8
Ka Iglogpad no mgo Bakbak
1 No nigkagi ka Magboboot ki Mosis to “Hondio kow ki Parao woy nangoni nu sikandin to ‘Soini ka kinagian to Magboboot: Pohipanawa nu ka koot-otawan ku odyow no ogpakasadyo sikandan koddi. 2 Ko ogligal ka to pogpohipanow kandan, ogpa-aap a to igkabaybadyari now no mgo bakbak dio to tibon tano now. 3 Ogmarasig lagboy ka mgo bakbak to Nilu no woig. Ogmanggakap sikandan pohondio to dakol no baoy nu, pohondio to sinabong nu woy to hibatanan nu. Ogmamanoik sikandan to mgo baoy to mgo hibatoon nu woy mgo otow nu, woy ogsood sikandan to mgo hilutuanan now woy dio to mgo komotanan now to pan. 4 Ogmamanoik ka mgo bakbak koikow woy to tibon mgo otow nu woy mgo hibatoon nu.’”
5 No nigkagi ka Magboboot ki Mosis to “Nangoni nu si Aaron no kagi ‘Ikawoy nu ka tukod no duon to boad nu dio to ampow to tibon mgo bougan woy mgo tu-auganan to woig woy mgo linsobuk woy pamagakapa nu ka mgo bakbak to tibon tano to Ehiptu.’”
6 No pigkawoy ni Aaron ka boad din ampow to mgo woig to Ehiptu, woy nigmanggakap ka mgo bakbak no nigtangkap to tibon tano. 7 Di songo sikan dod ka pighimu to mgo bailan to Ehiptu pinabadyo to kandan no hinoos no katagaanan; songo inpagakap dan ka mgo bakbak to tano to Ehiptu.
8 Pigpo-umow ni Parao si Mosis woy si Aaron woy nignangon sikandin to “Panubad kow duon to Magboboot odyow no og-awoon din ka soini no mgo bakbak ligkat koddi woy to mgo otow ku, woy ogbabali a no oghipanow ka koot-otawan nu odyow to pogtubad duon to Magboboot.”
9 Nignangon si Mosis ki Parao to “Igbogoy ku koikow ka katongod to pognangon ko kon-u a ogpanubad tongod koikow woy to mgo hibatoon nu woy to koot-otawan nu odyow no og-awo ka soini no mgo bakbak kaniu woy to mgo baoy now. Ka mgo bakbak naan do no duon to Nilu no woig ka ogkagaat.”
10 Nigtabak si Parao to “Asoom.” No nigkagi si Mosis to “No. Sikan ka ogdatong, odyow no ogkataga kow no waro Igbudyag no unawa to Magboboot. 11 Ogka-awo ka mgo bakbak dio’t koikow woy to mgo hibatoon nu woy mgo otow nu woy to mgo baoy now; ka mgo bakbak naan do to Nilu ka ogkagaat.”
12 Takas to nig-ongkod si Mosis woy si Aaron ki Parao, nig-umow si Mosis to Magboboot tongod to mgo bakbak no inpagakap din ki Parao. 13 No pighimu to Magboboot ka inbudyu ni Mosis. Nammatoy ka mgo bakbak dio to mgo baoy, dio to mgo lama woy dio to mgo kamot. 14 Pigpanlimud dan ka mgo bakbak, woy nigmasongot lagboy ka tibon mgo ugpaan tongod to mgo bakbak no namou. 15 Di to pogpitow ni Parao no madmarodyow on ka pog-ugpo dan, nigmakogal ka goinawa rin, woy waro sikandin nigpamminog ki Mosis woy ki Aaron unawa to taan no innangon to Magboboot.
Ka Iglogpad no mgo Kosu
16 No nigkagi ka Magboboot ki Mosis to “Nangoni nu si Aaron to ‘Ikadyow nu ka tukod nu woy lamposi nu ka atigbun to tano’ woy ogdatong no ogkohimu no mgo kosu ka atigbun to tibon tano to Ehiptu.”
