Exodu 6

¹ No nigkagi ka Magboboot ki Mosis to “Kuntoon ogkitoon nu ko nokoy ka oghimuon ku ki Parao: tongod to mabogbog no boad ku, ogloka-an din ka koot-otawan ku; tongod to mabogbog no boad ku ogdogilon din sikandan to tano din.” ² Songo nigkagi ka Magboboot ki Mosis to “Sikoddi ka Magboboot. ³ Nigpakita a ki Abraham, ki Isaak, woy ki Jacob no Mabogbog no Magboboot, di waro a nigpasabut kandan to ngaran ku no ‘Ka Duon’. ⁴ Songo nangulibot a kandan no igbogoy ku kandan ka tano to Canaan no pig-ugpaan dan unawa to dagpu. ⁵ Woy nokoy pad no narinog ku ka pogdorokul to mgo otow to Israil no pig-uripon to mgo matig Ehiptu, woy naromdoman ku ka kasabutan ku kandan. ⁶ No sikan ian nangoni nu ka mgo otow to Israil to “Sikoddi ka Magboboot, woy og-aapon ku sikaniu no og-ongkoran now ka inpatiang to mgo matig Ehiptu kaniu. Oglipuwasan ku sikaniu ligkat to pogko-uripon now kandan, woy oglokaton ku sikaniu pinabadyo to boad ku woy pinabadyo to mgo ogko-in-inuan no poglogpad. ⁷ Ogkohimu kow no koot-otawan ku woy ogkohimu a no Magboboot now. No sikan ian ogkaroromdom now no sikanak ian ka Magboboot no ‘Duon’ no nig-aap kaniu ligkat to mabogat no inpatiang to mgo matig Ehiptu. ⁸ Woy og-aapon ku sikaniu to tano no inpangulibot ku ki Abraham, ki Isaak woy ki Jacob pinabadyo to boad ku. Sikaniu ka ogpakatagtuun to sikan su igbogoy ku kaniu. Sikoddi ian ka Magboboot.”

⁹ Nignangon si Mosis to soini tibo dio to mgo otow to Israil, di waro sikandan nigpamminog tongod su nigtawad on ka goinawa ran, woy tongod to ingkabaybadyari ran.

¹⁰ No nignangon ka Magboboot ki Mosis to ¹¹ “Hondio ka, woy nangoni nu si Parao no igbudyag to Ehiptu no ogpohipanawon din ka mgo otow to Israil ligkat to tano din.”

¹² Di nigtabak si Mosis to Magboboot no kagi “Ko kono ogpamminog ka mgo otow to Israil kanak, ian pad si Parao? Hoo su kono a ogkatou to pogkagi to marodyow.”

Ka mgo Minuna ni Mosis woy ni Aaron

¹³ No kuntoon soini ka nangnangonon moitongod ki Mosis woy ki Aaron no ian ka mgo otow no pignangonan to Magboboot moitongod to mgo otow to Israil woy moitongod ki Parao no igbudyag to Ehiptu. Sikandan ian ka pigsugu to Magboboot to pog-aap to mgo otow to Israil ligkat to Ehiptu.

¹⁴ Soini ka mgo igbudyag to mgo lunggunan to Israil. Ka mgo anak ni Riubin no panganoy ni Israil ian si Hanok, si Pallu, si Hisron woy si Karmi. Sikandan ian ka mgo lunggunan no puun ki Riubin.

¹⁵ Ka mgo anak ni Simion ian si Yimuil, si Yamin, si Ohad, si Yakin, si Soar woy si Saul (no anak to boi no matig Canaan). Sikan ian ka mgo lunggunan no puun ki Simion.

¹⁶ Soini ka mgo anak ni Livi sumao to mgo sulat; si Girson, si Kohat woy si Mirari. 137 no tuid ian ka pannuigon ni Livi to namatoy sikandin.

¹⁷ Ka mgo anak ni Girson no no mgo igbudyag to mgo lunggunan ian si Libni woy si Simii.

¹⁸ Ka mgo anak ni Kohat ian si Amram, si Is-har, si Hibron woy si Ussiil. 133 no tuid ian ka kaadyatan to ukul ni Kohat.

¹⁹ Ka mgo anak ni Mirari ian si Mali woy si Musi. Sikan ian ka mgo lunggunan no nigpuun ki Livi, sumao to mgo sulat.

²⁰ Nig-asawa si Amram ki Yokibid no atoboi to amoy rin. Ian mgo anak dan si Aaron woy si Mosis. 137 no tuid ian ka kaadyatan to ukul ni Amram.

²¹ Ka mgo anak no lukos ni Is-har ian si Kora, si Nipig woy si Sikri.

²² Ka mgo anak no lukos ni Ussiil ian si Misail, si Ilsapan woy si Sitri.

²³ Nig-asawa si Aaron ki Ilisiba, no atoboi ni Nason no anak ni Amminadab, woy ka mgo anak dan ian si Nadab, si Abihu, si Iliasar woy si Itamar.

²⁴ Ka mgo anak no lukos ni Kora ian si Assir, si Ilkana woy si Abiasap. Nohimu sikandan no mgo igbudyag to mgo kapunganan ni Kora. ²⁵ Nig-asawa si Iliasar no anak ni Aaron to sagboka no anak ni Putiil, woy naka-anak ka boi ki Pinihas. Sikandan ian ka mgo igbudyag to mgo kapunganan ni Livi pinabadyo to mgo lunggunan dan.

²⁶ No sikandan ian ka Aaron woy ka Mosis no pignangonan to Magboboot no kagi “Aapa now ka mgo otow to Israil ligkat to Ehiptu pinabadyo to mgo puntuk dan.” ²⁷ Sikandan ian ka nigkagi ki Parao no igbudyag to Ehiptu moitongod to pog-aap to mgo otow to Israil ligkat to Ehiptu. Waro loin no Mosis woy Aaron ka pighingaranan kai.

Si Aaron ka Ogkagi liwan ki Mosis

²⁸ No, to pogkagi to Magboboot ki Mosis dio to Ehiptu, ²⁹ nignangon sikandin to “Sikoddi ian ka Magboboot. Nangoni nu si Parao no igbudyag to Ehiptu to agad nokoy no ignangon ku koikow.”

³⁰ Di nigtabak si Mosis to Magboboot to “Kono a ogkatou to pogkagi. No manio no ogpamminog si Parao koddi?”