9
Ka Logpad dio to mgo Adyam
1 No nignangon ka Magboboot ki Mosis to “Hondio ka ki Parao woy nangoni nu sikandin to ‘Soini ka kinagian to Magboboot no Igbudyag to mgo Hibriu “Pohipanawa nu ka koot-otawan ku, odyow no ogpakasadyo sikandan koddi.” 2 Ko ogligal ka to pogpohipanow kandan no ogparagas ka to poggon-gon kandan, 3 ogpa-aap ka Magboboot to mokohinhinaat no darau dio to mgo adyam now to kamot; dio to mgo kuddo, mgo asnu, mgo kamil, mgo baka, mgo karniru woy mgo kambing now. 4 Di ogloinon to Magboboot ka mgo adyam to mgo otow to Israil woy to mgo adyam to mgo otow to Ehiptu, odyow no waro adyam no ogkamatoy dio to mgo otow to Israil.’”
5 Nig-aam ka Magboboot to allow woy nignangon sikandin to “Asoom no allow, sikan ka oghimuon to Magboboot to tano now.”
6 No sikan ian to pogkapawo pighimu to Magboboot ka innangon din; nammatoy ka tibon mgo adyam to mgo otow to Ehiptu, di waro agad sagboka no adyam no namatoy dio to mgo otow to Israil. 7 Pigpohipanow ni Parao ka mgo hibatoon din odyow to pogsobsob, woy nakita ran no waro agad sagboka no adyam to mgo otow to Israil no namatoy. Di agad to sikan, waro nigmoumol ka goinawa rin, woy waro din pohipanawa ka mgo otow.
Ka Iglogpad no mgo Buutut
8 No nigkagi ka Magboboot ki Mosis woy ki Aaron to “Purut kow to songo komu no abu ligkat to sinalsaan woy igsawod ni Mosis sikan pohondio to ampow dio to tangkaan ni Parao. 9 Ogkohimu no abug sikan to ampow to tibon tano to Ehiptu woy ogkahalinan ka tibon mgo otow woy mgo adyam to mgo buutut dio to tibon tano.”
10 No sikan ian nigpurut sikandan to abu ligkat to sinalsaan woy nigtangko sikandan ki Parao. Insawod ni Mosis ka abu pohondio to ampow, woy nahalinan ka mgo otow woy mgo adyam to mgo buutut. 11 Waro nakatangko ka mgo bailan ki Mosis tongod to mgo buutut no duon to kandan woy to tibon mgo otow to Ehiptu. 12 Di pigmakogal to Magboboot ka goinawa ni Parao, woy waro sikandin nigpamminog ki Mosis woy ki Aaron, unawa to innangon to Magboboot ki Mosis.
Ka Iglogpad no Uran no Ice
13 No nignangon ka Magboboot ki Mosis to “Onow ka to masoom-soom pad, woy tangko ka ki Parao woy nangoni nu sikandin to, ‘Soini ka kinagian to Magboboot no Igbudyag to mgo Hibriu; Pohipanawa nu ka koot-otawan ku odyow no ogpakasadyo sikandan koddi, 14 su ko kono ka, ogpa-aap a kuntoon to tibon kabogbogan to mgo igbadyadbadyad ku dio to koikow woy dio to mgo hibatoon nu woy koot-otawan nu, odyow no ogkataga ka no waro agad hontow no unawa koddi to tibon kalibutan. 15 Hoo su ko pigbobootan ku pa porom, pigkadyow kud on ka boad ku woy piglogparan kud sikaniu pinabadyo to darau no ogpaka-awo kaniu to ampow to tano. 16 Di pigpasasindog ku sikoikow to soini ro no pugtian; odyow to pogpakita to kabogbogan ku, woy odyow no ogkohingaranan a to tibon kalibutan. 17 Nig-atu ka pad to koot-otawan ku, woy waro nu pohipanawa sikandan. 18 No sikan ian iing to soini no kasooman asoom ogpa-aap a to dorooti no uran no ice.aWaro agad kon-u no duon uran iing to sikan no no-uug to Ehiptu ligkat to binunsuran taman kuntoon. 19 Sugu ka kuntoon odyow no ogpokohoung ka tibon mgo adyam woy ka tibo no duon to kamot. Hoo su, agad nokoy no adyam woy agad hontow no otow no waro moghoung no duon dod to kamot ogkouranan to ice, woy ogkammatoy sikandan.