17 Sikan ian ka pighimu ran, woy to pogkadyow ni Aaron to tukod din no duon to boad din woy poglampos din to atigbun to tano, nanlopow ka mgo kosu duon to mgo otow woy mgo adyam. Nohimu no kosu ka tibon atigbun to tano to Ehiptu. 18 Di to pog-ol-oog to mgo bailan to poghimu to kosu pinabadyo to kandan no hinoos no katagaanan, waro sikandan nakahimu. Woy duon ka mgo kosu to mgo otow woy mgo adyam. 19 Nigkagi ka mgo bailan ki Parao to “Soini ian ka tinuru to Magboboot.” Di makogal ka goinawa ni Parao woy waro sikandin nigpamminog unawa to taan no innangon to Magboboot.
Ka Iglogpad no mgo Langow
20 No nigkagi ka Magboboot ki Mosis to “Soom soom ka onow to masoom, woy tangko ka ki Parao to poghondio din to woig woy nangoni nu sikandin to ‘Soini ka kinagian to Magboboot: Pohipanawa nu ka koot-otawan ku odyow no ogpakasadyo sikandan koddi. 21 Ko kono nu ogpohipanawon ka koot-otawan ku ogpa-aap a to mgo langow no ogbukaas dio to koikow woy dio to mgo hibatoon nu woy dio to koot-otawan nu woy dio to mgo baoy now. Ogkaponu to mgo langow ka mgo baoy to mgo otow to Ehiptu, woy agad ka mgo lama ran. 22 Di to sikan no allow, ogloinon ku ka oghimuon ku to tano to Gosin no ian ka ugpaan to koot-otawan ku; kono ogbukaas ka mgo langow dio, odyow no ogkataga kow no sikoddi ian ka Magboboot no kai to soini no tano. 23 Ogloinon ku ka oghimuon ku to mgo otow ku woy to koikow no mgo otow. Ogdatong ka soini no ogko-in-inuan no tuus asoom no allow.’”
24 Woy sikan ian ka pighimu to Magboboot. Nigdatong ka mgo langow no nigbukaas no makopal woy nansood sikandan to dakol no baoy ni Parao, woy dio to mgo baoy to mgo hibatoon din, woy nigmaroot ka tibon tano to Ehiptu tongod to mgo langow. 25 No pigpo-umow ni Parao si Mosis woy si Aaron woy nigkagi sikandin to “Hondio kow woy ogpanubad kow to Magboboot kai to soini no tano.”
26 Di nigtabak si Mosis to “Kono ogkohimu sikan. Ogkarootan ka mgo matig Ehiptu to mgo tubad noy to Magboboot. Woy ko maroot ka pogpitow ran to mgo tubad noy, naugpa ko ogbatuon koy ran. 27 Awoson no oghipanow koy to tatou no allow pohondio to han-hanawan odyow to pogtubad duon to Magboboot noy, unawa to innangon din kanami.”
28 Nigkagi si Parao to “Ogbabali a no oghondio kow odyow to pogtubad duon to Magboboot, di dokow oghondio to mariu lagboy. No kuntoon panubari a nu.”
29 Nigtabak si Mosis to “Ko oglibuwas a to tangkaan nu, ogpanubad a to Magboboot, woy asoom no allow ogka-awo ka mgo langow ki Parao woy to mgo hibatoon din woy mgo otow rin. Di ligdongi nu no kono man do oggawoy si Parao pinabadyo to pogbaabag to mgo otow to poghipanow odyow to pogpanubad duon to Magboboot.”
30 No nig-ongkod si Mosis ki Parao, woy nigpanubad sikandin to Magboboot, 31 woy pighimu to Magboboot ka inbudyu ni Mosis: nig-awo ka mgo langow dio to ki Parao woy to mgo hibatoon din woy mgo otow rin; waro sagboka no langow no nagaat. 32 Di to sikan dod no allow pigmakogal ni Parao ka goinawa rin, woy waro sikandin mogbabali to pogpohipanow to mgo otow.