Nangulibot ka Magboboot to Pogpangabang
22 No niglibong si Mosis to Magboboot woy nigkagi to “Magboboot, manio to pig-aapan nu to koirapan ka soini no koot-otawan? Soini buwa ka tuud nu to pogpa-aap koddi? 23 Ligkat to poghondio ku ki Parao odyow to pogkagi pinabadyo to ngaran nu, pigtinuud din ka soini no koot-otawan to koirapan, woy waro nu pangabangi atag ka mgo otow nu.”