7
1 No nigkagi ka Magboboot ki Mosis to “Pitow ka. To pogdoromdom ni Parao oghimuon ku sikoikow no unawa to Magboboot, woy ogkohimu no si Aaron ian ka taagnangon nu. 2 Ignangon nu ka agad nokoy no igsugu ku koikow, woy ognangon si Aaron ki Parao to pogpohipanow to mgo otow to Israil ligkat to pandatuan din. 3 Di igpamakogal ku ka goinawa ni Parao woy agad ko oghimu a to moon-ing no mgo ogko-in-inuan to Ehiptu, 4 kono ogpamminog sikandin koikow. No ogsampoongan ku ka Ehiptu to boad ku, woy pinabadyo to mgo mokohinhinaat no mgo himu to pogboboot, ogpalibuwason ku ka mgo puntuk ku, ka koot-otawan ku no ian ka mgo otow to Israil. 5 Woy ogkataga ka mgo otow to Ehiptu no sikoddi ian ka Magboboot ko ogkawadyon ku ka boad ku to pog-atu to Ehiptu woy ogpalibuwason ku ka mgo otow to Israil.”
6 Pighimu ni Mosis woy ni Aaron ka tibo no insugu to Magboboot kandan. 780 on ka pannuigon ni Mosis, woy 83 ka pannuigon ni Aaron to nig-aaukuy sikandan ki Parao.
Nohimu no Uod ka Tukod ni Aaron
8 Nignangon ka Magboboot ki Mosis woy ki Aaron to, 9 “Ko ognangon si Parao kaniu to ‘Himu kow to ogko-in-inuan,’ nangoni nu si Aaron to ‘Puruta nu ka tukod nu woy itugdo nu dio to tangkaan ni Parao,’ woy ogkohimu no uod ka tukod.”
10 No nighondio si Mosis woy si Aaron ki Parao, woy pighimu ran ka innangon to Magboboot kandan. Intugdo ni Aaron ka tukod din dio to tangkaan ni Parao woy to mgo hibatoon din, woy no uod ka tukod.
11 No pigpo-umow ni Parao ka banggiitan no mgo otow woy mgo bailan, woy nanhimu sikandan to sikan dod no mgo himuon pinabadyo to kandan no hinoos no katagaanan: 12 Kara sagboka kandan nigtugdo to tukod din, woy no uod ka mgo tukod. Di, pig-aboong do to tukod ni Aaron ka mgo tukod dan. 13 Di nigmakogal ka goinawa ni Parao, woy waro sikandin nigpamminog kandan, unawa to taan no innangon to Magboboot.
Ka Iglogpad no Langosa
14 No nigkagi ka Magboboot ki Mosis to, “Waro nighalin ka goinawa ni Parao; nigligal sikandin to pogpohipanow to mgo otow. 15 Hondio ka ki Parao to masoom to poghondio din to woig. Tagari nu sikandin to tikoba to Nilu, woy aapa nu ka tukod no no uod. 16 No nangoni nu sikandin to ‘Inpa-aap a to Magboboot no Igbudyag to mgo Hibriu odyow to pognangon koikow to: Pohipanawa nu ka mgo otow ku odyow no ogpakasadyo sikandan koddi to han-hanawan. Di taman kuntoon waro ka mogpannalinga. 17 No soini ka kinagian to Magboboot kagi: pinabadyo to soini ogkataga ka no sikoddi ian ka Magboboot. Oglamposan ku ka woig to Nilu to soini no tukod to boad ku, woy ogkohimu no langosa ka woig. 18 Ogkammatoy ka mgo ngaap to Nilu, woy ogmasongot on ka woig; konad ogpoko-inom to woig ka mgo otow to Ehiptu.’”
19 Nigkagi ka Magboboot ki Mosis to ‘Nangoni nu si Aaron to ‘Aapa nu ka tukod nu woy ikawoy nu to ampow to mgo woig to Ehiptu, ampow to mgo bougan woy mgo tu-auganan, mgo lanow woy mgo linsobuk’ woy ogkohimu no langosa ka woig. Ogdatong no duon langosa to tibon Ehiptu agad dio to mgo sakoru no kadyu woy to mgo kuron.”
20 Pighimu ni Mosis woy ni Aaron ka tibo no innangon to Magboboot. Pigkawoy ni Aaron ka tukod dio to tangkaan ni Parao woy to mgo hibatoon din, woy piglamposan din ka woig to Nilu, woy nohimu no langosa ka tibon woig. 21 Nammatoy ka tibon mgo ngaap to woig no Nilu, woy nigmasongot ka woig taman to waro otow no ogpoko-inom to woig. Duon langosa to tibon Ehiptu. 22 Di songo sikan dod ka pighimu to mgo bailan to Ehiptu pinabadyo to kandan no hinoos no katagaanan, woy nigmakogal ka goinawa ni Parao; waro sikandin nigpannalinga ki Mosis woy ki Aaron, iing to innangon to Magboboot. 23 No, nig-uli sikandin dio to dakol no baoy rin, woy waro do duon mogsagman. 24 Nigkukutkut ka mgo otow to Ehiptu dio to ilis to woig to Nilu odyow to pogsakug to woig no og-inomon dan, hoo su kono dan ogko-inom ka woig no nigtu-aug. 25 Nigligad ka papitu no allow takas to piglamposan to Magboboot ka Nilu.