20 Duon mgo hibatoon ni Parao no nahallok to kinagian to Magboboot woy nig-agpas nigpohoung sikandan to mgo uripon woy mgo adyam dan. 21 Di duon duma pad no mgo hibatoon ni Parao no waro mogpannalinga to kinagian to Magboboot, woy pigbaagad dan do ka mgo uripon woy mgo adyam dan no nagaat to kamot.
22 No nigkagi ka Magboboot ki Mosis to “Ikawoy nu ka boad nu pohondio to langit odyow no og-uran to ice to tibon Ehiptu; dio to mgo otow, mgo adyam woy agad nokoy no nigtubu to mgo kamot to Ehiptu.” 23 To pogkawoy ni Mosis to tukod din no nigtinuru to langit, nigpa-aap ka Magboboot to lugung woy uran no ice woy kilat no nigdoog to tano. No sikan ian pigpo-uranan to Magboboot ka tano to Ehiptu to ice; 24 no-uug ka ice, woy niglibong-libong nigkiblat-kiblat ka kilat. Sikan ian ka dorooti no daldaa-ot no nabadyaan to tano to Ehiptu ligkat to binunsuran to sikan no nasud. 25 To tibon Ehiptu pigpambarasan ka tibo no duon to kamot; iglagkos ka mgo otow woy mgo adyam; pigpambarasan ka tibo no nigtubu to mgo kamot, woy na-awaan to mgo doun ka kara kadyu. 26 Ka sagboka ro no longod no waro ma-urani to ice ian ka tano to Gosin no ian ka pig-ugpaan to mgo otow to Israil.
27 No pigpo-umow ni Parao si Mosis woy si Aaron. Kagi rin to “Nakasao a kuntoon. Ka Magboboot naan ka matuarong woy sikoddi woy ka mgo otow ku ian ka nakasao. 28 Panubad ka to Magboboot, su litos on kanami ka lugung woy uran no ice. Ogpohipanawon ku sikaniu; kono kow on ogpogoson to pog-ugpo kai.”
29 Nigtabak si Mosis to “Ko ogpakalibuwas ad on to lunsud, ogkawadyon ku ka mgo boad ku no ogpanubad a to Magboboot. Oghagtong ka lugung woy warad on ice no ogko-uug, odyow no ogkataga ka no ka Magboboot ian ka tagtuun to tibon kalibutan. 30 Di nataga a no agad kuntoon waro kahallok nu woy to mgo hibatoon nu dio to Magboboot.”
31 (Noubus na-awo ka ladyagon woy ka mgo pinamua no ligkatan to linu, su nigbogas on ka ladyagon woy nigpamulak ka pinamua no ligkatan to linu.b 32 Di waro na-awo ka trigu woy ka sintino su moori sikan to pogbogas.)
33 No nig-ongkod si Mosis ki Parao, woy niglibuwas sikandin to lunsud. Pigkawoy rin ka mgo boad din pohondio to Magboboot woy nighagtong ka lugung woy ka uran no ice, woy warad on uran no no-uug to tano. 34 To pogkakita ni Parao no warad on ka uran woy ka ice woy ka lugung, nighutuk man do sikandin to pogsao. Pigmakogal din woy to mgo hibatoon din ka mgo goinawa ran. 35 No sikan ian no makogal ka goinawa ni Parao woy waro din pohipanawa ka mgo otow to Israil, unawa to innangon to Magboboot pinabadyo ki Mosis.